କେନ୍ଦୁଝର,୨୪।୫(ସ୍ବ.ପ୍ର.) ହାତୀମାନଙ୍କ ସୁରକ୍ଷା ପାଇଁ ବନ ବିଭାଗ ପକ୍ଷରୁ ବ୍ୟାପକ ପଦକ୍ଷେପ ନିଆଯାଉଛି। ଜଙ୍ଗଲାଞ୍ଚଳ ଦେଇ ଯାଇଥିବା ରାଜପଥ ଓ ଜାତୀୟ ରାଜପଥରେ ସୂଚନା ଫଳକ ଦର୍ଶାଇ ଯାତାୟାତ କରୁଥିବା ଲୋକ ଓ ଚାଳକଙ୍କୁ ସତର୍କ କରାଯାଉଛି। ଏଭଳି ସୂଚନା ଫଳକ ଏନ୍ଏଚ୍ ୪୯ର ବେଲଦା ଘାଟି ନିକଟରେ ଲାଗିଛି। ତେବେ ଏହି ଘାଟି ରାସ୍ତାରେ ହାତୀ ପଲ ଏପାଖରୁ ସେପାଖ ନିୟମିତ ଯାତାୟାତ କରନ୍ତି। ତେବେ ଏନ୍ଏଚ୍ ପ୍ରଶସ୍ତିିକରଣ ଫଳରେ ଏବଂ ବହୁ ସଂଖ୍ୟାରେ ଗାଡ଼ି ଚଳାଚଳ କରୁଥିବାରୁ ହାତୀମାନେ ରାସ୍ତା ପାର ହେବା ବେଳେ ବିଚଳିତ ହୋଇ ଗାଁଗଣ୍ଡାରେ ପ୍ରବେଶ କରି ଉପଦ୍ରବ କରୁଛନ୍ତି। ତେବେ ବନ ବିଭାଗ ପକ୍ଷରୁ ସେମାନଙ୍କ ସୁରକ୍ଷିତ ଯାତାୟାତ ପାଇଁ ଏକ ଅଣ୍ଡରପାସ ନିର୍ମାଣ କରାଯାଇଥିଲେ ହେଁ ଚଲାପଥଠାରୁ ଦୂରରେ ନିର୍ମାଣ କରାଯାଇଥିବା ଏବଂ ସେଠାକୁ ଯିବା ପାଇଁ ପାହାଡ଼ ରାସ୍ତା ଥିବାରୁ ଅନେକ ସମୟରେ ହାତୀମାନଙ୍କ ଯାତାୟାତରେ ସମସ୍ୟା ସୃଷ୍ଟି ହେଉଥିବା ସ୍ଥାନୀୟ ଲୋକେ କହିଛନ୍ତି।
ଉକ୍ତ ସ୍ଥାନରେ ଯାତାୟାତ କରୁଥିବା ଲାଇନ ଟ୍ରକ୍, ଟ୍ରେଲର ଆଦିଙ୍କ ପାର୍କିଂ ପାଇଁ ହାଇଓ୍ବେ ନିର୍ମାଣ କରାଯାଇଥିବାରୁ ରାସ୍ତା ଅଧିକ ପ୍ରଶସ୍ତ ହୋଇଥିବାରୁ ହାତୀମାନେ ରାସ୍ତା ଅତିକ୍ରମ କରିପାରୁ ନାହାନ୍ତି। ଏହାବ୍ୟତୀତ ଉକ୍ତ ରାସ୍ତାରେ ବହୁ ସଂଖ୍ୟାରେ ଉଜ୍ଜ୍ୱଳ ଆଲୋକ ଲଗାଯାଇଥିବାରୁ ହାତୀମାନେ ରାତିରେ ପଥଭ୍ରଷ୍ଟ ହୋଇପଡୁଛନ୍ତି। ଏଣୁ ରାସ୍ତା ନିର୍ମାଣ ସମୟରେ ଏସବୁ ଦିଗକୁ ଦୃଷ୍ଟି ଦିଆଯିବା ଜରୁରୀ ଥିଲା। ଯାହାଫଳରେ ହାତୀମାନେ ଅନ୍ଧାର ରାତିରେ ସୁରକ୍ଷିତ ଭାବେ ଗୋଟିଏ ଜଙ୍ଗଲରୁ ଅନ୍ୟ ଜଙ୍ଗଲକୁ ଯାତାୟାତ କରିପାରିଥାନ୍ତେ ବୋଲି ପରିବେଶବିତ ଡ. ବିମ୍ବାଧର ବେହେରା କହିଛନ୍ତି ା
ସୂଚନାଯୋଗ୍ୟ, କେନ୍ଦୁଝର ଜିଲା ଦେଇ ଜଙ୍ଗଲ ଓ ପାହାଡ଼ ଅଞ୍ଚଳ ମଧ୍ୟରେ ବ୍ୟସ୍ତବହୁଳ ଦୁଇଟି ଜାତୀୟ ରାଜପଥ ଯାଇଛି। ରାସ୍ତା ପ୍ରଶସ୍ତିକରଣ ଯୋଗୁ ହାତୀ ଚଲାପଥ ସବୁ ନଷ୍ଟ ହୋଇଯାଇଛି ା ଫଳରେ ହାତୀମାନେ ପଥଭ୍ରଷ୍ଟ ହୋଇ ଏଣେ ତେଣେ ଯାତାୟାତ କରି ଉପଦ୍ରବ କରୁଛନ୍ତି ା ଉପଯୁକ୍ତ ପରାମର୍ଶ ନ ନେଇ ଏଭଳି ରାସ୍ତା ନିର୍ମାଣ ଓ ଅଣ୍ଡରପାସ ନିର୍ମାଣ ହୋଇଥିବାରୁ ହାତୀମାନଙ୍କ ପାଇଁ ସମସ୍ୟା ବଢୁଛି ବୋଲି ପରିବେଶବିତମାନେ ମତବ୍ୟକ୍ତ କରୁଛନ୍ତି। ବନ ବିଭାଗ ବିଭିନ୍ନ ସ୍ଥାନରେ ହାତୀ ଚଲାପଥ ଲିଖିତ ସୂଚନା ଫଳକ ମାରି ଦାୟିତ୍ୱ ଶେଷ କରୁଥିବା ବେଳେ ଏନେଇ ସ୍ବତନ୍ତ୍ର ପଦକ୍ଷେପ ନେବାକୁ ଦାବି ହେଉଛି।
