ଭଞ୍ଜନଗର,୧୦ା୫(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଘୁମୁସର ଉତ୍ତର ବନଖଣ୍ଡ ତାରସିଂ ରେଞ୍ଜର ଗାୟଗଣ୍ଡା ନିକଟରେ ମୃତ୍ୟୁବରଣ କରିଥିବା ଦନ୍ତାହାତୀଟି ରୋଗରୁ ମୃତ୍ୟୁ ହୋଇଥିବା ମୃତଦେହ ବ୍ୟବଚ୍ଛେଦରୁ ଜଣାପଡ଼ିଛି। ମୃତହାତୀର ବୟସ ପାଖାପାଖି ୧୦ ବର୍ଷ ହେବ। ରବିବାର ଜେଟିଏଫ୍ଟିମ୍ର ଉପସ୍ଥିତିରେ ହାତୀର ବ୍ୟବଚ୍ଛେଦ ହେବା ପରେ ତାହା ଜଣାପଡ଼ିଛି।
ଅପରପକ୍ଷେ ହାତୀର ମୃତ୍ୟୁକୁ ନେଇ ଲୋକେ ବିନା ପ୍ରମାଣରେ ଅପପ୍ରଚାର କରୁଛନ୍ତି। ଯାହାକୁ ନେଇ ବନବିଭାଗ ପକ୍ଷରୁ ଅସନ୍ତୋଷ ବ୍ୟକ୍ତ କରାଯାଇଛି। ଏହିଭଳି ଅପପ୍ରଚାରକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ବନବିଭାଗର ଜଣେ ଅଧିକାରୀ ଏଠାରେ ସୂଚନା ଦେଇଛନ୍ତି।
ଘଟଣାରୁ ପ୍ରକାଶ ଯେ, ହାତୀଟି ବିଗତ କିଛି ଦିନ ହେବ ଅସୁସ୍ଥ ରହି କେତେବେଳେ ନୟାଗଡ଼ ବନଖଣ୍ଡରେ କେତେବେଳେ ଘୁମୁସର ଉତ୍ତର ବନଖଣ୍ଡରେ ବୁଲୁଥିଲା। କିଛି ଦିନ ପୂର୍ବେ ନୟାଗଡ଼ ବନଖଣ୍ଡ ପକ୍ଷରୁ ନନ୍ଦନକାନନରୁ ଟିମ୍ ଆଣି ହାତୀର ଚିକିତ୍ସା କରାଯାଉଥିଲା। ଏଥିସହ ସମ୍ପୃକ୍ତ ଅଞ୍ଚଳର ପ୍ରାଣୀ ବିଶେଷଜ୍ଞଙ୍କୁ ଡାକି ହାତୀର ପ୍ରାଥମିକ ଚିକିତ୍ସା କରାଯାଇଥିଲା। ଏହାପରେ ହାତୀଟି ସାମାନ୍ୟ ସୁସ୍ଥ ହେବା ପରେ ବିଭାଗୀୟ କର୍ମଚାରୀ ହାତୀ ଉପରେ ଆଉ ଠିକ୍ ଭାବେ ନଜର ରଖି ପାରି ନ ଥିଲେ। ଫଳରେ ହାତୀ ଘଞ୍ଚ ଜଙ୍ଗଲ ଭିତରକୁ ଚାଲି ଯାଇଥିଲା। ଶନିବାର ହାତୀର ମୃତଦେହ ଘୁମୁସର ଉତ୍ତର ବନଖଣ୍ଡରେ ଠାବ କରାଯାଇଥିଲା। ଅସୁସ୍ଥ ହାତୀଟି ସମ୍ପୂର୍ଣ୍ଣ ସୁସ୍ଥ ହୋଇ ନ ଥିବା