ବରଗଡ଼ ଜିଲା ପଦ୍ମପୁର ଉପନିର୍ବାଚନ ପାଇଁ ସୋମବାର ମତଦାନ ଶେଷ ହୋଇଛି। ଗଲା ୧୦ଦିନ ଧରି ରାଜ୍ୟ ରାଜନୀତିର ଯେଉଁ ମୁଖ୍ୟ ଆଲୋଚନା ଥିଲା, ପଦ୍ମପୁର ଆସନ କାହା ହାତକୁ ଯିବ, ତାହା ଏବେ ଇଭିଏମ୍ ବାକ୍ସରେ ଆବଦ୍ଧ ହୋଇ ରହିଛି। ଏଥିରେ ୮୦ରୁ ଊର୍ଦ୍ଧ୍ୱ ପ୍ରତିଶତ ଭୋଟର ସେମାନଙ୍କ ମତାଧିକାର ସାବ୍ୟସ୍ତ କରିଛନ୍ତି। ଭୋଟ ହାରକୁ ଦେଖିଲେ ନିଶ୍ଚିତ ଭାବେ ସମସ୍ତଙ୍କୁ ଏହା ଉତ୍ସାହିତ କରିଛି। ଏହାସତ୍ତ୍ବେ ନା ଶାସକ ବିଜେଡି ନା ଭାଜପା କେତେ ଭୋଟ୍ ବ୍ୟବଧାନରେ ବିଜୟୀ ହେବେ, ସେ କଥା କହିବାକୁ ସାହସ ଜୁଟାଇ ପାରୁନାହାନ୍ତି। ତେବେ ପ୍ରତିଦ୍ୱନ୍ଦ୍ୱିତା ମୁଖ୍ୟତଃ ବିଜେଡି ଓ ଭାଜପା ମଧ୍ୟରେ ହେବ ବୋଲି ଚର୍ଚ୍ଚା ହେଉଛି। ସ୍ଥାନୀୟ ଭୋଟର କେଉଁଠାରେ ମଧ୍ୟ ଏକପାଖିଆ ସମର୍ଥନ ଦେଲା ଭଳି ଇଙ୍ଗିତ ଦେଇନାହାନ୍ତି। ଭୋଟରଙ୍କ ମୁହଁରେ ଗୋଟିଏ କଥା, ଭଲ ପ୍ରାର୍ଥୀ ଦେଖି ମତସାବ୍ୟସ୍ତ କରିଛନ୍ତି। ଭୋଟରଙ୍କ ଏହି କଥାକୁ ଯେଉଁମାନେ ପରଖୁଛନ୍ତି ସେମାନଙ୍କ କହିବା କଥା, ସେମାନଙ୍କ ଏଭଳି ଇଙ୍ଗିତ ବୋଧହୁଏ ବିରୋଧୀ ପ୍ରାର୍ଥୀଙ୍କୁ ସୁହାଇପାରେ। ହେଲେ ଶାସକଦଳ ନେତା ଏଠାରେ ଯେଉଁଭଳି ନିର୍ବାଚନ ପରିଚାଳନା କରିଛନ୍ତି ଏବଂ ଯେତିକି ଭାବେ କଳ ଓ ବଳ ଲଗାଇଛନ୍ତି, ଯଦି ତାହା ଭୋଟ୍ରେ ରୂପାନ୍ତର ହୁଏ, ତେବେ ତାହା ଅନ୍ୟ ଦିଗ ଆଡ଼କୁ ନେଇଯିବ।
