ନୂଆଦିଲ୍ଲୀ,୮ା୧୧: ଜାତୀୟ ଗଣତାନ୍ତ୍ରିକ ମେଣ୍ଟ (ଏନ୍ଡିଏ) ଶାସନ କରୁଥିବା ବିହାରରେ ଏଥର କ୍ଷମତା ପରିବର୍ତ୍ତନର ଆଭାସ ମିଳିଛି। ରାଷ୍ଟ୍ରୀୟ ଜନତା ଦଳ (ଆର୍ଜେଡି) ନେତୃତ୍ୱାଧୀନ ବିରୋଧୀ ମହାମେଣ୍ଟ ହାତକୁ ଶାସନର ଡୋରି ଯାଇପାରେ। ହିନ୍ଦୀ ଭାଷୀ ଏହି ରାଜ୍ୟରେ ତେଜସ୍ବୀ ଯାଦବଙ୍କ ନେତୃତ୍ୱରେ ଆର୍ଜେଡି, କଂଗ୍ରେସ ଓ ବାମପନ୍ଥୀ ମହାମେଣ୍ଟ ୧୨୪ ଆସନ ଦଖଲ କରି ବହୁମତ ହାସଲ କରିବ ବୋଲି ଅଧିକାଂଶ ସର୍ବେକ୍ଷଣ ସଂସ୍ଥା ଭବିଷ୍ୟବାଣୀ କରିଛନ୍ତି। ସେହିପରି ଦୀର୍ଘ ୧୫ ବର୍ଷ ଧରି ମୁଖ୍ୟମନ୍ତ୍ରୀ ଥିବା ନୀତୀଶ କୁମାରଙ୍କ ଦୁର୍ଗ ଭୁଶୁଡ଼ିିପାରେ। ନୀତୀଶଙ୍କ ସଂଯୁକ୍ତ ଜନତା ଦଳ (ଜେଡିୟୁ) ନେତୃତ୍ୱରେ ଭାଜପା, ବିକାଶଶୀଳ ଇନ୍ଶାନ ପାର୍ଟି (ଭିଆଇପି) ଏବଂ ହିନ୍ଦୁସ୍ଥାନୀ ଆଓ୍ବାମ ମୋର୍ଚ୍ଚା (ଏଚ୍ଏଏମ୍) ସାମିଲ ଥିବା ଏନ୍ଡିଏ ୧୧୦ ଆସନରେ ସୀମିତ ରହିପାରେ। କିଙ୍ଗ୍ ମେକର ଭୂମିକାରେ ଅବତୀର୍ଣ୍ଣ ହେବେ ବୋଲି ପୂର୍ବରୁ କୁହାଯାଉଥିବା ଲୋକ ଜନଶକ୍ତି ପାର୍ଟି (ଏଲ୍ଜେପି) ଅଧ୍ୟକ୍ଷଙ୍କୁ ଚିରାଗ ପାଶ୍ୱାନଙ୍କୁ ଆଶାନୁରୂପ ସଫଳତା ମିଳିବ ନାହିଁ। ଶନିବାର ତୃତୀୟ ତଥା ଅନ୍ତିମ ପର୍ଯ୍ୟାୟ ଭୋଟ ଗ୍ରହଣ ଶେଷ ହେବା ପରେ ବୁଥ୍ ଫେରନ୍ତା ଭୋଟରଙ୍କଠାରୁ ସଂଗୃହୀତ ମତକୁ ନେଇ ପ୍ରକାଶିତ ଏକ୍ଜିଟ୍ ପୋଲ୍ରୁ ଏହା ଅନୁମାନ କରାଯାଉଛି।
୨୪୩ ଆସନ ବିଶିଷ୍ଟ ବିହାର ବିଧାନସଭାରେ ସରକାର ଗଠନ ପାଇଁ କୁହୁକ ସଂଖ୍ୟା ହେଉଛି ୧୨୨। ନିର୍ବାଚନ କମିଶନଙ୍କ ଘୋଷଣା ଅନୁସାରେ ମୋଟ ୩ଟି ପର୍ଯ୍ୟାୟରେ ନିର୍ବାଚନ ହୋଇଥିଲା। ଅକ୍ଟୋବର ୨୮ରେ ପ୍ରଥମ ପର୍ଯ୍ୟାୟରେ ୭୧ ଆସନ ପାଇଁ ଭୋଟ ଗ୍ରହଣ କରାଯାଇଥିଲା। ଦ୍ୱିତୀୟ ପର୍ଯ୍ୟାୟ ଲାଗି ନଭେମ୍ବର ୩ରେ ୯୪ ଆସନ ଓ ୭ ତାରିଖ ଶନିବାର ୭୮ ଆସନରେ ମତଦାନ ହୋଇଥିଲା। ବିହାର ନିର୍ବାଚନ ଜିତି ନିଜ ଗଡ଼ ରକ୍ଷା ପାଇଁ ମୁଖ୍ୟମନ୍ତ୍ରୀ ନୀତୀଶ କୁମାର ପ୍ରାଣପଣେ ଉଦ୍ୟମ ଚଳାଇଥିଲେ। ଏପରି କି ଏହା ତାଙ୍କର ଶେଷ ନିର୍ବାଚନ ବୋଲି ସେ ଘୋଷଣା କରିଥିଲେ। ସେହିପରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡାଙ୍କ ସମେତ ଏକ ଡଜନରୁ ଊର୍ଦ୍ଧ୍ୱ କେନ୍ଦ୍ରମନ୍ତ୍ରୀ ଓ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଷ୍ଟାର୍ କ୍ୟାମ୍ପେନର ରୂପେ ତୋଫାନୀ ପ୍ରଚାର ଚଳାଇଥିଲେ। ଅନ୍ୟପକ୍ଷେ ଆର୍ଜେଡି ଅଧ୍ୟକ୍ଷ ଲାଲୁ ପ୍ରସାଦ ଯାଦବ ଜେଲ୍ରେ ଥିବାରୁ ୪୦ ବର୍ଷ ମଧ୍ୟରେ ପ୍ରଥମ ଥର ପାଇଁ ପ୍ରଚାର ମଇଦାନରେ ଅନୁପସ୍ଥିତ ଥିଲେ। ତାଙ୍କ ପୁଅ ତେଜସ୍ବୀ ଯାଦବ ଓ୍ବାନ୍ ମ୍ୟାନ୍ ଆର୍ମି ଭାବେ ଶାସକ ମେଣ୍ଟର ମୁକାବିଲା କରିଥିଲେ। ବିରୋଧୀ ମହାମେଣ୍ଟର ଅଂଶୀଦାର କଂଗ୍ରେସ ଦଳର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ମଧ୍ୟ ପ୍ରଚାର ବେଳେ ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କୁ ଟାର୍ଗେଟ କରି ସଂଯୁକ୍ତ ପ୍ରଗତିଶୀଳ ମେଣ୍ଟ (ଉପା)ର ସ୍ଥିତିକୁ ମଜଭୁତ କରିଥିଲେ।
ଶନିବାର ତୃତୀୟ ପର୍ଯ୍ୟାୟ ଭୋଟ ଗ୍ରହଣ ପରେ ଏକ୍ଜିଟ୍ ପୋଲ୍ ଉପରେ ଜାରି ନିର୍ବାଚନ କମିଶନଙ୍କ କଟକଣା ହଟିଥିଲା। ବିଭିନ୍ନ ଜାତୀୟ ସର୍ବେକ୍ଷଣ ସଂସ୍ଥା ପକ୍ଷରୁ ବୁଥ୍ ଫେରନ୍ତା ଭୋଟରଙ୍କ ମତାମତକୁ ନେଇ ସନ୍ଧ୍ୟାରେ ଏକ୍ଜିଟ୍ ପୋଲ୍ ପ୍ରକାଶ ପାଇଥିଲା। ନ୍ୟୁଜ୍ ୨୪-ସି