ଟିଟିଲାଗଡ଼, ୧/୯ (ସଞ୍ଜୟ କୁମାର ବେହେରା): ବଲାଙ୍ଗୀର ଜିଲା ଟିଟିଲାଗଡ଼ ସହରରେ ହାତୀ ଆତଙ୍କ ଦେଖାଦେଇଛି। ସୋମବାର ସକାଳୁ ଟିଟିଲାଗଡ଼ ସହରର ମାଳଗୋଦାମପଡ଼ା ନିକଟସ୍ଥ ରେଳ ଲାଇନ କଡ଼ରେ ଏକ ହାତୀ ଥିବା ଦେଖିବାକୁ ମିଳିଥିଲା। ଟିଟିଲାଗଡ଼ ରେଳୱେ ରନିଂ ରୁମ୍ ଓ ରେଳୱେ ବିଭାଗର ସହାୟକ ଦୂରସଞ୍ଚାର ଯନ୍ତ୍ରୀ କାର୍ଯ୍ୟାଳୟ ସମ୍ମୁଖରେ ହାତୀଟି ରହିଥିବା ବେଳେ ପରେ ରେଳ ଧାରଣା ନିକଟରେ ଥିବା ବୁଦାମୂଳ ଭିତରକୁ ପଶିଯାଇଥିଲା।
ଘଟଣାସ୍ଥଳରେ ଟିଟିଲାଗଡ଼ ବନ ବିଭାଗ, ଟିଟିଲାଗଡ଼ ପୋଲିସ, ଆର୍ପିଏଫ୍ ଓ ଜିଆର୍ପି ବିଭାଗର କର୍ମଚାରୀଙ୍କ ସମେତ ବନ ବିଭାଗର ସ୍ୱତନ୍ତ୍ର ହାତୀ ଉଦ୍ଧାରକାରୀ ଦଳ ପହଞ୍ଚିଛନ୍ତି। ଟିମ୍ ପକ୍ଷରୁ ହାତୀର ଗତିବିଧି ଉପରେ ନଜର ରଖାଯାଇଛି।
ସୂଚନାଯୋଗ୍ୟ, ଗତକାଲି ଏକ ହାତୀପଲ ଟିଟିଲାଗଡ଼ ସହର ନିକଟସ୍ଥ ବୁର୍ଡିପଡ଼ା ଗାଁ ଜଙ୍ଗଲରେ ରହିଥିଲା। ଉକ୍ତ ହାତୀପଲରୁ ଗୋଟିଏ ହାତୀ ଗୋଷ୍ଠୀରୁ ଅଲଗା ହୋଇ ଟିଟିଲାଗଡ଼ ସହର ଭିତରକୁ ପ୍ରବେଶ କରିଥିବା ଜଣାପଡ଼ିଛି। ହାତୀଟି ଆକାରରେ ସାମାନ୍ୟ ଛୋଟ ଥିବା ଦେଖିବାକୁ ମିଳିଛି।
ଏହି ସମୟରେ ହାତୀକୁ ଘଉଡ଼ାଇବାକୁ ଯାଇ ଟିଟିଲାଗଡ଼ ସହରର ସର୍ଗିଗୁଡ଼ା ଅଞ୍ଚଳର ସୁଧୀର ସାହୁ ଗୁରୁତର ଆହତ ହୋଇଛନ୍ତି। ସ୍ଥାନୀୟ ଯୁବକମାନେ ତାଙ୍କୁ ହାତୀ କବଳରୁ ଉଦ୍ଧାର କରି ଚିକିତ୍ସା ପାଇଁ ଟିଟିଲାଗଡ଼ ମୁଖ୍ୟ ଡାକ୍ତରଖାନାକୁ ପଠାଇଥିଲେ।ବନ ବିଭାଗ ପକ୍ଷରୁ କୁହାଯାଇଛି ଯେ, ହାତୀକୁ ଘଉଡ଼ାଇବା ପାଇଁ ଲୋକମାନଙ୍କୁ ବାରଣ କରାଯାଇଥିଲା। ତେବେ ଏହାକୁ ଅମାନ୍ୟ କରି ଯୁବକ ଜଣକ ହାତୀ ନିକଟକୁ ଯାଇଥିବାରୁ ଏଭଳି ଅଘଟଣ ଘଟିଛି।ହାତୀକୁ ଘଉଡ଼ାଇବା ପାଇଁ କେହି ତା’ ନିକଟକୁ ନ ଯିବାକୁ ବନ ବିଭାଗ ପକ୍ଷରୁ ଅନୁରୋଧ କରାଯାଇଛି। ଏଥିସହ ଡାକଯନ୍ତ୍ର ମାଧ୍ୟମରେ ସ୍ଥାନୀୟ ଲୋକଙ୍କୁ ସଚେତନ କରାଯାଉଛି।