ତେବେ ଭୋଟ୍ ପ୍ରତିଶତକୁ ଦେଖିଲେ ଭୋଟରମାନେ ଯେ କେବଳ ଉତ୍ସାହିତ ତାହା ନୁହେଁ, ସେମାନେ କେତେ ସଚେତନ ସେ କଥା ମଧ୍ୟ ସ୍ପଷ୍ଟ ସୂଚନା ଦେଉଛି। ତେଣୁ ଏଠାକାର ଭୋଟର କାହାକୁ ଏହି ଆସନ ପାଇଁ ହକ୍ଦାର କରିବେ, ସେମାନେ ଭଲ ଭାବେ ନିଷ୍ପତ୍ତି ନେଇଛନ୍ତି। ତଥାପି ପଦ୍ମପୁରର ବିଭିନ୍ନ ସ୍ଥାନରେ ଭୋଟିଂ କିଭଳି ଚାଲିଛି, ତାର ଖବର ସଂଗ୍ରହ ଲାଗି ଧରିତ୍ରୀ ପକ୍ଷରୁ ଆମେ ଚର୍ଦାପାଲି ପଞ୍ଚାୟତଠାରେ ପହଞ୍ଚତ୍ଥିଲୁ। ଏହି ପଞ୍ଚାୟତ ଅନ୍ତର୍ଗତ ୧୫୨ ନମ୍ବର ବୁଥ୍ ଦାୟିତ୍ୱରେ ଥିବା ବିଏଲଓଙ୍କଠାରୁ ଯାହା ଶୁଣିବାକୁ ପାଇଲୁ, ତାହା ନିଶ୍ଚିତ ଭାବେ ଆଶ୍ଚର୍ଯ୍ୟ କରିବ। ଏହି ପଞ୍ଚାୟତ ଛତିଶଗଡ଼ ସୀମାକୁ ଲାଗିଛି ଏବଂ ଏହା ଏକ ସମ୍ବେଦନଶୀଳ ବୁଥ୍। ତେଣୁ ଏଠାରେ ଭୋଟିଂ ଲାଗି ଆସୁଥିବା ମତଦାତାମାନଙ୍କୁ କିଭଳି ଅଣାଯାଉଛି ବୋଲି ପଚାରିବାରୁ ସେ କହିଥିଲେ ଯେ, ସବ୍କଲେକ୍ଟର ଏବଂ ବିଡ଼ିଓଙ୍କ ଜରିଆରେ ଗାଡ଼ି ବ୍ୟବସ୍ଥା କରାଯାଇଛି। ଉକ୍ତ ଗାଡ଼ି ଜରିଆରେ ମତଦାତାମାନଙ୍କୁ ଆଣିବାର ବ୍ୟବସ୍ଥା ହୋଇଛି, ଯାହାକି ସ୍ଥାନୀୟ ସରପଞ୍ଚଙ୍କ ଦାୟିତ୍ୱରେ ଛଡ଼ାଯାଇଥିବା ସେ କହିଥିଲେ। ତେବେ ସରକାରଙ୍କ ଦାୟିତ୍ୱ କିଭଳି ଜଣେ ଜନପ୍ରତିନିଧିଙ୍କ ହାତରେ ଛାଡ଼ି ଦିଆଯାଇଛି, ସେ କଥାକୁ ଗୁରୁତ୍ୱର ସହ ବିଚାରକୁ ନେବା ଲାଗି ନିକଟରେ ଛିଡା ହୋଇଥିବା ଜଣେ ଯୁବକ ଧୀରେ କହିଥିଲେ, ଏହି ଚର୍ଦାପାଲି ପଞ୍ଚାୟତ ପାଇକମାଳ ବ୍ଲକ ଅନ୍ତର୍ଗତ ୩ ନମ୍ବର ଜିଲା ପରିଷଦ ଜୋନ ଅଧୀନରେ ଆସୁଛି। ଏହି ଜୋନ୍ ଦାୟିତ୍ୱରେ ଶାସକ ଦଳର ଜୁନାଗଡ଼ ବିଧାୟକ ଦିବ୍ୟଶଙ୍କର ମିଶ୍ର ରହିଥିବାବେଳେ ଚର୍ଦାପାଲି ପଞ୍ଚାୟତ ଦାୟିତ୍ୱରେ ବିଜେଡ଼ି ନେତା ଜନ୍ମେଜୟ ଲେଙ୍କା ଥିଲେ। ନିର୍ବାଚନ ସମୟରେ ଏହି ନେତାମାନଙ୍କ ନେତୃତ୍ୱରେ ଚର୍ଦାପାଲି ସରପଞ୍ଚ, ସମିତିସଭ୍ୟ ଏବଂ ନାଏବ ସରପଞ୍ଚ ବିଜେଡିରେ ସାମିଲ ହୋଇଥିଲେ ବୋଲି ଜଣାପଡ଼ିଛି।
