ଢେଙ୍କାନାଳ ଅଫିସ, ୧୨।୨: ଢେଙ୍କାନାଳ ଜିଲା ଗଁଦିଆ ଥାନା ମନ୍ଦାର ନିକଟ ରାସ୍ତାପାର୍ଶ୍ୱରେ ଥିବା ଶ୍ରୀ ଚୈତନ୍ୟ ଗୋସାଇଁ ମଠରେ ଗତ ବୁଧବାର ଘଟିଥିବା ବହୁ ଚର୍ଚ୍ଚିତ ଉଦ୍ଧବ ପାତ୍ର (୩୨) ହତ୍ୟାକାଣ୍ଡର ରହସ୍ୟ ଉନ୍ମୋଚିତ ହୋଇଛି। ଏଥିସହିତ ଖୋଲିଛି ୫୫ ବର୍ଷୀୟ ହତ୍ୟା ଅଭିଯୁକ୍ତ ମଠ ମହନ୍ତ ଦାଶରଥି ବେହେରାଙ୍କ ଆପରାଧିକ କାର୍ଯ୍ୟକଳାପର ଚିଠା। ୧୧ବର୍ଷ ତଳେ ନିଜର ଦ୍ୱିତୀୟ ସ୍ତ୍ରୀଙ୍କୁ ହତ୍ୟା କରି ଦାଶରଥି ଫେରାର ହୋଇଯାଇଥିଲେ। ପରେ ସାଧୁବେଶ ଧରି ଲୋକଙ୍କ ବିଶ୍ୱାସ ସହିତ ଖେଳି ଚାଲିଥିଲେ। ଘଟଣା ଦିନ ଉଦ୍ଧବ ନିଶାସକ୍ତ ଅବସ୍ଥାରେ ଚପଲ ପିନ୍ଧି ମଠ ଭିତରକୁ ପ୍ରବେଶ କରିଥିଲେ, ଯାହାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲେ। ଏଥିରେ ଉତ୍ତ୍ୟକ୍ତ ହୋଇ ଦାଶରଥି ତାଙ୍କୁ ଏକ ଫୁଙ୍କନଳାରେ ଆକ୍ରମଣ କରି ନିର୍ମମ ଭାବେ ହତ୍ୟା କରିଥିଲେ। ଉଦ୍ଧବ ହତ୍ୟା ଘଟଣା ପରେ ନରବଳିକୁ ନେଇ ଯେଉଁ ଚର୍ଚ୍ଚା ହେଉଥିଲା, ତାହା ଅମୁଳକ ବୋଲି ପୋଲିସ ପକ୍ଷରୁ ସ୍ପଷ୍ଟ କରାଯାଇଛି। ଅନ୍ୟପଟେ ଅଭିଯୁକ୍ତଙ୍କୁ ଶୁକ୍ରବାର ଗିରଫ ପରେ କୋର୍ଟ ଚାଲାଣ କରାଯାଇଛି।
ଭୁବନ ଏନ୍ଏସି ବାଜିଛକ ଅଞ୍ଚଳର ଉଦ୍ଧବ ଗଁଦିଆ ଏବଂ ଭୁବନ ଅଞ୍ଚଳରେ ବୁଲି ସ୍କ୍ରାପ୍ ସଂଗ୍ରହ କରି କବାଡ଼ିଆ ବ୍ୟବସାୟୀଙ୍କୁ ଯୋଗାଇ ଥାଆନ୍ତି। ସେ ଅଧିକାଂଶ ସମୟରେ ଶ୍ରୀଚୈତନ୍ୟ ଗୋସାଇଁ ମଠକୁ ଯିବାଆସିବା କରନ୍ତି। ଇତିମଧ୍ୟରେ ଅଭିଯୁକ୍ତ ଦାଶରଥିଙ୍କ ସହିତ ତାଙ୍କ ସମ୍ପର୍କ ନିବିଡ଼ ହୋଇଥିଲା। ତେବେ ଅନେକ ସମୟରେ ଉଦ୍ଧବ ଚପଲ ପିନ୍ଧି ମଠକୁ ପଶିଯାଉଥିଲେ, ଯାହାକୁ ନେଇ ମହନ୍ତଙ୍କ ସହିତ ତାଙ୍କର ଯୁକ୍ତତର୍କ ହେଉଥିଲା। ଘଟଣା ଦିନ ଉଦ୍ଧବ ନିଶାସକ୍ତ ଅବସ୍ଥାରେ ଚପଲ ପିନ୍ଧି ମଠକୁ ପଶିଯିବାରୁ ଉଭୟଙ୍କ ମଧ୍ୟରେ ଯୁକ୍ତତର୍କ ହୋଇ ବିବାଦ ଉଗ୍ରରୂପ ନେଇଥିଲା। ପ୍ରଥମେ ଉଦ୍ଧବ ମହନ୍ତଙ୍କ ମୁଣ୍ଡକୁ ଏକ ଶକ୍ତ ଆଘାତ ଦେଇଥିଲେ। ମଠ ପରିସରରେ ନିଜର ମୋପେଡ୍ (ନଂ. ଓଡି ୦୬ ଏଫ୍ ୫୬୭୬)ରେ ବସିଥିବାବେଳେ ପ୍ରତିଶୋଧ ପରାୟଣ ହୋଇ ଦାଶରଥି ଏକ ଫୁଙ୍କନଳାରେ ଉଦ୍ଧବଙ୍କ ମୁଣ୍ଡକୁ ପଛପଟୁ ଆକ୍ରମଣ କରିଥିଲେ। ତଳେ ପଡ଼ିଯିବା ପରେ ମୁଣ୍ଡକୁ ଛେଚି ପକାଇଥିଲେ। ଏକ କମଣ୍ଡଳୁରେ ତାଙ୍କ ମୁହଁକୁ ବାରମ୍ବାର ଆଘାତ କରିବାରୁ ପ୍ରବଳ ରକ୍ତସ୍ରାବ ହୋଇ ଘଟଣାସ୍ଥଳରେ ଉଦ୍ଧବଙ୍କ ପ୍ରାଣବାୟୁ ଉଡ଼ିଯାଇଥିଲା। ଘଟଣା ପ୍ରଘଟ ହେବା ପରେ ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା। ଲୋକଙ୍କ ଆକ୍ରମଣରୁ ରକ୍ଷା ପାଇବା ପାଇଁ ଦାଶରଥି ନିଜକୁ ମଠର ଏକ ପ୍ରକୋଷ୍ଠରେ କଏଦ କରିଦେଇଥିଲେ। ସୂଚନା ପାଇ ସଦର ଏସ୍ଡିପିଓ ବିକାଶ ବେଉରା, ଗଁଦିଆ ଥାନାଧିକାରୀ ବିଷ୍ଣୁଚରଣ ବାରିକ ପୋଲିସ ଫୋର୍ସ ସହିତ ପହଞ୍ଚତ୍ କବାଟ ଭାଙ୍ଗି ଅଭିଯୁକ୍ତ ମହନ୍ତଙ୍କୁ ଉଦ୍ଧାର କରିଥିଲେ। ଡାକ୍ତରଖାନାରେ ମୁଣ୍ଡରେ ସୃଷ୍ଟି ହୋଇଥିବା କ୍ଷତର ପ୍ରାଥମିକ ଚିକିତ୍ସା ପରେ ଥାନାରେ ଅଟକ ରଖି ପଚରାଉଚରା କରାଯାଇଥିଲା। ଜେରା ବେଳେ ସେ ଦୋଷ ସ୍ବୀକାର କରିଥିବା ଥାନାଧିକାରୀ ସୂଚନା ଦେଇଛନ୍ତି।
