ଜୋହାନ୍ସବର୍ଗ,୫।୧: ସ୍ଥାନୀୟ ଓ୍ବାଣ୍ଡରର୍ସ ଷ୍ଟାଡିୟମରେ ଚାଲିଥିବା ନ୍ୟୁ ଇୟର ଟେଷ୍ଟରେ ଭାରତୀୟ ବୋଲର ଉଇକେଟ ଲାଗି ସଂଘର୍ଷ କରୁଛନ୍ତି। ଦକ୍ଷିଣ ଆଫ୍ରିକା ଆଗରେ ୨୪୦ ରନ୍ର ଟାର୍ଗେଟ ଛିଡ଼ା କରିଥିବା ଭାରତୀୟ ଦଳ ତୃତୀୟ ଦିନରେ ୧୧୮ ରନ୍ ଖର୍ଚ୍ଚ କରି କେବଳ ୨ ଉଇକେଟ ହାତେଇ ପାରିଛି। ଫଳରେ ମ୍ୟାଚ୍ରେ ବର୍ତ୍ତମାନ ସୁଦ୍ଧା ଲୋକେଶ ରାହୁଲଙ୍କ ନେତୃତ୍ୱାଧୀନ ଦଳଠାରୁ ଆଗରେ ରହିଛି ଘରୋଇ ଦଳ। ଦକ୍ଷିଣ ଆଫ୍ରିକାକୁ ମ୍ୟାଚ୍ ଜିତିବା ପାଇଁ ବଳକା ୮ ଉଇକେଟରେ ୧୨୨ ରନ୍ ଦରକାର। ଆଉ ଘରୋଇ ଦଳର ଅଧିନାୟକ ଡିନ ଏଲଗାର ୪୬ ଓ ଭାନ ଡର ଡୁସେନ ୧୧ ରନ୍ କରି କ୍ରିଜ୍ରେ ଅଛନ୍ତି।
ଗୁରୁବାର ସକାଳୁ ଉଇକେଟ ପଡ଼ିବାର ସମ୍ଭାବନା କମ୍। କାରଣ ଓ୍ବାଣ୍ଡରର୍ସ ଏହି ପିଚ୍ରେ ଓଜନିଆ ରୋଲର ବ୍ୟବହାର ପରେ ବୋଲରଙ୍କୁ କୌଣସି ପିଚ୍ରୁ କୌଣସି ଫାଇଦା ମିଳୁ ନାହିଁ।
ପୂର୍ବରୁ ପ୍ରଥମ ଇନିଂସରେ ଭାରତ ୨୦୨ ରନ୍ କରିଥିବା ବେଳେ ଠାକୁରଙ୍କ ଚମତ୍କାର ବୋଲିଂ ପ୍ରଦର୍ଶନ କାରଣରୁ ଘରୋଇ ଦକ୍ଷିଣ ଆଫ୍ରିକା ୨୨୯ ରନ୍ରେ ଅଲଆଉଟ୍ ହୋଇଯାଇଥିଲା। ଅସମାପ୍ତ ଦ୍ୱିତୀୟ ପାଳି ସ୍କୋର (୮୫/୨)ରୁ ବ୍ୟାଟିଂ ଆରମ୍ଭ କରିଥିବା ଟିମ୍ ଇଣ୍ଡିଆକୁ ତୃତୀୟ ଦିନରେ ଭଲ ଆରମ୍ଭ ଦେଇଥିଲେ ଅଜିଙ୍କ୍ୟ ରାହାନେ ଓ ଚେତେଶ୍ୱର ପୂଜାରା। ପ୍ୟାଭେଲିଅନ ଫେରିବା ପୂର୍ବରୁ ଦୁହେଁ ଅର୍ଦ୍ଧଶତକ ପୂରଣ କରିବା ସହ ୩ୟ ଉଇକେଟ ପାଇଁ ଯୋଡ଼ିଥିଲେ ୧୧୧ ରନ୍। ମାତ୍ର ଏହାପରେ ଟିମ୍ ଇଣ୍ଡିଆ କ୍ରମାଗତ ବ୍ୟବଧାନରେ ୪ ଉଇକେଟ ହରାଇଥିଲା। ଏଭଳି ସ୍ଥିତିରେ ବିସ୍ଫୋରକ ୨୮ (୫ ଚୌକା ଓ ୧ ଛକା) ରନ୍ ପାଳି ଖେଳିଥିଲେ ଠାକୁର। ହନୁମା ବିହାରୀଙ୍କ ଅପରାଜିତ ୪୦ (୬ ଚୌକା) ରନ୍ର ଇନିଂସ ଯୋଗୁ ଭାରତ ୨୬୬ ରନ୍ କରିବାକୁ ସକ୍ଷମ ହୋଇଥିଲା। ଘରୋଇ ଦଳ ପକ୍ଷରୁ କାଗିସୋ ରବାଡା, ମାର୍କୋ ଜାନସେନ ଓ ଲୁଙ୍ଗି ଏନ୍ଗିଡି ୩ ଲେଖାଏ ଉଇକେଟ ନେଇଥିଲେ।