ଅନ୍ୟପଟେ ୨ଦିନ ଧରି ପଦ୍ମପୁର ନିର୍ବାଚନ ମଣ୍ଡଳୀରେ ବୁଲିବାବେଳେ କିଛି ନୂଆ ଘଟଣା ଦେଖିବାକୁ ମିଳିଥିଲା। ପଦ୍ମପୁରକୁ ଜିଲା ଘୋଷଣା ଦାବି ନେଇ ଭେଉଁରିଆ ଛକଠାରେ ବସିଥିବା ଆନ୍ଦୋଳନକାରୀ ସେଠାରେ ଆଉ ନ ଥିଲେ। ସେହିପରି ଉପଜିଲାପାଳଙ୍କ କାର୍ଯ୍ୟାଳୟ ଭିତରେ ବିଭିନ୍ନ ଚାଷୀ ସଙ୍ଗଠନ ଯେଉଁ ଧାରଣା ଦେଇଥିଲେ, ସେମାନଙ୍କ ପ୍ରତିନିଧିମାନଙ୍କୁ ମଧ୍ୟ ସେଠାରେ ଦେଖିବାକୁ ମିଳି ନ ଥିଲା। ତେବେ ଲୋକମାନଙ୍କ ନିକଟରେ ୫ଦିନ ପୂର୍ବରୁ ଯେଉଁସବୁ ପ୍ରସଙ୍ଗକୁ ନେଇ ରାଜନୀତି ଚାଲିଥିଲା, ତାହା ମଧ୍ୟ ବସ୍ତୁତଃ ଆଉ ପ୍ରସଙ୍ଗ ହୋଇ ରହି ନଥିବା ଜଣାପଡ଼ୁଥିଲା। ସ୍ଥାନୀୟ କିଛି ଜଣାଶୁଣା ଲୋକଙ୍କ କହିବା କଥା, ବିଜେଡ଼ିର ପ୍ରତିନିଧିମାନେ ସରକାରଙ୍କ ବିରୋଧରେ ଚାଲିଥିବା ଏହିସବୁ ଆନ୍ଦୋଳନ ଏବଂ ଆନ୍ଦୋଳନକାରୀଙ୍କୁ ବୁଝାଇବାରେ ବୋଧହୁଏ ସକ୍ଷମ ହୋଇଛନ୍ତି। ନଚେତ୍ ଏସବୁ ଆନ୍ଦୋଳନର ମଙ୍ଗ ଧରିଥିବା ନେତାମାନଙ୍କ ସହ ଭିତିରି ବୁଝାମଣା ସଫଳ ହୋଇଥିବା କୁହାଯାଇପାରେ। ତେବେ ଏସବୁ ବାଦ୍ ସମସ୍ତ ଭୋଟର ଭଲ ପ୍ରାର୍ଥୀ ଦେଖି ଯିଏବି ତାଙ୍କ ସୁଖଦୁଃଖରେ ଠିଆ ହେବ, ତାଙ୍କୁ ଭୋଟ୍ ଦେବେ ବୋଲି କହିଥିଲେ। ତେଣୁ ଏଠାରେ ପ୍ରସଙ୍ଗ ନା ଅର୍ଥ କେଉଁଟି କାମ କରିବ, ତାହା ଆସନ୍ତା ୮ତାରିଖରେ ହେବାକୁ ଥିବା ଗଣତିରୁ ଜଣାପଡ଼ିବ।
