ବ୍ରହ୍ମପୁର ଅଫିସ,୧୯।୪: ଗଞ୍ଜାମ ଜିଲା କୁକୁଡ଼ାଖଣ୍ଡି ବ୍ଲକ ଅନ୍ତର୍ଗତ ଫାଦ୍ରୀପଲ୍ଲୀ ନିକଟରେ ଥିବା ଏକ କ୍ରସରରେ ସୋମବାର ପୂର୍ବାହ୍ନରେ ବିସ୍ଫୋରଣ ଘଟିଛି। ଏଥିରେ ୨ ଜଣଙ୍କର ମୃତ୍ୟୁ ଘଟିଥିବା ବେଳେ ୩ ଜଣ ଗୁରୁତର ହୋଇଛନ୍ତି। ଗୁରୁତରଙ୍କୁ ପ୍ରଥମେ ଏମ୍କେସିଜି ମେଡିକାଲ ଓ ପରେ ଏଏମ୍ଏସ୍ ହସ୍ପିଟାଲକୁ ସ୍ଥାନାନ୍ତର କରାଯାଇଛି । ମୃତକ ହେଲେ କୁକୁଡ଼ାଖଣ୍ଡିର ସନ୍ତୋଷ କୁମାର (୩୮) ଫାଦ୍ରୀପଲ୍ଲୀର ସୁରେଶ ପାତ୍ର (୪୫) । ଗୁରୁତରମାନେ ହେଲେ କୁକୁଡ଼ାଖଣ୍ଡିର ପି.ସାଇଗୋପାଳ (୩୫), ହିଞ୍ଜିଳିକାଟୁ ଥାନା ଅନ୍ତର୍ଗତ ବେଲଗାଁର ସୁଶାନ୍ତ ପଣ୍ଡା (୩୮) ଓ ଫାଦ୍ରୀପଲ୍ଲୀର ଦୀପକ ପାତ୍ର (୩୫ )।
ଖବରପାଇ ଅଗ୍ନିଶମ ବିଭାଗ ପୋଲିସ, ତହସିଲଦାର ଓ ସାଇଣ୍ଟିଫିକ୍ ଟିମ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। କ୍ରସର ପରିସରରେ ଥିବା ୨ଟି ଘରେ ବେଆଇନ ଭାବେ ବିସ୍ଫୋରକ ଦ୍ରବ୍ୟ ଥିବାରୁ ସେଠାରେ ବିସ୍ଫୋରଣ ଘଟିଥିଲା ବୋଲି ଅଗ୍ନିଶମ ବିଭାଗ ପକ୍ଷରୁ କୁହାଯାଇଛି ।
