ନୂଆଦିଲ୍ଲୀ: କର୍ମଚାରୀ ରାଜ୍ୟ ବୀମା ନିଗମ (ଇଏସ୍ଆଇସି) ତା’ର ପ୍ରାୟ ୯୧ ହଜାର କୋଟି ଟଙ୍କାର କିଛି ଅଂଶକୁ ଷ୍ଟକ୍ ବଜାର ଓ କର୍ପୋରେଟ୍ ବଣ୍ଡ୍ ବଜାରରେ ନିବେଶ କରିବା ବିଷୟରେ ସରକାର ବିଚାର କରୁଛନ୍ତି। ବର୍ତ୍ତମାନ ସମୟରେ କମ୍ ସୁଧ ମିଳୁଥିବା ଫିକ୍ସଡ୍ ଡିପୋଜିଟ୍ ଭାବେ ଏହି ଟଙ୍କା ରହିଛି। ଅଧିକ ରିଟର୍ନ ମିଳିବା ଆଶା ଥିବା ସ୍ଥାନରେ ସେହି ପାଣ୍ଠି ନିବେଶ କରିବାକୁ ସରକାର ଯୋଜନା କରିଛନ୍ତି। ଫଳରେ ଏହି ନିବେଶରୁ ଅଧିକ ରିଟର୍ନ ମିଳିଲେ ସେହି ଟଙ୍କାରେ ନିଗମ ଏହାର ସଦସ୍ୟମାନଙ୍କୁ ଆହୁରି ଉନ୍ନତ ସୁବିଧା ଯୋଗାଇପାରିବ। ବର୍ତ୍ତମାନ ସମୟରେ ନିଗମ ଏହାର ପାଣ୍ଠିକୁ ସରକାରୀ ବ୍ୟାଙ୍କରେ ଫିକ୍ସଡ୍ ଡିପୋଜିଟ୍ ଭାବେ ଓ ସରକାରୀ ଉଦ୍ୟୋଗର ବଣ୍ଡ ଆକାରରେ ନିବେଶ କରୁଛି। ଇଏସ୍ଆଇ ଅଧୀନରେ ୪୧ ନିୟୁତ ବୀମାଭୁକ୍ତ ହିତାଧିକାରୀ ଅଛନ୍ତି। ହିତାଧିକାରୀଙ୍କ ପରିବାରବର୍ଗଙ୍କୁ ସାମିଲ କରାଗଲେ ଇଏସ୍ଆଇର ମୋଟ ହିତାଧିକାରୀଙ୍କ ସଂଖ୍ୟା ହେଉଛି ୧୩.୨୪ କୋଟି। ଇଏସ୍ଆଇସିର ପାଣ୍ଠିକୁ ମ୍ୟୁଚୁଆଲ୍ ଫଣ୍ଡ୍, କର୍ପୋରେଟ୍ ବଣ୍ଡ୍, ଘରୋଇ କ୍ଷେତ୍ରର ବ୍ୟାଙ୍କ ଜାରି କରୁଥିବା କମର୍ସିଆଲ୍ ପେପର ଓ ଇକ୍ବିଟି ଆଦିରେ ନିବେଶ କରିବା ବିଷୟରେ ବିଚାରବିମର୍ଶ ଚାଲିଛି। ଫଳରେ ମାସିକ ୨୧ ହଜାର ଟଙ୍କାରୁ କମ୍ ଦରମା ପାଉଥିବା କର୍ମଚାରୀମାନଙ୍କ ବେତନର ଏକ ନିର୍ଦ୍ଦିଷ୍ଟ ଭାଗ ଇଏସ୍ଆଇସିରେ ଜମା କରାଯାଏ। ଶିଳ୍ପ କାରଖାନାଗୁଡ଼ିକରେ କାର୍ଯ୍ୟ କରୁଥିବା ଅନେକ ଶ୍ରମିକ ଏହା ଅଧୀନରେ ରହିଛନ୍ତି। ଇଏସ୍ଆଇସି ଏହାର ସଦସ୍ୟ ଓ ସେମାନଙ୍କ ପରିବାରକୁ ଚିକିତ୍ସା ସୁବିଧା ଯୋଗାଇ ଦେଉଛି।
