ପଦ୍ମପୁର, ୨୯।୭ (ଡି.ଏନ.ଏ)
ସିମେଣ୍ଟ ଖୁଣ୍ଟ ଉପରେ ମାଡ଼ିଛି କଣ୍ଟା ଜାତୀୟ ବିଦେଶୀ ଡ୍ରାଗନ ଫ୍ରୁଟ୍ ଗଛ। ଲତାଗୁଡ଼ିକ ଭଲ ଭାବେ ବଢ଼ିବା ପାଇଁ ତିଆରି ହୋଇଥିବା ସ୍ବତନ୍ତ୍ର ଖୁଣ୍ଟ ଧାଡ଼ି ଧାଡ଼ି କରି ପୋତାଯାଇଛି। ଭଦ୍ରକ ଜିଲା ବାସୁଦେବପୁର ପୌରାଞ୍ଚଳ ପାଢ଼ୀ ସାହିର ଯୁବଚାଷୀ ରତିକାନ୍ତ ପାଢ଼ୀଙ୍କ ବାଡ଼ିରେ ଫଳିଛି ଏହି ବିଦେଶୀ ଫଳ। ସମ୍ପୂର୍ଣ୍ଣ ଜୈବିକ ପଦ୍ଧତି, ଜୈବ ଜିଆଖତ ଓ ପିଡ଼ିଆ ବ୍ୟବହାର କରି ଦେଢ଼ ଏକରରୁ ଊର୍ଦ୍ଧ୍ୱ ଜମିରେ ସେ ଏହି ଚାଷ କରିଛନ୍ତି।
କହନ୍ତି, ୟୁଟ୍ୟୁବ୍ରୁ ଡ୍ରାଗନ ଫଳ ଖାଇବାର ଉପକାରିତା ଓ ଚାଷ ପ୍ରଣାଳୀ ବିଷୟରେ ତଥ୍ୟ ସଂଗ୍ରହ କରି ଗତବର୍ଷ ଗୁଜରାଟରୁ ୧୦୦୦ ଡ୍ରାଗନ ଗଛ କିଣି ଆଣିଥିଲେ। ସେହିବର୍ଷ ଜୁନ୍ରେ ନିଜ ବାଡ଼ିରେ ସେ ଏହି ଗଛ ଲଗାଇଥିଲେ। ଏହାର ୧୦ ମାସ ପରେ ଗଛରେ ଫଳ ଫଳିବା ଆରମ୍ଭ କରିଥିଲା। ଏହି ଫଳର ଔଷଧୀୟ ଗୁଣ ଯୋଗୁ ବଜାରରେ ଚାହିଦା ମଧ୍ୟ ଅଧିକ। ଉକ୍ତ ରକ୍ତଚାପ, କର୍କଟ ଓ ମଧୁମେହ ରୋଗୀ ଏହି ଫଳକୁ ଖାଇଲେ ରୋଗ ପ୍ରତିରୋଧକ ଶକ୍ତି ବଢ଼ିବା ସହ ରୋଗ ମଧ୍ୟ ନିୟନ୍ତ୍ରଣ ହୋଇଥାଏ। ବଜାରରେ କିଲୋ ପ୍ରତି ଏହି ଫଳ ୧୮୦ରୁ ୨୦୦ ଟଙ୍କାରେ ବିକ୍ରି ହେଉଥିବା ବେଳେ ପ୍ରଥମ ବର୍ଷ ୨ କୁଇଣ୍ଟାଲରୁ ଅଧିକ ଫଳ ବିକ୍ରି ହୋଇଛି। ଚଳିତବର୍ଷ ଏଥିରୁ ଅଧିକ ୪ ଗୁଣା ଫଳ ଉପତ୍ାଦନ ହେବ ବୋଲି ସେ ଆଶା ରଖିଛନ୍ତି। ଏହି ଗଛ ଥରେ ଲଗାଇଲେ ୩୦ ବର୍ଷ ଯାଏ ବଞ୍ଚି ରହିବ ବୋଲି ସେ କହିଛନ୍ତି। ଏହି ଚାଷ ପାଇଁ ସେ ୫ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି। ନୂଆ ପ୍ରକାର ଚାଷ ଯୋଗୁ ବିଫଳ ହେବା ଆଶଙ୍କା କରି ସେ ଡ୍ରାଗନ ଗଛ ମଝିରେ ଲଗାଇଥିଲେ ତାଇୱାନ ପିଜୁଳି ଗଛ। ତେବେ ଉଭୟ ଗଛ ଆଶାଠାରୁ ଅଧିକ ଫଳ ଦେଇଛି। ଅଦ୍ୟାବଧି ପ୍ରାୟ ୩ କୁଇଣ୍ଟାଲ ପିଜୁଳି ବିକ୍ରି ହୋଇଛି। ସେହିପରି ରତିକାନ୍ତ ପର୍ସେମନ, ଆଭାକାଡ଼, ଏପ୍ରିକଟ, ଚେରି, ୱାଲନଟ, ଲାଲ, ସବୁଜ ଓ କଳା ଅଙ୍ଗୁର, ମଞ୍ଜି ବିହୀନ ଲେମ୍ବୁ, ବିରଳ ପ୍ରଜାତିର ଆମ୍ବ, ଆପଲ ଗଛ ମଧ୍ୟ ଲଗାଇଛନ୍ତି। ବନ୍ୟଜନ୍ତୁଙ୍କ କବଳରୁ ଫସଲ ରକ୍ଷା ପାଇଁ ବିଦ୍ୟୁତ୍ ଝଟକାର ବ୍ୟବସ୍ଥା କରିଛନ୍ତି। ବାଡ଼ିରେ ସ୍ବତନ୍ତ୍ର ଭାବେ କମ୍ପୋଷ୍ଟ ପିଟ୍ ତିଆରି କରିଥିବା ସହ ବୁନ୍ଦା ଜଳସେଚନ ବ୍ୟବସ୍ଥା କରିଛନ୍ତି। ସରକାରଙ୍କ ପକ୍ଷରୁ ଚଳିତବର୍ଷ ପ୍ରୋତ୍ସାହନ ରାଶି ବାବଦରେ ତାଙ୍କୁ ୫୦ ହଜାର ଟଙ୍କାର ସହାୟତା ରାଶି ମିଳିଛି। ବଗିଚା ପାଇଁ ମୋଟ ୮ରୁ ୧୦ ଲକ୍ଷ ଟଙ୍କା ଖର୍ଚ୍ଚ ହୋଇଛି। ସ୍ଥାନୀୟ ଉଦ୍ୟାନ ବିଭାଗ ଦେଇଛି ବୈଷୟିକ ସହାୟତା। ବଗିଚାର ରକ୍ଷଣାବେକ୍ଷଣ ନିଜେ ତଦାରଖ କରୁଥିବା ବେଳେ ଅନ୍ୟ ଦୁଇ ଜଣଙ୍କୁ ସ୍ଥାୟୀ ନିଯୁକ୍ତି ଦେଇଛନ୍ତି। ଏହିଭଳି ନୂତନ ପଦ୍ଧତିରେ ଜ୍ଞାନକୌଶଳକୁ ବ୍ୟବହାର କରି ଆଗାମୀ ଯୁବପିଢ଼ି ଆତ୍ମନିର୍ଭରଶୀଳ ହେବା ସହ ଅନ୍ୟକୁ ରୋଜଗାରକ୍ଷମ କରିବା ପାଇଁ ସେ ଆହ୍ବାନ ଦେଇଛନ୍ତି।
