ଭୁବନେଶ୍ୱର,୨୨।୬(ବ୍ୟୁରୋ): ମଞ୍ଚେଶ୍ୱର ଥାନା ଅନ୍ତର୍ଗତ ଭିଏସ୍ଏସ୍ନଗର ଅଞ୍ଚଳରେ ମଙ୍ଗଳବାର ଏକ ଅଭାବନୀୟ ଘଟଣା ଘଟିଛି। ଜଣେ ଦିବ୍ୟାଙ୍ଗ ନାବାଳକ ପୁଅକୁ ଛାଡ଼ିଦେଇ ମା’ବାପା କେଉଁଆଡେ ପଳାଇଛନ୍ତି। ଖବର ମିଳିବା ପରେ ସ୍ଥାନୀୟ ପୋଲିସ ଓ ଚାଇଲ୍ଡଲାଇନ୍ ପହଞ୍ଚତ୍ ଉକ୍ତ ନାବାଳକଙ୍କୁ ଉଦ୍ଧାର କରିଛି। ତାଙ୍କ ବୟସ ୧୪ରୁ ୧୫ବର୍ଷ ମଧ୍ୟରେ ହେବ। ସେ ଭୁବନେଶ୍ୱର କିମ୍ବା ସହର ଉପକଣ୍ଠ ଅଞ୍ଚଳର ହୋଇଥିବା ଅନୁମାନ କରାଯାଉଛି। ଚାଇଲ୍ଡଲାଇନ ପକ୍ଷରୁ ନାବାଳକଙ୍କୁ ସିଡବ୍ଲ୍ୟୁସିଙ୍କୁ ହସ୍ତାନ୍ତର କରାଯାଇଥିଲା। ସିଡବ୍ଲ୍ୟୁସିଙ୍କ ନିର୍ଦ୍ଦେଶକ୍ରମେ ତାଙ୍କୁ ରୁଚିକା ଓପନ ସେଲ୍ଟରରେ ରଖାଯାଇଛି। ସେ ପ୍ରଥମେ କିଛି ଖାଦ୍ୟ ଖାଉ ନ ଥିଲେ। ଚାଇଲ୍ଡଲାଇନ ପକ୍ଷରୁ ବହୁ ଉଦ୍ୟମ ପରେ ସେ ଖାଦ୍ୟ ଖାଇବା ଆରମ୍ଭ କରିଛନ୍ତି। ବୁଧବାର ତାଙ୍କ ସ୍ବାସ୍ଥ୍ୟାବସ୍ଥା ଯାଞ୍ଚ ସହ ଡାକ୍ତରଙ୍କ ପରାମର୍ଶ ନିଆଯିବ ବୋଲି ଭୁବନେଶ୍ୱର ଚାଇଲ୍ଡଲାଇନ ପକ୍ଷରୁ କୁହାଯାଇଛି।
ସୂଚନା ଅନୁଯାୟୀ, ଦିବ୍ୟାଙ୍ଗ ନାବାଳକ ଜଣକ ଅପରାହ୍ନରେ ଭିଏସ୍ଏସ୍ନଗର ଇଡ୍କୋ ଟାୱାର ନିକଟ ରାସ୍ତା କଡ଼ରେ ଶୋଇଥିଲେ। ତାଙ୍କ ଉପରେ ଏକ ଟାଓ୍ବେଲ ଘୋଡ଼ା ହୋଇଥିଲା। ସେ କିଛି କହିପାରୁ ନ ଥିବାରୁ ସ୍ଥାନୀୟ ଲୋକେ ଚାଇଲ୍ଡଲାଇନକୁ ଖବର ଦେଇଥିଲେ। ଚାଇଲ୍ଡଲାଇନ ଅଧ୍ୟକ୍ଷ ବେଣୁଧର ସେନାପତି କହିଛନ୍ତି, ମା’ବାପାମାନେ ଦିବ୍ୟାଙ୍ଗ ପିଲାଙ୍କୁ ଘରେ ରଖି ଯତ୍ନ ନେବା କଥା। ହେଲେ ଅନେକ ସମୟରେ ବିଭିନ୍ନ କାରଣରୁ ସେମାନେ ନିଜ ଦିବ୍ୟାଙ୍ଗ ପିଲାଙ୍କୁ ରାସ୍ତା କିମ୍ବା ଟ୍ରେନ୍ରେ ଛାଡ଼ି ଦେଉଛନ୍ତି। ଫଳରେ କିଛି ପିଲାଙ୍କର ମୃତ୍ୟୁ ହେଉଥିବାବେଳେ ଆଉ କେହି ଭିକ୍ଷାବୃତ୍ତି କରି ଦୁର୍ବିଶହ ଜୀବନ ବିତାଉଛନ୍ତି। ଏଭଳି ନ କରିବାକୁ ଚାଇଲ୍ଡଲାଇନ ପକ୍ଷରୁ ସେ ଅଭିଭାବକମାନଙ୍କୁ ଅନୁରୋଧ କରିଛନ୍ତି। ମାନସିକ ରୋଗୀ ପିଲାମାନେ ରହିବାକୁ ସେଭଳି ସଂସ୍ଥା ନାହିଁ। ତେଣୁ ତାଙ୍କ ରହିବା ସୁବିଧା ପାଇଁ ସରକାରଙ୍କ ପକ୍ଷରୁ ପଦକ୍ଷେପ ନିଆଯାଉ ବୋଲି ଅଧ୍ୟକ୍ଷ ସେନାପତି କହିଛନ୍ତି।
