ଜାମିନ ଆବେଦନ କରିବା ବ୍ୟକ୍ତିଗତ ସ୍ବାଧୀନତା ଅଧିକାରର ଏକ ଅଂଶବିଶେଷ। ଅନୁରୂପ ଭାବେ ବ୍ୟକ୍ତିଗତ ସ୍ବାଧୀନତା ଭାରତୀୟ ସମ୍ବିଧାନର ଅନୁଚ୍ଛେଦ ୨୧ରେ ସୁନିଶ୍ଚିତ କରାଯାଇଥିତ୍ବା ଜୀବନଧାରଣ ଅଧିକାରର ଏକ ଅଂଶ। ତେବେ ତଳ କୋର୍ଟଗୁଡ଼ିକରେ ଜାମିନ ପ୍ରଦାନରେ ନିଷ୍ପତ୍ତି ବେଳେ ଅହେତୁକ ବିଳମ୍ବ କରାଯାଉଥିବାର ଅନେକ ଦୃଷ୍ଟାନ୍ତ ଦେଖିବାକୁ ମିଳୁଛି। ଫଳରେ ଅଭିଯୁକ୍ତମାନେ ଅକାରଣେ ଦୀର୍ଘଦିନ ଧରି ଜେଲ୍ରେ ଜୀବନ ବିତାଉଛନ୍ତି। ଏଭଳି ସ୍ଥିତିରେ ସୁପ୍ରିମ୍କୋର୍ଟ ୨୦୨୩ ଅଗଷ୍ଟରୁ ବିଚାରାଧୀନ ଥିବା ଏକ ମାମଲାର ଶୁକ୍ରବାର ଶୁଣାଣି କରି ଜାମିନ ଆବେଦନ ପ୍ରକ୍ରିୟା ଉପରେ ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ଜଷ୍ଟିସ୍ ବି.ଆର. ଗଭାଇ ଏବଂ କେ.ଭି. ବିଶ୍ୱନାଥନ୍ଙ୍କ ଖଣ୍ଡପୀଠ ଜାମିନ ପ୍ରଦାନରେ ଅଭ୍ୟାସଗତ ବିଳମ୍ବକୁ ନାପସନ୍ଦ କରି କହିଛନ୍ତି, ଜାମିନ ପାଇବା ଅଭିଯୁକ୍ତଙ୍କ ମୌଳିକ ଅଧିକାର। ଏଥିରେ ଦିନଟିଏ ବି ବିଳମ୍ବ ହେଲେ ସମ୍ବିଧାନ ପ୍ରଦତ୍ତ ଏହି ଅଧିକାର କ୍ଷୁଣ୍ଣ ହେଉଛି।
ନୂଆଦିଲ୍ଲୀ,୧୦।୧୧(ପି.ଟି.): ଅଦାଲତଗୁଡ଼ିକ ଜାମିନ ଆବେଦନକୁ ବର୍ଷ ବର୍ଷ ଧରି ପକାଇ ରଖୁଥିବାରୁ ସୁପ୍ରିମକୋର୍ଟ ଅସନ୍ତୋଷ ବ୍ୟକ୍ତ କରିଛନ୍ତି। ଏପରିକି ଜାମିନ ଆବେଦନର ବିଚାର ଗୋଟିଏ ଦିନ ବିଳମ୍ବ ହେବା ଦ୍ୱାରା ନାଗରିକମାନଙ୍କ ମୌଳିକ ଅଧିକାର ଉପରେ ଏହା ପ୍ରତିକୂଳ ପ୍ରଭାବ ପକାଇଥାଏ ବୋଲି ଜଷ୍ଟିସ୍ ବି.ଆର୍. ଗଭାଇ ଏବଂ କେ.ଭି. ବିଶ୍ୱନାଥନଙ୍କ ଖଣ୍ଡପୀଠ କହିଛନ୍ତି। ବ୍ୟକ୍ତିଗତ ସ୍ବାଧୀନତାର ଗୁରୁତ୍ୱ ଉପରେ ସର୍ବୋଚ୍ଚ ଅଦାଲତ ପୁଣିଥରେ ଜୋର୍ ଦେଇଛନ୍ତି।
ଜଣେ ଆବେଦନକାରୀଙ୍କ ଜାମିନ ଆବେଦନ ଗତବର୍ଷ ଅଗଷ୍ଟରୁ ଆଲ୍ଲାହାବାଦ ହାଇକୋର୍ଟରେ ବିଚାର ଅପେକ୍ଷାରେ ପଡ଼ିରହିଥିବାବେଳେ ଏଥିରେ କୌଣସି ଅଗ୍ରଗତି ଘଟି ନ ଥିବାରୁ ସେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଶୁଣାଣି ବିନା ଜାମିନ ଆବେଦନକୁ ବାରମ୍ବାର ସ୍ଥଗିତ ରଖାଯାଉଥିବା ସେ ଅଭିଯୋଗ କରିଥିଲେ। ସର୍ବୋଚ୍ଚ ଅଦାଲତ ତାଙ୍କ ପିଟିଶନର ଶୁଣାଣି କରିବା ଅବସରରେ ଉପରୋକ୍ତ ଟିପ୍ପଣୀ ଦେଇଛନ୍ତି। ହାଇକୋର୍ଟରେ ନଭେମ୍ବର ୧୧ରେ ଜାମିନ ଆବେଦନର ଶୁଣାଣି ହେବାକୁ ଥିବାରୁ ସେହିଦିନ ଏହାର ବିଚାର କରି ଯଥାସମ୍ଭବ ନିଷ୍ପତ୍ତି ନେବା ପାଇଁ ସମ୍ପୃକ୍ତ ବିଚାରପତିଙ୍କୁ ଖଣ୍ଡପୀଠ ଅନୁରୋଧ କରିଛନ୍ତି। ସେହିଦିନ ନିଷ୍ପତ୍ତି ନେବା ସମ୍ଭବ ନ ହେଲେ ୨ ସପ୍ତାହ ମଧ୍ୟରେ ରାୟ ପ୍ରଦାନ କରିବାକୁ ଖଣ୍ଡପୀଠ କହିଛନ୍ତି।
