ଭୁବନେଶ୍ୱର,୮।୧୨: ବର୍ତ୍ତମାନ ସମୟରେ ଗୋପାଳନ ସଂଖ୍ୟା ହ୍ରାସ ପାଉଥିବାରୁ ଅନେକ ପ୍ରକାର ସମସ୍ୟା ଦେଖାଦେଉଛି। ବିଶେଷ କରି ଗୋସମ୍ପଦ ଓ ଉତ୍ପାଦର ପରିମାଣର ହ୍ରାସ ପାଇବାରେ ଲାଗିଛି। ଏପରିକି ଗୋପାଳନ ସହ ଦୁଗ୍ଧ ଉତ୍ପାଦନ ଓ ବଜାର ଉପଯୋଗିତାକୁ ଗୁରୁତ୍ୱ ଦେବାକୁ ଡ. ଦିଲୀପ ରଥ ଏକ ଗବେଷଣାତ୍ମକ କର୍ମଶାଳାରେ ମତପ୍ରକାଶ କରିଛନ୍ତି। ଉଲ୍ଲେଖଯୋଗ୍ୟ , ଇନଖଷ୍ଟିଚ୍ୟୁ୍ଟ ଅଫ୍ ରୁରାଲ ମ୍ୟାନେଜମେଣ୍ଟ ଆନନ୍ଦର ଅଧ୍ୟକ୍ଷ ଦିଲୀପ ରଥଙ୍କୁ ନିକଟରେ ଗୁଜରାଟର ସର୍ଦ୍ଦାର ପଟେଲ ବିଶ୍ୱବିଦ୍ୟାଳୟ ବଲ୍ଲଭ ବିଦ୍ୟାନଗର ଦ୍ୱାରା ମ୍ୟାନେଜମେଣ୍ଟରେ ପିଏଚ୍.ଡି. ଡିଗ୍ରୀ ପ୍ରଦାନ କରାଯାଇଛି।
ତାଙ୍କର ଗବେଷଣା ବିଷୟ ଥିଲା ‘ଭାରତର ଚୟନିତ ଅଞ୍ଚଳରେ ଉପତ୍ାଦକ ଅନୁଷ୍ଠାନ ଓ ନୀତି ପରିବେଶକୁ ସକ୍ଷମ କରି ଡେରୀ ବିକାଶ ଜରିଆରେ ଜୀବିକା ସୃଷ୍ଟି କରିବା’ ଗ୍ରାମୀଣ ଦୁଗ୍ଧଚାଷୀଙ୍କ ଜୀବିକା ସମସ୍ୟାକୁ ପରିଚାଳନା କରିବାରେ ଉକ୍ତ ଗବେଷଣା ବେଶ୍ ସହାୟକ ହେବ। ରଥଙ୍କ ଅନୁସନ୍ଧାନ ଗ୍ରାମୀଣ ଜୀବିକାର ଉତ୍ସ ତଥା ଦୁଗ୍ଧ ଉପତ୍ାଦନକାରୀଙ୍କ ପାଇଁ ନ୍ୟାୟପୂର୍ଣ୍ଣ ତଥା ସ୍ବଚ୍ଛ ଆନୁଷ୍ଠାନିକ ସରଞ୍ଚନାର ଆବଶ୍ୟକତା ଭାବେ ଗୁରୁତ୍ୱ ଦେବ। ଗତ ଦଶନ୍ଧି ମଧ୍ୟରେ ଦୁଗ୍ଧ ବିକାଶ ସହ ତାଙ୍କର କାର୍ଯ୍ୟଧାରା ଅନୁଭୂତିରୁ ସେ ବହୁ ମହତ୍ତ୍ୱପୂର୍ଣ୍ଣ ତଥ୍ୟ ମଧ୍ୟ ଉପସ୍ଥାପନ କରିଛନ୍ତି। ଉଲ୍ଲେଖଯୋଗ୍ୟ, ଉଚ୍ଚତର ଶିକ୍ଷା ଶେଷ ପରେ ରଥ ୧୯୭୯ରେ ଭାରତୀୟ ପ୍ରଶାସନିକ ସେବାରେ ଯୋଗ ଦେଇଥିଲେ। ପରବର୍ତ୍ତୀ ସମୟରେ ସେ ପଶ୍ଚିମବଙ୍ଗ, ଓଡ଼ିଶା ସମେତ କେନ୍ଦ୍ର ସରକାରଙ୍କ ନିକଟରେ ମଧ୍ୟ ଦୀର୍ଘ ବର୍ଷ କାର୍ଯ୍ୟ କରିଛନ୍ତି।
ପୂର୍ବରୁ ସେ ଏନ୍ଡିଡିବି ବୋର୍ଡର ଅଧ୍ୟକ୍ଷ ଥିଲେ। ଏହା ସହ ମଦର ଡେରୀ ଫ୍ରୁଟ୍ ଓ ଭେଜିଟେବୁଲ ପ୍ରା.ଲିଃ, ଇଣ୍ଡିଆନ ଇମ୍ୟୁନୋଲୋଜିକାଲ ଲିଃ, ଏନ୍ଡିଡିବି ଡେରୀ ସର୍ଭିସେସ୍, ଆଇଡିଏମସି ଲିଃ ଓ ପ୍ରିଷ୍ଟାଇନ ବାୟୋଲୋଜିକାଲ ଲିଃରେ କାର୍ଯ୍ୟ ମଧ୍ୟ କରିଛନ୍ତି। ରଥ ଇନ୍ଷ୍ଟିଚ୍ୟୁଟ୍ ଅଫ୍ ରୁରାଲ ମ୍ୟାନେଜମେଣ୍ଟ ଆନନ୍ଦରେ ୨୦୧୭ ଠାରୁ ଯୋଗଦେଇ ଚେୟାରମ୍ୟାନ ଭାବେ କାର୍ଯ୍ୟ କରୁଛନ୍ତି। ତାଙ୍କ ରଚିତ ଅନେକ ମୂଲ୍ୟବାନ୍ ପୁସ୍ତକ ବହୁ ଆଦୃତି ଲାଭ କରିଛି।
