ମୁମ୍ବାଇ: ଲଗାତର ୪ ସେସନ ଧରି ଭାରତୀୟ ଶେୟାର ବଜାରରେ ଉତ୍ସାହ ପରିଲକ୍ଷିତ ହୋଇଛି। ଗୁରୁବାର ବମ୍ବେ ଷ୍ଟକ୍ ଏକ୍ସଚେଞ୍ଜର ସେନ୍ସେକ୍ସ ୭୦୦ରୁ ଊର୍ଦ୍ଧ୍ୱ ପଏଣ୍ଟ ଉଚ୍ଚରେ ରହିଛି। ବ୍ୟାଙ୍କିଙ୍ଗ୍, ମେଟାଲ ଏବଂ ମିଡିଆ ଷ୍ଟକ୍ କାରବାର ଉନ୍ନତ ହୋଇଥିବା ଜଣାପଡିଛି। ସେନ୍ସେକ୍ସ ୭୨୪ ପଏଣ୍ଟ ବା ୧.୭୮% ଊର୍ଦ୍ଧ୍ୱରେ ରହି ୪୧,୩୪୦ ପଏଣ୍ଟ ସ୍ତରରେ ବନ୍ଦ ହୋଇଛି। ସେହିଭଳି ନିଫ୍ଟି କାରବାର ୨୧୨ ପଏଣ୍ଟ ବା ୧.୭୮% ଉଚ୍ଚରେ ରହିବା ଯୋଗୁ ୧୨,୧୦୦ ପଏଣ୍ଟ ସ୍ତରରେ ରହିଛି। ୩୦ ଶେୟାର ବିଶିଷ୍ଟ ବିଏସ୍ଇ ସୂଚକାଙ୍କର ସମସ୍ତ ଷ୍ଟକ୍ ଭଲ କାରବାର କରିଛି। ଏସ୍ବିଆଇ, ଟାଟା ଷ୍ଟିଲ, ଇଣ୍ଡସଇଣ୍ଡ ବ୍ୟାଙ୍କ, ବଜାଜ ଫାଇନାନ୍ସ, ବଜାଜ ଫିନସର୍ଭ, ଏଚ୍ସିଏଲ୍ ଟେକ୍ର ଶେୟାର କାରବାର ୫.୩% ଉଚ୍ଚରେ ରହିଛି। ସେହିଭଳି ଏନ୍ଏସ୍ଇ ପ୍ଲାଟ୍ଫର୍ମର ନିଫ୍ଟି ମେଟାଲ, ମିଡିଆ, ବ୍ୟାଙ୍କ ଏବଂ ପିଏସ୍ୟୁ ବ୍ୟାଙ୍କ ଉପ-ସୂଚକାଙ୍କ ୪.୪୦ ବଢିଛି।
ଆମେରିକା ରାଷ୍ଟ୍ରପତି ନିର୍ବାଚନ ଫଳାଫଳ ଉପରେ ବର୍ତ୍ତମାନ ସମସ୍ତଙ୍କ ନଜର ରହିଛି। ଫଳରେ ବିଶ୍ୱ ସ୍ତରର ଶେୟାର କାରବାର ବୃଦ୍ଧିପାଇଛି। ସେହିଭଳି ଏସ୍ବିଆଇର ଦ୍ୱିତୀୟ ତ୍ରୈମାସ ଫଳାଫଳ ଉନ୍ନତ ରହିବା ଯୋଗୁ ବ୍ୟାଙ୍କିଙ୍ଗ୍ ଷ୍ଟକ କାରବାର ଉନ୍ନତ ରହିଛି। ଏହାବାଦ ଆଇସିଆଇସିଆଇ ବ୍ୟାଙ୍କର ଲାଭ ଉଚ୍ଚରେ ରହିବା ଯୋଗୁ ଏନ୍ଏସ୍ଇର ବ୍ୟାଙ୍କିଙ୍ଗ ସୂଚକାଙ୍କ ୪ ସେସନ ଧରି ବୃଦ୍ଧି ଘଟିଛି। ଦେଶର ସେବା କ୍ଷେତ୍ର ୭ ମାସ ଧରି ହ୍ରାସ ହେବା ପରେ ଅକ୍ଟୋବରରେ ପୁଣି ଅଭିବୃଦ୍ଧି ପଥକୁ ଫେରିଛି। କୋଭିଡ୍ କଟକଣା ଉଠିବାରୁ ଏହାର ଲାଭ ବଜାର ଉପରେ ପଡିଛି। ଅକ୍ଟୋବରରେ ସର୍ଭିସ ପରଚେଜିଂ ମ୍ୟାନେଜର୍ସ ଇଣ୍ଡେକ୍ସ ୫୪.୧%କୁ ବଢିଛି। ବ୍ରିଟେନର ଅର୍ଥ ବ୍ୟବସ୍ଥା କରୋନା ଲାଗି ବର୍ତ୍ତମାନ ମାନ୍ଦାବସ୍ଥା ସହ ଲଢୁଛି। ସେଠାକାର କେନ୍ଦ୍ରୀୟ ବ୍ୟାଙ୍କ ପୁଣି ଏକ ଆର୍ଥତ୍କ ପ୍ୟାକେଜ ଘୋଷଣା କରିବ ବୋଲି ଯୋଜନା କରୁଛି। ଏହା ମଧ୍ୟ ନିବେଶକଙ୍କ ମନୋଭାବ ଉପରେ ଉନ୍ନତ ପ୍ରଭାବ ପକାଇଛି।
