ଆସିକା,୨୩।୮ (ସୁରେନ୍ଦ୍ର ନାଥ ସାହୁ): କୋଟିନଡ଼ା ଥାନା ଅନ୍ତର୍ଗତ ଆସିକା-କବିସୂର୍ଯ୍ୟନଗର ମୁଖ୍ୟରାସ୍ତାର କୋଟିନଡ଼ା ଗ୍ରାମରେ ଗୁଣିଗାରେଡ଼ିକୁ କେନ୍ଦ୍ର କରି ମଙ୍ଗଳବାର ଶତାଧିକ ପୁରୁଷ ଓ ମହିଳା ଥାନା ପରିସରରେ ରୁଣ୍ଡ ହୋଇଥିଲେ। ଗୁଣିର ଶିକାର ହୋଇଥିବା ସନ୍ଦେହ କରି ପୀଡିତା ମହିଳାଙ୍କୁ ମଧ୍ୟ ଲୋକମାନେ ପୋଲିସ ସମ୍ମୁଖକୁ ଆଣିଥିଲେ। ସଂପୃକ୍ତ ଗ୍ରାମରେ ସନ୍ଦେହ କରାଯାଉଥିବା ଗୁଣିଆକୁ ଚିହ୍ନଟ ଲାଗି ଉତ୍ତ୍ୟକ୍ତ ଗ୍ରାମବାସୀ ପୋଲିସକୁ ଅନୁମତି ମାଗିଥିଲେ। ଘଟଣାସ୍ଥଳରେ ଆସିକା ଏସ୍ଡିପିଓ ଉମା ଶଙ୍କର ସିଂ, ଥାନା ଅଧିକାରୀ କୃଷ୍ଣଚନ୍ଦ୍ର ସାହା ଏବଂ କେତେକ ଲୋକ ପ୍ରତିନିଧି ଉତ୍ତ୍ୟକ୍ତ ଜନସାଧାରଣଙ୍କୁ ଏଭଳି ଭ୍ରାନ୍ତ ଚିନ୍ତାଧାରାରୁ ଦୂରେଇ ଆବଶ୍ୟକୀୟ ଚିକିତ୍ସା ଲାଗି ପରାମର୍ଶ ଦେବା ସହ ଗ୍ରାମରେ ଭାଇଚାରା ଭାବ ଅତୁଟ ରଖିବା ଲାଗି କହିଥିଲେ। ପରେ ପରିସ୍ଥିତି ଶାନ୍ତ ପଡିଥିଲା। ଗ୍ରାମବାସୀ ଏକ ବୈଠକରେ ସେମାନଙ୍କ ଚିକିତ୍ସା ଲାଗି ପଦକ୍ଷେପ ନେବା ସହ ଭବିଷ୍ୟତ କାର୍ଯ୍ୟପନ୍ଥା ନିରୁପଣ ଲାଗି ଆଲୋଚନା କରିଥିବା ଜଣାଯାଇଛି ା
ପ୍ରକାଶ ଯେ, ଗତ ଚାରି ପଞ୍ଚ ବର୍ଷ ମଧ୍ୟରେ ସେହି ଗ୍ରାମର କେତେକ ବ୍ୟକ୍ତିଙ୍କ ଅସ୍ବଭାବିକ ମୃତ୍ୟୁ ଘଟିଛି ା ଗତ ଦୁଇମାସ ହେଲା କୋଟିନଡା ଗ୍ରାମର ଗନ୍ଧର୍ଭ ମହାନ୍ତି ଏବଂ ତାଙ୍କ ପରିବାରର ଅନ୍ୟ ଦୁଇଜଣଙ୍କ ଅସ୍ବାଭାବିକ ଚାଲିଚଳନ, ହାବଭାବ ଓ ଭୂତସବାର ଥିବା ଭଳି ପରିସ୍ଥିତି ଏହି ଚିନ୍ତାଧାରାକୁ ଅଧିକ ଦୃଢ କରିଥିଲା ା ଗ୍ରାମବାସୀଙ୍କ କହିବାନୁଯାୟୀ ପୀଡ଼ିତଙ୍କୁ ଗାଁ ବାହାରକୁ ନେବା ପରେ ଭଲ ହୋଇଯାଉଥିଲା ବେଳେ ଭିତରକୁ ଆସିଲେ ପୁଣି ସେହିଭଳି ଅସ୍ବାଭାବିକ ଭାବଭଙ୍ଗି ପ୍ରଦର୍ଶନ କରୁଛନ୍ତି ା
ଏପରିକି ପୂର୍ବରୁ ମୃତ୍ୟୁ ହୋଇଥିବା କେତେକ ବ୍ୟକ୍ତିଙ୍କ ନାମ କହୁଥିଲା ବେଳେ ଅନ୍ୟ କେତେକଙ୍କ ନାମରେ ମଧ୍ୟ ପ୍ରଳାପ କରୁଛନ୍ତି ା ଏଭଳି ସ୍ଥିତିରେ ପ୍ରଶାସନ ଏହି ଘଟଣାକୁ ଗମ୍ଭୀରତାର ସହ ନେଇ ଜନସାଧାରଣ ମଧ୍ୟରେ ଉପୁଜୁଥିବା ଅନ୍ଧବିଶ୍ୱାସକୁ ଦୂରେଇବା ସହ ଦେଖାଦେଉଥିବା ସମସ୍ୟାର ଆବଶ୍ୟକୀୟ ଚିକିତ୍ସା ବ୍ୟବସ୍ଥା ପୂର୍ବକ ସମସ୍ୟାର ସମାଧାନ ଦିଗରେ ତପତ୍ର ହେବା ଲାଗି ସାଧାରଣରେ ମତପ୍ରକାଶ ପାଉଛି ା
