ଭୁବନେଶ୍ୱର,୧୦।୬(ବ୍ୟୁରୋ): ଗ୍ରାହକଙ୍କୁ ବିଭିନ୍ନ ଆପ୍ ଦ୍ୱାରା ଲୋନ୍ ଦେଇ ପରବର୍ତ୍ତୀ ସମୟରେ ମାନସିକ ନିର୍ଯାତନା ଦେବା ସହ ଅଧିକ ଟଙ୍କା ଠକି ନିଆଯାଉଛି। ନିକଟରେ କୋକୋ ଓ ଜୋଜୋ ଲୋନ ଆପ୍ ଠକେଇ ମାମଲାରେ ମହାଗ୍ରାମ ପେମେଣ୍ଟ୍ସ ପ୍ରାଇଭେଟ୍ ଲିମିଟେଡ୍ର ପରିଚାଳନା ନିର୍ଦ୍ଦେଶକ (ଏମ୍ଡି) ରାମ ଶ୍ରୀରାମ ପଠାଡ଼େଙ୍କ ସମେତ ୩ଜଣ ଅଭିଯୁକ୍ତ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ଦ୍ୱାରା ଗିରଫ ହୋଇ ଜେଲ ଯାଇଛନ୍ତି। ତେବେ ଏହି ମାମଲାରେ ତଦନ୍ତ ସମୟରେ ୪୫ଟି ଫେକ୍ ଲୋନ୍ ଆପ ଗୁଗଲ୍ ପ୍ଲେ ଷ୍ଟୋରରେ ଥିବା ଇଓଡବ୍ଲ୍ୟୁ ଜାଣିବାକୁ ପାଇଛି। ଏସବୁ ଆପ୍ ମଧ୍ୟରେ ବେଲୁନ ଆପ୍, କ୍ୟାଶ୍ ପକେଟ, ରୁପି ସ୍ପାର୍କ, ଧନି ଲୋନ୍, ଫ୍ଲାସ ରୁପି କ୍ରେଡିଟ୍ ୱାଲେଟ, ମନି ଟ୍ରି, ୟେସ୍ ରୁପି, ଇଜି କ୍ରେଡିଟ୍, ଓକେ ରୁପି ଲୋନ୍, ଡିସ୍କଭର୍ ଲୋନ୍, କ୍ୟାଶ୍ କୋଲା ଆପ୍ ଆଦି ରହିଛି। ତେଣୁ ଉକ୍ତ ଆପ୍ଗୁଡ଼ିକୁ ଯାଞ୍ଚ କରାଯାଇ ଅତିଶୀଘ୍ର ପ୍ଲେ’ ଷ୍ଟୋରରୁ ହଟାଇବାକୁ ଇଓଡବ୍ଲ୍ୟୁ ଗୁଗଲକୁ ଚିଠି ଲେଖିଛି।
ଇଓଡବ୍ଲ୍ୟୁ ସୂଚନା ଅନୁଯାୟୀ, ଏଭଳି ଆପ୍ ଅଳ୍ପ ପରିମାଣର ଲୋନ ଦେଇ ଗ୍ରାହକଙ୍କୁ ଜାଲରେ ଫସାଉଛନ୍ତି। ଏହାପରେ ଗ୍ରାହକଙ୍କ ସମସ୍ତ ଗୁପ୍ତ ତଥ୍ୟ ନେଇ ସେମାନଙ୍କୁ ବ୍ଲାକମେଲ କରିବା ସହ ଧମକ ଦେଉଛନ୍ତି। ଏହାପରେ ମୂଳ ଟଙ୍କାକୁ ମିଶାଇ ୧୦ଗୁଣା ଟଙ୍କା ନେଉଛନ୍ତି। ଏଭଳି ନିର୍ଯାତନାର ଶିକାର ହୋଇ ଅନେକ ଲୋକ ଆତ୍ମହତ୍ୟା ମଧ୍ୟ କରିଛନ୍ତି। ଗୁରୁତ୍ୱପୂର୍ଣ୍ଣ କଥା ହେଉଛି, ଏସବୁ ଆପ୍ ସଂସ୍ଥା ଗୁଗଲ ଗାଇଡ୍ଲାଇନ୍କୁ ମାନୁନାହାନ୍ତି। ଏଥିସହ ଆପ୍ ସଂସ୍ଥା ପକ୍ଷରୁ ଆର୍ବିଆଇରେ ପଞ୍ଜୀକରଣ କରାଯାଉନାହିଁ। ଏପରି କି ଗୁଗଲ ପ୍ଲେ ଷ୍ଟୋରରେ ଆପ୍ ସମ୍ପର୍କରେ କୌଣସି ତଥ୍ୟାବଳୀ ରହୁନାହିଁ। ତେଣୁ ଡାଉନ୍ଲୋଡ କରିବା ସମୟରେ ଆପ୍ର ମାଲିକ କିଏ, ଆର୍ବିଆଇରେ ପଞ୍ଜୀକୃତ ହୋଇଛି କି ନାହିଁ ଓ ଆପ୍ ଡେଭଲପର୍, କ୍ରିଏଟର ଏବଂ ଅପରେଟରଙ୍କ ପ୍ରକୃତ ଠିକଣା ଗ୍ରାହକ ଜାଣିପାରୁନାହାନ୍ତି। ତେଣୁ ଗୁଗଲ୍ ପ୍ଲେ ଷ୍ଟୋରରେ ଲୋନ ଦେଉଥିବା ଆପ୍ଗୁଡ଼ିକ ଉପରୋକ୍ତ ତଥ୍ୟ ଦେଉ ବୋଲି ଇଓଡବ୍ଲ୍ୟୁ ଚିଠିରେ ଉଲ୍ଲେଖ କରିଛି।
