ବେଜିଂ/ଇଂଲଣ୍ଡ,୨୨।୧୨ : ବ୍ରିଟେନରେ ଥିବା ଗ୍ଲୋବାଲ ହେଲ୍ଥ ଇଣ୍ଟେଲିଜେନ୍ସ ଏବଂ ଆନାଲିଟିକ୍ସ ଫାର୍ମ ଚାଇନାରେ କରୋନା ସଂକ୍ରମଣ ସମ୍ବନ୍ଧରେ ପରିବର୍ତ୍ତିତ ପରିସ୍ଥିତି ଉପରେ ଏକ ନୂତନ ବିଶ୍ଳେଷଣ ଉପସ୍ଥାପନ କରିଛି। ଏଥିରେ କୁହାଯାଇଛି ଯେ ଚାଇନାରେ ହାଇବ୍ରିଡ ପ୍ରତିରୋଧକ ଶକ୍ତିର ଅଭାବ ରହିଛି ଏବଂ ଦେଶରେ କମ ଟିକାକରଣ ଏବଂ ବୁଷ୍ଟର ଡୋଜ ଦିଆଯାଇଥିବାରୁ ପରିସ୍ଥିତି ଅତ୍ୟନ୍ତ ଗୁରୁତର ହେବାର ଆଶଙ୍କା ରହିଛି। ବିଶ୍ଳେଷଣ ଅନୁଯାୟୀ, ଯଦି ଚାଇନା ସରକାର ଶୂନ-କୋଭିଡ ନୀତିକୁ ସମ୍ପୂର୍ଣ୍ଣ ରୂପେ ପରିବର୍ତ୍ତନ କରନ୍ତି, ତେବେ ଦେଶରେ ୧୩ ଲକ୍ଷରୁ ୨୧ ଲକ୍ଷ ଲୋକଙ୍କ ଜୀବନ ବିପଦରେ ପଡିପାରେ।
ଏହି ସମୟରେ ଚାଇନା ସରକାରୀ ଖବରକାଗଜ ଗ୍ଲୋବାଲ ଟାଇମ୍ସ କହିଛି ଯେ ବେଜିଂରେ ଗୁରୁତର ମାମଲା ଅତି ଦ୍ରୁତ ଗତିରେ ବୃଦ୍ଧି ପାଇବ। ଯାହାକୁ ଶୀଘ୍ର ସମାଧାନ କରିବାକୁ ପଡ଼ିବ। ଖବରକାଗଜରେ ବରିଷ୍ଠ ଶ୍ୱାସକ୍ରିୟା ବିଶେଷଜ୍ଞ ୱାଙ୍ଗ ଗୁଆଙ୍ଗଫା କହିଛନ୍ତି ଯେ ଆମେ ଶୀଘ୍ର ପ୍ରସ୍ତୁତ ହେବା ଏବଂ ଜ୍ୱର, କ୍ଲିନିକ, ଜରୁରୀକାଳୀନ ତଥା ଗୁରୁତର ଚିକିତ୍ସା ଆଦି ନେଇ ଯୋଜନା କରାଯିବା ଜରୁରୀ। ଅନ୍ୟପକ୍ଷରେ ଦେଶରେ ମହାମାରୀ ଯୋଗୁଁ ମୋଟ ମୃତ୍ୟୁ ସଂଖ୍ୟା ୫,୨୪୧କୁ ବୃଦ୍ଧି ପାଇଛି। ଏୟାରଫିନିଟିର ବିଶ୍ଳେଷଣ ଅନୁଯାୟୀ ଚାଇନାର ଜନସଂଖ୍ୟାରେ ରୋଗ ପ୍ରତିରୋଧକ ସ୍ତର ବହୁତ କମ ଅଟେ। ଏହାର ନାଗରିକମାନଙ୍କୁ ଘରୋଇ ଉତ୍ପାଦିତ ଜେବସ ସିନୋଭାକ ଏବଂ ସିନୋଫାର୍ମ ଟିକା ଦିଆଯାଉଥିଲା, ଯାହା ସଂକ୍ରମଣ ଏବଂ ମୃତ୍ୟୁକୁ ରୋକିବାରେ ଅତ୍ୟନ୍ତ ପ୍ରଭାବଶାଳୀ ନୁହେଁ। ଗ୍ଲୋବାଲ ହେଲ୍ଥ ଇଣ୍ଟେଲିଜେନ୍ସ ଏବଂ ଆନାଲିଟିକ୍ସ ଅନୁଯାୟୀ, ଯଦି ହଂକଂ ଭଳି ଚାଇନାରେ ସଂକ୍ରମଣ ବଢ଼େ ତା’ହେଲେ ଏହାର ସ୍ବାସ୍ଥ୍ୟସେବା ବିଫଳ ହୋଇପାରେ, ଯାହା ଦେଶରେ ୧୬.୭ କୋଟିରୁ ୨.୭୯ କୋଟି ମାମଲା ଚିହ୍ନଟ ହେବାର ଆଶଙ୍କା ରହିଛି।
ଏୟାରଫିନିଟିରେ ଭ୍ୟାକ୍ସିନ ଏବଂ ଏପିଡେମୋଲୋଜିର ମୁଖ୍ୟ ଡାକ୍ତର ଲୁଇସ ବ୍ଲେୟାର କହିଛନ୍ତି ଯେ ଚାଇନାର ଶୂନ-କୋଭିଡ ନୀତି ବଦଳାଇବା ପୂର୍ବରୁ ଟିକାକରଣକୁ ବୃଦ୍ଧି କରିବା ଜରୁରୀ । ବିଶେଷକରି ଏହାକୁ ବିଚାର କରି ଦେଶର ବୃଦ୍ଧ ଜନସଂଖ୍ୟାଙ୍କ ପ୍ରତି ଦୃଷ୍ଟି ଦେବାର ଆବଶ୍ୟକତା ରହିଛି। ଏହା ପରେ ଭବିଷ୍ୟତରେ କରୋନା ବିପଦକୁ ରୋକିବା ପାଇଁ ଲୋକଙ୍କୁ ହାଇବ୍ରିଡ ପ୍ରତିରୋଧକ ଟିକା ମଧ୍ୟ ଦେବାକୁ ପଡ଼ିବ। ଏହା ଅନ୍ୟ ଦେଶ ଏବଂ ଅଞ୍ଚଳରେ ପ୍ରଭାବଶାଳୀ ପ୍ରମାଣିତ ହୋଇଛି।
