ନୂଆଦିଲ୍ଲୀ,୧।୧୨: ଭାରତୀୟ ଷ୍ଟକ୍ ବଜାରର ଫଳାଫଳ କ୍ରମାଗତ ଭାବେ ଭଲ ରହିବା ସାଙ୍ଗକୁ ନିବେଶ ମଧ୍ୟ ବୃଦ୍ଧି ପାଉଛି। ଏପରିକି ଶେୟାର ବଜାରରେ ନିବେଶ କରୁଥିବା ନିବେଶକମାନେ ବେଶ୍ ଉତ୍ସାହିତ ରହିଛନ୍ତି। ଚଳିତ ସପ୍ତାହର ୩ୟ କାର୍ଯ୍ୟ ଦିବସର କାରବାର ଫଳାଫଳ ପରେ ସେନ୍ସେକ୍ସ ପ୍ରଥମ ଥର ପାଇଁ ୬୩,୦୦୦ ଅଙ୍କରେ ବନ୍ଦ ହୋଇଛି। ସେହିପରି ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜର ସୂଚକାଙ୍କ ନିଫ୍ଟି ମଧ୍ୟ ୧୯,୦୦୦ ଅଙ୍କର ନିକଟବର୍ତ୍ତୀରେ ରହିଛି। ଅପରପକ୍ଷରେ ବୁଧବାର ଦଲାଲ ଷ୍ଟ୍ରିଟ୍ର କାରବାର ବନ୍ଦ ହେବା ବେଳକୁ ପ୍ରାୟ ୨.୪୦ ଲକ୍ଷ କୋଟି ଟଙ୍କାର ଲାଭ କରିଥିବା ଜଣାପଡିଛି। କାରଣ ବିଏସ୍ଇରେ ପଞ୍ଜୀକୃତ ନିବେଶକଙ୍କ ଶେୟାରଗୁଡିକ ମାର୍କେଟ୍ କ୍ୟାପିଟାଲାଇଜେଶନ ୨ ଲକ୍ଷ ୪୦ ହଜାର କୋଟି ବୃଦ୍ଧି ପାଇ ୨୮୮.୫୫ ଲକ୍ଷ କୋଟିରେ ପହଞ୍ଚତ୍ଛି। ସେହିଭଳି ବୁଧବାର କେନ୍ଦ୍ର ସରକାର ଚଳିତ ବର୍ଷର ୨ୟ ତ୍ରୈମାସିକ (ଜୁଲାଇ-ସେପ୍ଟେମ୍ବର) ଶେଷ ସୁଦ୍ଧା ଦେଶର ମୋଟ ଘରୋଇ ଉତ୍ପାଦ (ଜିଡିପି)ର ଅଭିଭୃଦ୍ଧି ସମ୍ପର୍କରେ ବିସ୍ତୃତ ସୂଚନା ପ୍ରଦାନ କରିବାର କିଛି ସମୟ ପୂର୍ବରୁ ବଜାର କାରବାର ବହୁତ ଭଲ ହୋଇଥିଲା। ଉଲ୍ଲେଖଯୋଗ୍ୟ, ଷ୍ଟକ୍ ବଜାରରେ ଏହି ଉତ୍ସାହ ପଛରେ ଏକ ବଡ଼ କାରଣ ରହିଛି, ତାହା ହେଉଛି ଅଶୋଧିତ ତୈଳ ମୂଲ୍ୟ ହ୍ରାସ ସାଙ୍ଗକୁ ଚାଇନାରେ କୋଭିଡ୍ କଟକଣା ଓ ଲକ୍ଡାଉନ ଯୋଗୁ ତୈଳ ଚାହିଦା ହ୍ରାସ ପାଇଛି।
କ୍ରମାଗତ ୭ମ ଦିନ ଲାଗି ଷ୍ଟକ୍ ବଜାରର ଫଳାଫଳ ଭଲ ରହିଛି। ଏପରିକି ଚଳିତ ସପ୍ତାହର ୩ୟ କାର୍ଯ୍ୟଦିବସର ଫଳାଫଳ ନିବେଶକଙ୍କ ମନରେ ଉତ୍ସାହ ଭରି ଦେଇଛି। ଫଳରେ ଶେୟାର ବଜାରର ନିବେଶକମାନେ କିଛି ପରିମାଣରେ ନିବେଶ ବୃଦ୍ଧି କରିପାରିଛନ୍ତି। ବୁଧବାର ଷ୍ଟକ୍ ବଜାରର ଫଳାଫଳ (ଶେୟାର ମାର୍କେଟ) ଅନୁଯାୟୀ ବମ୍ବେ ଷ୍ଟକ୍ ଏକ୍ସଚେଞ୍ଜ (ବିଏସ୍ଇ)ର ସେନ୍ସେକ୍ସ ୪୧୮(୪୧୭.୮୧) ପଏଣ୍ଟ ବଢ଼ି ୬୩,୧୦୦ (୬୩,୦୯୯.୬୫) ଅଙ୍କରେ କାରବାର ବନ୍ଦ କରିଥିଲା। ସେହିଭଳି ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜ (ଏନ୍ଏସ୍ଇ) ର ନିଫ୍ଟି-୫୦ରେ ମଧ୍ୟ ୧୪୦ (୧୪୦.୩୦) ପଏଣ୍ଟ ବୃଦ୍ଧି ଘଟି ୧୮,୭୫୮ (୧୮,୭୫୮.୩୫) ଅଙ୍କରେ ବଜାର ବନ୍ଦ ହୋଇଥିବା ଜଣାପଡ଼ିଛି।