ଭୋଟରଙ୍କ ମୁହଁରୁ ବାହାରୁଥିବା ଏଭଳି କଥା ବିରୋଧୀ ପ୍ରାର୍ଥୀଙ୍କୁ ଭିତିରି ସମର୍ଥନ କରୁଛନ୍ତି ବୋଲି ବୁଝାଯାଇପାରେ। ଅର୍ଥାତ୍ ଯେଉଁ ଆନ୍ଦୋଳନକାରୀଙ୍କ ସହ ବୁଝାମଣା ସରିଛି ବୋଲି କୁହାଯାଉଛି, ବୋଧହୁଏ ସାଧାରଣ ଭୋଟର ସେମାନଙ୍କ ସହିତ ନ ଥାଇପାରନ୍ତି ବୋଲି ଭୋଟରଙ୍କ ମୁହଁରୁ ବାହାରୁଥିବା କଥା ଇଙ୍ଗିତ କରୁଛି। ଏଭଳି କେତେକ ଘଟଣା ସତ୍ତ୍ବେ ସବୁ ଶ୍ରେଣୀର ଭୋଟର ବିପୁଳ ମାତ୍ରାରେ ମତଦାନ ସାବ୍ୟସ୍ତ କରିଛନ୍ତି। ପୂର୍ବରୁ ରାଜ୍ୟରେ ଅନୁଷ୍ଠିତ ହୋଇଥିବା ଧାମନଗର ଉପନିର୍ବାଚନ ଭୋଟିଂ ସମୟରେ ଯେପରି ଅଧିକାଂଶ ସ୍ଥାନରୁ ହିଂସା, ବୁଥ୍ ରିଗିଂ ଏବଂ ଟଙ୍କାବଣ୍ଟାର ଅଭିଯୋଗ ଆସୁଥିଲା, ସେଭଳି ଦୃଶ୍ୟ ପଦ୍ମପୁରରେ ସେତିକି ଦେଖିବାକୁ ମିଳିନି। ତେବେ ବିଜେଡ଼ିର ଯେଉଁ ନେତାମାନେ ପଦ୍ମପୁର ନିର୍ବାଚନ ମଣ୍ଡଳୀର ବିଭିନ୍ନ ଦାୟିତ୍ୱରେ ରହିଥିଲେ, ସେମାନଙ୍କ ପ୍ରାର୍ଥୀ ବିଜୟୀ ହେବା ନେଇ ଏବେଠାରୁ ଅଙ୍କକଷା ଆରମ୍ଭ କରିଦେଇଛନ୍ତି। କିଛି ଦାୟିତ୍ୱରେ ଥିବା ନେତାଙ୍କ ହିସାବ କହୁଛି, ବରିହା ସମାଜର ପୋଲିଂ ହୋଇଥିବା ୫୦ହଜାର ଭୋଟ୍ରୁ ପ୍ରାୟ ୪୦ହଜାର ବିଜେଡି ପ୍ରାର୍ଥିନୀ ବର୍ଷା ସିଂ ବରିହାଙ୍କ ସପକ୍ଷରେ ଯିବ। ସେହିପରି କୁଲତା ସମାଜର ଅଧିକାଂଶ ଭୋଟ୍ ଭାଜପା ସପକ୍ଷରେ ଯିବ। ଏହି ୨ ସମାଜର ଭୋଟ୍ ବ୍ୟବଧାନ ଦେଖିଲେ ବର୍ଷା ସିଂ ବରିହା ୨୦ହଜାର ଭୋଟ୍ରେ ତାଙ୍କର ଲିଡ୍ ଆରମ୍ଭ କରିବେ ବୋଲି ବିଜେଡି ନେତାମାନେ ଆକଳନ କରୁଛନ୍ତି। ହେଲେ କେଉଁ ସମାଜ ବା ଜାତିର ଭୋଟ୍ କାହା ସପକ୍ଷରେ କେତେ ପଡିଛି, ତାର ଆକଳନ ଲଗାଇ ପାରିନାହାନ୍ତି।
ପଦ୍ମପୁରରୁ ସୁନିତ୍ ମିଶ୍ର
