ପୁରୀ ଅଫିସ,୧୧।୯: ପୁରୀ ଅର୍ବାନ କୋଅପରେଟିଭ ବ୍ୟାଙ୍କର ମାର୍କେଟ ଛକସ୍ଥିତ ଶାଖା କାର୍ଯ୍ୟାଳୟ ଲକରରୁ ୪୩ ହଜାର ଟଙ୍କା ଚୋରି ଅଭିଯୋଗ ହୋଇଛି। ଖୋଳତାଡ଼ ପରେ ଜଣେ ଚତୁର୍ଥ ଶ୍ରେଣୀ କର୍ମଚାରୀ ଏହି ଟଙ୍କା ନେଇଥିବା ଜଣାପଡ଼ିବା ପରେ ତାଙ୍କୁ ଚାକିରିରୁ ବହିଷ୍କୃତ କରାଯାଇଛି। ଏହି ବ୍ୟାଙ୍କର ଏକ ଲକରରୁ ୧୦ ଟଙ୍କିଆ କଏନର ୪୩ ହଜାର ଟଙ୍କା ଚୋରି ହୋଇଯାଇଥିବା ବୁଧବାର ଜଣାପଡିଥିଲା। ଏ ନେଇ ବ୍ୟାଙ୍କର ସଭାପତି ଦାୟିତ୍ୱରେ ଥିବା ଅତିରିକ୍ତ ଜିଲାପାଳଙ୍କୁ ଅବଗତ କରାଯାଇଥିଲା। ଅତିରିକ୍ତ ଜିଲାପାଳ ମୁଖ୍ୟ ଶାଖାର ସମ୍ପାଦକଙ୍କୁ ଏହାର ତଦନ୍ତ କରି ଜଣାଇବା ସହ ନିଜେ ମଧ୍ୟ ଅନୁଧ୍ୟାନ କରିଥିଲେ। ତଦନ୍ତ ବେଳେ ବ୍ୟାଙ୍କର ଜଣେ ଚତୁର୍ଥ ଶ୍ରେଣୀ କର୍ମଚାରୀ ଲକର ଚାବି ପାଇ ସେଥିରୁ ଟଙ୍କା ନେଇଥିବା ଜଣାପଡିଥିଲା। ଉକ୍ତ କର୍ମଚାରୀ ଟଙ୍କା ଫେରାଇ ଥିବାବେଳେ ତାଙ୍କୁ ଚାକିରିରୁ ବହିଷ୍କାର କରାଯାଇଥିବା ଅତିରିକ୍ତ ଜିଲାପାଳ ପ୍ରଦୀପ ସାହୁ କହିଛନ୍ତି।
