କରାଚୀ,୯।୭(ପି.ଟି.): ଏକ ମୁଖ୍ୟ ପ୍ରାୟୋଜକ ପାଇବା ପାଇଁ ସଂଘର୍ଷ କରୁଥିବା ପାକିସ୍ତାନ କ୍ରିକେଟ ଦଳ ଇଂଲଣ୍ଡ ଗସ୍ତରେ ଶହିତ ଆଫ୍ରିଦି ଫାଉଣ୍ଡେଶନର ଲୋଗୋ ବ୍ୟବହାର କରିବ। ପାକିସ୍ତାନ କ୍ରିକେଟରମାନେ ଆଗାମୀ ଇଂଲଣ୍ଡ ବିପକ୍ଷ ସିରିଜରେ ସେମାନଙ୍କ ଜର୍ସି ଉପରେ ଏହି ଲୋଗୋ ଲଗାଇବେ ପାକିସ୍ତାନ କ୍ରିକେଟ ବୋର୍ଡ (ପିସିବି) ତରଫରୁ କୁହାଯାଇଛି। ଏହି ପାଉଣ୍ଡେଶନ ଏକ ଚ୍ୟାରିଟି ସଂସ୍ଥା। ଏହାକୁ ସମର୍ଥନ ଜଣାଇଥିବାରୁ ପିସିବି ଓ ଏହାର ବରିଷ୍ଠ ପ୍ରଶାସନ ଓ୍ବାସିମ ଖାନ୍ଙ୍କୁ ଟୁଇଟ୍ କରି ଆଫ୍ରିଦି କୃତଜ୍ଞତା ଜଣାଇଛନ୍ତି। କୋଭିଡ୍-୧୯ ମହାମାରୀ ଦ୍ୱାରା ପିସିବି ମଧ୍ୟ ଗୁରୁତର ଭାବେ ପ୍ରଭାବିତ ହୋଇଛି।
ପ୍ରାୟୋଜନ ଚୁକ୍ତି ନେଇ ଏକ ମଲ୍ଟି ନ୍ୟାଶନାଲ କମ୍ପାନୀ ସହ କଥାବର୍ତ୍ତା ହୋଇଛି। ଦଳର ନୂଆ ସ୍ପୋନ୍ସରଶିପ୍ ଲୋଗୋ ଡିଲ୍ ନେଇ ଏହି କମ୍ପାନୀ ଉତ୍ସାହ ଦେଖାଇଛି। ତେବେ ଆବଶ୍ୟକୀୟ ଅର୍ଥ ଦେବାରେ ଏହି କମ୍ପାନୀ ଅସମର୍ଥ ରହିଛି ବୋଲି ପିସିବିର ଜଣେ କର୍ମକର୍ତ୍ତା କହିଛନ୍ତି। ଫଳରେ ଆଫ୍ରିଦିଙ୍କ ଫାଉଣ୍ଡେଶନର ଲୋଗୋ ବ୍ୟବହାର କରାଯିବାକୁ ନିଷ୍ପତ୍ତି ନିଆଯାଇଛି ବୋଲି ବୋର୍ଡ ତରଫୁ କୁହାଯାଇଛି। ଏହି ଗସ୍ତରେ ପାକିସ୍ତାନ ୩ଟି ଲେଖାଏ ଟେଷ୍ଟ ଓ ଟି୨୦ ମ୍ୟାଚ ଖେଳିବ। ଅଗଷ୍ଟ ୫, ୧୩ ଓ ୨୧ ତାରିଖରରେ ଟେଷ୍ଟଗୁଡିକ ଖେଳାଯିବ। ସେହିପରି ଟି୦ ମ୍ୟାଚ୍ଗୁଡିକ ଅଗଷ୍ଟ ୨୮, ୩୦ ଓ ସେପ୍ଟେମ୍ବର ୧ ତାରିଖରେ ଖେଳାଯିବ।