ବେଳେ ତାକୁ ଜଙ୍ଗଲକୁ ଛାଡ଼ି ଦିଆଯିବା ଯୋଗୁ ଅକାଳରେ ହାତୀଟି ମୃତ୍ୟୁବରଣ କରିଥିବା ଆଶଙ୍କା କରାଯାଉଛି। ହାତୀର ବ୍ୟବଚ୍ଛେଦ ସମୟରେ ତାର ଶରୀରରେ କେଉଁଠି ଆଘାତ ଚିହ୍ନ ନାହିଁ। ପେଟ ଭିତରେ ଖାଦ୍ୟ ନଳୀଟି ଫାଟି ଯାଇଥିଲା। ଅତ୍ୟଧିକ ଖାଦ୍ୟ ଖାଇବା ଯୋଗୁ ଏହି ସମସ୍ୟା ହୋଇଥିବା ଆଶଙ୍କା କରାଯାଉଛି। ଏହାପରେ ଖାଦ୍ୟ ହଜମ ନ ହେବା ଯୋଗୁ ହାତୀଟି ଧିରେ ଧିରେ ଅସୁସ୍ଥ ହୋଇ ପଡ଼ିଥିଲା। ଏହାପରେ ତାକୁ ଆଉ ଉପଯୁକ୍ତ ଚିକିତ୍ସା ସୁବିଧା ଯୋଗାଇ ଦିଆଯାଇ ପାରି ନ ଥିଲା। ତେଣୁ ହାତୀଟି ଉପଯୁକ୍ତ ଚିକିତ୍ସା ଅଭାବ ଯୋଗୁ ମୃତ୍ୟୁବରଣ କରିଥିବା ଆଶଙ୍କା କରାଯାଉଛି।
ଜେଟିଏଫ୍ଟିମଏସ୍ପି ବଟକୃଷ୍ଠ ମିଶ୍ରଙ୍କ ଉପସ୍ଥିତିରେ ଜଗନ୍ନାଥପ୍ରସାଦ ବ୍ଲକ ପ୍ରାଣୀ ବିଶେଷଜ୍ଞ ଅଧିକାରୀ ଡ. ନିହାର ରଞ୍ଜନ ସାମନ୍ତରାୟ ବ୍ଲକ, ତାରସିଂ ପ୍ରାଣୀ ବିଶେଷଜ୍ଞ ଡ. ବିଭୂକଲ୍ୟାଣ ପରିଡ଼ା ଓ ବେଲଗୁଣ୍ଠା ପ୍ରାଣୀ ବିଶେଷଜ୍ଞ ଡ. ସଞ୍ଜୟ କୁମାର ମହାପାତ୍ର ହାତୀର ବ୍ୟବଚ୍ଛେଦ କରିଥିଲେ। ଏହାପରେ ତାକୁ ଜଙ୍ଗଲ ଭିତରେ ହିଁ ପୋତି ଦିଆଯାଇଛି। ଏହି ସମୟରେ ଡିଏଫ୍ଓ ହିମାଂଶୁ ଶେଖର ମହାନ୍ତି, ଏସିଏଫ୍ ବିମଳ କୁମାର ପ୍ରଧାନ, ଘୁମୁସର ଦକ୍ଷିଣ ବନଖଣ୍ଡ ଏସିଏଫ୍ ନିହାର ରଞ୍ଜନ ମଲ୍ଲିକ, ତାରସିଂ ରେଞ୍ଜର ପ୍ରଶାନ୍ତ କୁମାର ବେହେରା, ଜଗନ୍ନାଥପ୍ରସାଦ ରେଞ୍ଜର ସୁଜାତା ରାଣୀ ପଣ୍ଡା, ବନପାଳ କଳାବଦନ ଦାସ, ଶୁଭସ୍ମିତା ଦାସ, ଟାଟା ପାଓ୍ବାର ଯନ୍ତ୍ରୀ, ସ୍ନେହା ଅନୁଷ୍ଠାନର କର୍ମଚାରୀ ପ୍ରଶାନ୍ତ ରାଉତ, ସରପଞ୍ଚ, ରାଜସ୍ବ ବିଭାଗର ଅଧିକାରୀ ପ୍ରମୁଖ ଉପସ୍ଥିତ ଥିଲେ।