ବେଜିଂ: ଚାଇନାର ଏକ କମ୍ପାନୀରେ କାର୍ଯ୍ୟରତ ଜଣେ ମହିଳାଙ୍କୁ ଆଲିଙ୍ଗନ କରିବା ତାଙ୍କ ସହକର୍ମୀଙ୍କୁ ମହଙ୍ଗା ପଡ଼ିଛି। ଯୁବକ ଜଣକ ମହିଳାଙ୍କୁ ଜୋର୍ରେ ଜାବୁଡ଼ି ଧରିବା ଫଳରେ ତାଙ୍କ କଙ୍କାଳର ୩ଟି ହାଡ଼ ଭାଙ୍ଗିଯାଇଥିଲା। ଏହାକୁ ନେଇ ସମ୍ପୃକ୍ତା ମହିଳା କୋର୍ଟଙ୍କ ଦ୍ୱାରସ୍ଥ ହେବା ପରେ ଯୁବକ ଜଣଙ୍କୁ ୧୫ ଶହ ଡଲାର (ପ୍ରାୟ ୧ ଲକ୍ଷ ୨୦ ହଜାର ଟଙ୍କା) ଜରିମାନା ନିର୍ଦ୍ଦେଶ ଦିଆଯାଇଛି। ରିପୋର୍ଟ ଅନୁସାରେ, ଗତ ବର୍ଷ ମହିଳା ଜଣକ ଅଫିସ୍ରେ ଥିବାବେଳେ ତାଙ୍କ ସହକର୍ମୀ ସେଠାରେ ତାଙ୍କୁ ଜୋର୍ରେ ଆଲିଙ୍ଗନ କରିଥିଲେ। ମହିଳା ଜଣକ ଯନ୍ତ୍ରଣାରେ ଚିତ୍କାର କରିଥିଲେ। ଘରୋଇ ଚିକିତ୍ସାରେ ଯନ୍ତ୍ରଣା ନ କମିବାରୁ ସେ ଡାକ୍ତରଖାନା ଯାଇଥିଲେ। ଏକ୍ସ-ରେ କରିବା ପରେ ତାଙ୍କ କଙ୍କାଳରେ ୩ଟି ହାଡ଼ ଭାଙ୍ଗିଯାଇଥିବା ଜାଣିବାକୁ ପାଇଥିଲେ। ଏଥିରୁ ସୁସ୍ଥ ହେବା ପାଇଁ ତାଙ୍କୁ ଅନେକ ଦିନ ଲାଗିଥିଲା। ଏଥିନିମନ୍ତେ ମହିଳା ଜଣକ ଅଫିସ୍ରୁ ଛୁଟି ନେଇଥିଲେ। ଫଳରେ ତାଙ୍କ ଦରମା ମଧ୍ୟ କଟିଥିଲା। ମେଡିକାଲ ଖର୍ଚ୍ଚ, ଦରମା କଟିବା ଆଦିର କ୍ଷତିପୂରଣ ପାଇଁ ମହିଳା ଜଣକ କିଛିଦିନ ତଳେ କୋର୍ଟଙ୍କ ଦ୍ୱାରସ୍ଥ ହୋଇଥିଲେ। ମାମଲାର ଶୁଣାଣି କରି ଚାଇନା କୋର୍ଟ ଯୁବକ ଜଣଙ୍କୁ ଉପରୋକ୍ତ ନିର୍ଦ୍ଦେଶ ଦେଇଛନ୍ତି।
