ପାଟଣା,୯।୯(ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ବ୍ଲକ୍ର ତୁରୁମୁଙ୍ଗା ବଜାର ଦେଇ ଯାଇଥିବା ୪୯ ନମ୍ବର ଜାତୀୟ ରାଜପଥ କଡ଼ରୁ ବୁଧବାର ବ୍ୟାପକ ଜବରଦଖଲ ଉଚ୍ଛେଦ କରାଯାଇଛି। ପ୍ରଶାସନ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ୨ଟି ଜେସିବି ସହାୟତାରେ ରାଜପଥ କଡ଼ରେ ଥିବା ବେଆଇନ ଦୋକାନ ଓ ଅନ୍ୟାନ୍ୟ ଅସ୍ଥାୟୀ ନିର୍ମାଣକୁ ହଟାଇ ଦିଆଯାଇଛି।
ଉଚ୍ଛେଦ ପ୍ରକ୍ରିୟା ପୂର୍ବରୁ ପ୍ରଶାସନ ପକ୍ଷରୁ ରାଜପଥ କଡ଼ର ବ୍ୟବସାୟୀମାନଙ୍କୁ ପୂର୍ବରୁ ନୋଟିସ୍ ଓ ସୂଚନା ଦିଆଯାଇଥିଲା। ବୁଧବାର ମାଜିଷ୍ଟ୍ରେଟ୍ ଭାବେ ପାଟଣା ତହସିଲଦାର ଅଶ୍ୱିନୀ କୁମାର ନାଏକଙ୍କ ପ୍ରତ୍ୟକ୍ଷ ଉପସ୍ଥିତିରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା। ଏହି ଉଚ୍ଛେଦ ସମୟରେ ଅତିରିକ୍ତ ତହସିଲଦାର ଶରଣ ଜେନା, ଏନ୍ଏଚ୍ଏଆଇ (NHAI) ଯନ୍ତ୍ରୀ ଶୁଭାଶିଷ ସାହୁଙ୍କ ସମେତ ପୋଲିସ ଫୋର୍ସ ମୋତାୟନ ହୋଇଥିଲେ।
ଏନ୍ଏଚ୍ଏଆଇ ପକ୍ଷରୁ ମିଳିଥିବା ସୂଚନା ଅନୁସାରେ, ଆଗାମୀ ଦିନରେ ମୟୂରଭଞ୍ଜ ଜିଲାର ସିଙ୍ଗିଡ଼ାରୁ ବିଞ୍ଜବାହାଳ ପର୍ଯ୍ୟନ୍ତ ପ୍ରାୟ ୧୦୪ କିଲୋମିଟର ଦୀର୍ଘ ଜାତୀୟ ରାଜପଥ କଡ଼ରେ ଥିବା ସମସ୍ତ ଜବରଦଖଲକୁ ମଧ୍ୟ ସମ୍ପୂର୍ଣ୍ଣ ସାଫ୍ କରାଯିବ।
ଅନ୍ୟପଟେ, ଦୀର୍ଘ ଦିନ ଧରି ରାଜପଥ କଡ଼ରେ ଦୋକାନ କରି ପରିବାର ପ୍ରତିପୋଷଣ କରୁଥିବା କ୍ଷୁଦ୍ର ବ୍ୟବସାୟୀମାନଙ୍କ ପାଇଁ ଏହି ଉଚ୍ଛେଦ ବଡ଼ ଚିନ୍ତାର କାରଣ ପାଲଟିଛି। ଦୋକାନ ଭଙ୍ଗାଯିବା ପରେ ଜୀବିକା ହରାଇଥିବା ବ୍ୟବସାୟୀମାନେ ନିଜର ପରିବାର ଚଳାଇବା ନେଇ ଆଶଙ୍କା ପ୍ରକାଶ କରିବା ସହ ତୁରନ୍ତ ବିକଳ୍ପ ଥଇଥାନ ପାଇଁ ପ୍ରଶାସନ ନିକଟରେ ଦାବି କରିଛନ୍ତି। ଏହି ମାମଲାରେ ପାଟଣା ତହସିଲଦାର ଅଶ୍ୱିନୀ କୁମାର ନାଏକ ପ୍ରତିକ୍ରିୟା ଦେଇ କହିଛନ୍ତି ଯେ, କ୍ଷତିଗ୍ରସ୍ତ ବ୍ୟବସାୟୀମାନଙ୍କ ପାଇଁ ପ୍ରଶାସନ ପକ୍ଷରୁ ବିକଳ୍ପ ବ୍ୟବସ୍ଥା କରାଯିବ।