ଓ୍ବାଶିଂଟନ,୩୧।୮: ବିଲିୟନେୟାର ବ୍ୟବସାୟୀ ଏଲୋନ ମସ୍କ ଗତ ବର୍ଷ ଟୁଇଟର ଗ୍ରହଣ କରିବା ଦିନଠାରୁ ସେ ଅନେକ ପରିବର୍ତ୍ତନ କରିଛନ୍ତି। ପ୍ରଥମେ ସୋସିଆଲ ମିଡିଆ ପ୍ଲାଟଫର୍ମର ନାମ ପରିବର୍ତ୍ତନ କରାଯାଇଥିଲା। ସେମାନେ ଏହାର ନାମ ଟୁଇଟରରୁ ଏକ୍ସକୁ ପରିବର୍ତ୍ତନ କରିଛନ୍ତି। ବର୍ତ୍ତମାନ ସେ ମେଟାର ସମସ୍ତ ପ୍ଲାଟଫର୍ମ ସହିତ ଏକକ ଭାବରେ ପ୍ରତିଦ୍ୱନ୍ଦ୍ୱିତା କରିବାକୁ ପ୍ରସ୍ତୁତ। ଏହି କ୍ରମରେ ସେ ଏକ ବଡ଼ ଘୋଷଣା କରିଛନ୍ତି।
ସୂଚନାଯୋଗ୍ୟ, ହ୍ବାଟସଆପ, ଇନଷ୍ଟାଗ୍ରାମ ଓ ଫେସବୁକ ପରି ଏବେ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଭିଡିଓ ଓ ଅଡିଓ କଲ କରିହେବ। ଏହାର ସୂଚନା ନିଜେ ପ୍ରତିଷ୍ଠିତ ବ୍ୟବସାୟୀ ଏଲନ ମସ୍କ ଦେଇଛନ୍ତି। ସେ ଏହା ମଧ୍ୟ କହିଛନ୍ତି ଏହି ଫିଚର କେଉଁଠି କେଉଁଠି କାମ କରିବ।
ସେ କହିଛନ୍ତି ଯେ ସମସ୍ତ ପ୍ରକାର ଫୋନ ଏବଂ ଲାପଟପ ନୂତନ ଫିଚରର ଲାଭ ଉଠାଇ ପାରିବେ। ଏହି ଫିଚର ଆଣ୍ଡ୍ରଏଡ, ଆଇଓଏସ ଏବଂ ଲାପଟପରେ ସହଜରେ ବ୍ୟବହାର କରାଯାଇପାରିବ। ଏଥି ସହିତ, ଭିଡିଓ ଏବଂ ଅଡିଓ କଲ ପାଇଁ କାହାର ଫୋନ ନମ୍ବର ଜାଣିବାର ଆବଶ୍ୟକତା ନାହିଁ। ଲୋକମାନେ ନମ୍ବର ଜାଣି ନ ଥିଲେ ମଧ୍ୟ ଏକ୍ସ ମାଧ୍ୟମରେ ପରସ୍ପର ସହ କଥାବାର୍ତ୍ତା କରିବାକୁ ସମର୍ଥ ହେବେ।।