ଭୋଟର ପକ୍ଷରୁ କରାଯାଇଥିବା ସର୍ଭେରେ ମହାମେଣ୍ଟ ୧୨୦ ଏବଂ ଏନ୍ଡିଏ ୧୧୬ ଆସନ ପାଇବ ବୋଲି ଅନୁମାନ କରାଯାଇଛି। ସେହିପରି ଚିରାଗ ପାଶ୍ୱାନଙ୍କ ଏଲ୍ଜେପି ୧ ଏବଂ ଅନ୍ୟ ଦଳ ତଥା ସ୍ବାଧୀନ ପ୍ରାର୍ଥୀ ୬ ଆସନରେ ସୀମିତ ରହିବେ ବୋଲି ଆକଳନ କରାଯାଇଛି। ରିପବ୍ଲିକ୍ ଟିଭି-ଜନ୍ କୀ ବାତ୍ର ପୂର୍ବାନୁମାନ ହେଉଛି ମହାମେଣ୍ଟ ୧୧୮-୧୩୮ ଆସନ ପାଇ ସରକାର ଗଠନ ଦିଗରେ ଅଗ୍ରସର ହେବ। ଏନ୍ଡିଏକୁ ୯୧ରୁ ୧୧୭ ଆସନରେ ସନ୍ତୁଷ୍ଟ ହେବାକୁ ପଡ଼ିବ। ଏଲ୍ଜେପି ୫ରୁ ୮ ଓ ସ୍ବାଧୀନ ୩ରୁ ୬ ଆସନ ପାଇବେ। ଟାଇମ୍ସ ନାଓ ଏବଂ ସି ଭୋଟର ପକ୍ଷରୁ ମିଳିତ ଭାବେ କରାଯାଇଥିବା ସର୍ଭେରୁ ଭବିଷ୍ୟବାଣୀ କରାଯାଇଛି ଯେ, ଏନ୍ଡିଏ ୧୧୬ ଆସନରେ ସୀମିତ ରହିବ ଓ ମହାମେଣ୍ଟକୁ ୧୨୦ ଆସନ ମିଳିବ। ଅନ୍ୟ ଦଳ ଓ ସ୍ବାଧୀନ ପ୍ରାର୍ଥୀ ୬ ସିଟ୍ ଦଖଲ କରିବେ। ସିଏନ୍ଏନ୍ ନ୍ୟୁଜ୍ ୧୮-ଟୁଡେଜ୍ ଚାଣକ୍ୟର ଆକଳନ ମହାମେଣ୍ଟକୁ ସର୍ବାଧିକ ୧୮୦ ଆସନ ଦେଇଥିବାବେଳେ ଏନ୍ଡିଏ ମାତ୍ର ୫୫ ସିଟ୍ ପାଇବ ବୋଲି କହିଛି। ଦୈନିକ ଭାସ୍କର ଏନ୍ଡିଏକୁ ୧୨୦ରୁ ୧୨୭ ଆସନ ଦେଇଥିବାେଳେ ମହାମେଣ୍ଟକୁ ୭୧ରୁ ୮୧କୁ ଖସାଇ ଦେଇଛି। ଏହାର ଆକଳନ ଅନୁସାରେ ଅନ୍ୟ ଦଳ ୧୨ରୁ ୨୩ ଆସନ ପାଇବେ। ସେହିପରି ନ୍ୟୁଜ୍-ଏକ୍ସ ଡିଭି ରିସର୍ଚ୍ଚ ଅନୁଯାୟୀ ଏନ୍ଡିଏ ୧୧୦-୧୧୭ ଓ ମହାମେଣ୍ଟ ୧୦୮-୧୨୩ ଆସନରେ ସଫଳତା ହାସଲ କରିବାକୁ ଥିବାବେଳେ ଅନ୍ୟ ଦଳ ୪ରୁ ୧୦ ଭିତରେ ସୀମିତ ରହିବେ। ତେବେ କାହା ଆକଳନ ସତ ହେଉଛି ତାହା ଆସନ୍ତା ୧୦ ତାରିଖରେ ଭୋଟ ଗଣତି ଶେଷ ହେବା ପରେ ସ୍ପଷ୍ଟ ହେବ। କାରଣ ଅନେକ ସମୟରେ ଏକ୍ଜିଟ୍ ପୋଲ୍ ଭୁଲ୍ ପ୍ରମାଣିତ ହୋଇଥାଏ।
