ପାରଳାଖେମୁଣ୍ଡି, ୨୧ା୧ (ଡି.ଏନ୍.ଏ) : ଗଜପତି ଜିଲାର କଳା, ସଂସ୍କୃତି, ଐତିହ୍ୟ ଓ ସମୃଦ୍ଧି ପରମ୍ପରାର ସମାରୋହ ଗଜପତି ଉତ୍ସବ ଓ ପଲ୍ଲିଶ୍ରୀ ମେଳାର ଶନିବାର ଚତୁର୍ଥ ସନ୍ଧ୍ୟାରେ ଦର୍ଶକଙ୍କ ମନରେ ରୋମାଞ୍ଚ ଭରିଛନ୍ତି ଅଭିନେତା ସବ୍ୟସାଚୀ ଓ ଅଭିନେତ୍ରୀ ଅର୍ଚ୍ଚିତା। ଏହି ସନ୍ଧ୍ୟାରେ ପ୍ରବଳ ଜନସମାଗମ ହୋଇଥିଲା। ହଜାର ହଜାର ଦର୍ଶକଙ୍କ ଉପସ୍ଥିତିରେ ଜିଲା ତଥା ଅନ୍ୟ ଜିଲାର କଳାକାରମାନେ ନୃତ୍ୟ, ଗୀତ ପରିବେଷଣ କରିଥିଲେ। ପାରଳାଖେମୁଣ୍ଡି ସହରର ନଟରାଜ ନୃତ୍ୟ କଳା କ୍ଷେତ୍ର ଗ୍ରୁପ, ଗଞ୍ଜାମ ଜିଲା ରଣପା ଲୋକନୃତ୍ୟ, ଚନ୍ଦ୍ରଗିରିର ତିବ୍ଦତିଆନ ଗ୍ରୁପ ଦ୍ୱାରା ଲୋକନୃତ୍ୟ, ସୁରଭି ଗଜପତି, ପାରଳାଖେମୁଣ୍ଡିସ୍ଥିତ ଶ୍ରୀଅରବିନ୍ଦ ବିଦ୍ୟାଳୟ, ସେଞ୍ଚୁରିଆନ ପବ୍ଲିକ ସ୍କୁଲ, କେନ୍ଦ୍ରୀୟ ବିଦ୍ୟାଳୟ, ମହିଳା ସ୍ନାତକ ମହାବିଦ୍ୟାଳୟ, ବନ୍ଦେ ମାତରମ ନୃତ୍ୟ ଦଳ, ଗୋଷାଣି ଓ କାଶୀନଗର ବ୍ଲକର ଲୋକନୃତ୍ୟ, ସମ୍ବଲପୁରର ଲୋକନୃତ୍ୟ, କୋରାପୁଟର ଢେମସା ଲୋକନୃତ୍ୟ ସମେତ ୧୪ଟି ଗ୍ରୁପ ନୃତ୍ୟ, ସଙ୍ଗୀତ ପରିବେଷଣ କରିଥିଲେ। ସଭା କାର୍ଯ୍ୟକ୍ରମରେ ଗଜପତି ଜିଲାପରିଷଦ ଅଧ୍ୟକ୍ଷ ଜି.ତିରୁପତି ରାଓ ମୁଖ୍ୟ ଅତିଥି ରୂପେ ଯୋଗଦେଇ ଥିଲେ। ସମ୍ମାନିତ ଅତିଥି ଭାବେ ଅତିରିକ୍ତ ଜିଲାପାଳ ସଂଗ୍ରାମ ଶେଖର ପଣ୍ଡା, ମୋହନା ପଞ୍ଚାୟତ ସମତି ଅଧ୍ୟକ୍ଷ ରାଜୀବ ଶବର, ଆର୍.ଉଦୟଗିରି ବ୍ଲକ ଅଧ୍ୟକ୍ଷ ଲକ୍ଷ୍ମୀନାରାୟଣ ଶବର, ନୂଆଗଡ ବ୍ଲକ ଅଧ୍ୟକ୍ଷା ମାଳତୀ ପ୍ରଧାନ, ରାୟଗଡ଼ ବ୍ଲକ ଅଧ୍ୟକ୍ଷ ପୂର୍ଣ୍ଣବାସୀ ନାୟକ, ଗୋଷାଣି ବ୍ଲକ ଅଧ୍ୟକ୍ଷ ଏନ.ବୀରରାଜୁ, ଗୁମ୍ମା ବ୍ଲକ ଅଧ୍ୟକ୍ଷା ସୁନେମୀ ମଣ୍ଡଳ, କାଶୀନଗର ବ୍ଲକ ଅଧ୍ୟକ୍ଷା ବିସାୟାମ୍ମା, କାଶୀନଗର ବିଜ୍ଞାପିତ ପରିଷଦ ଅଞ୍ଚଳ ପରିଷଦ ଅଧ୍ୟକ୍ଷା ଏମ.ସୁଧାରାଣୀ ପ୍ରମୁଖ ମଞ୍ଚାସୀନ ଥିଲେ । ପ୍ରତେକ ଦିନ ଅପେକ୍ଷା ଶନିବାର ଜନ
ସମାବେଶ ଢେର ଅଧିକ ଥିଲା।
