ଢେଙ୍କାନାଳ ଅଫିସ, ୧୩।୩: ଢେଙ୍କାନାଳ ଜିଲା ସଦର ରେଞ୍ଜ୍ ଗହମଖୁଣ୍ଟି ଅଞ୍ଚଳରେ ୩ଦିନ ହେଲା ଆତଙ୍କ ସୃଷ୍ଟି କରିଥିବା କ୍ଷତାକ୍ତ ଦନ୍ତା ହାତୀ ଆକ୍ରମଣରେ ଗୁରୁତର ହୋଇ ଚିକିତ୍ସାଧୀନ ଥିବା ସ୍କ୍ବାଡ୍ କର୍ମଚାରୀ ବିଶ୍ୱରଞ୍ଜନ ପାଣିଗ୍ରାହୀଙ୍କ ମୃତ୍ୟୁ ଘଟିଛି। ମୃତକଙ୍କ ଘର ବାଲେଶ୍ୱର ଜିଲାରେ। ସେ ଦୀର୍ଘଦିନ ହେଲା ଢେଙ୍କାନାଳ ଜିଲାରେ ହାତୀ ସ୍କ୍ବାଡ୍ କର୍ମଚାରୀ ଭାବେ କାର୍ଯ୍ୟ କରୁଥିଲେ। ଉକ୍ତ ଦନ୍ତାର ପଛ ଡାହାଣ ଗୋଡ଼ ପାର୍ଶ୍ୱରେ ଗଭୀର କ୍ଷତ ସୃଷ୍ଟି ହୋଇଥିବାବେଳେ ସୂଚନା ପାଇ ଶୁକ୍ରବାର ବନ କର୍ମଚାରୀ ପହଞ୍ଚତ୍ଥିଲେ। ଆଣ୍ଟିବାୟୋଟିକ୍ ଇଞ୍ଜେକ୍ସନ ଦିଆଯିବା ସମୟରେ ହିଂସ୍ର ଦନ୍ତା ବିଶ୍ୱରଞ୍ଜନକୁ ହଠାତ୍ ଆକ୍ରମଣ କରିଥିଲା। ତାଙ୍କ ଛାତିରେ ଗଭୀର କ୍ଷତ ସୃଷ୍ଟି ହୋଇଥିବାବେଳେ ତାଙ୍କୁ ପ୍ରଥମେ ଜିଲା ମୁଖ୍ୟ ଚିକିତ୍ସାଳୟ ଏବଂ ପରେ କଟକ ସ୍ଥାନାନ୍ତର କରାଯାଇଥିଲା। ବିଶ୍ୱରଞ୍ଜନଙ୍କ ପରଲୋକରେ ବନ କର୍ମଚାରୀଙ୍କ ମହଲରେ ଶୋକର ଛାୟା ଖେଳିଯାଇଛି।
ବିଶ୍ୱରଞ୍ଜନ ଢେଙ୍କାନାଳ ଶ୍ୟାମାଚରଣପୁର ଅଞ୍ଚଳରେ ସପରିବାର ରହୁଥିଲେ। ତାଙ୍କର ସ୍ତ୍ରୀ, ୪ବର୍ଷର ଝିଅ ଏବଂ ବର୍ଷକର ଏକ ପୁତ୍ର ସନ୍ତାନ ଅଛନ୍ତି। ପୁରୀ ସ୍ବର୍ଗଦ୍ୱାରଠାରେ ତାଙ୍କର ଶେଷକୃତ୍ୟ କରାଯାଇଛି। ଏ ସଂକ୍ରାନ୍ତରେ ଜିଲା ବନଖଣ୍ଡ ଅଧିକାରୀ ଡା. ପ୍ରକାଶଚାନ୍ଦ ଗୋଗିନେନି କୁହନ୍ତି, ମୃତ ସ୍କ୍ବାଡ୍ କର୍ମଚାରୀଙ୍କ ସ୍ତ୍ରୀଙ୍କୁ ଆଜୀବନ ପେନ୍ସନ୍ ବ୍ୟବସ୍ଥା କରାଯାଇଛି। କ୍ଷତାକ୍ତ ହାତୀ ଉପରେ ବନ ବିଭାଗ ନଜର ରଖିଛି। ୩ଦିନ ପରେ ଆଣ୍ଟିବାୟୋଟିକ୍ର ପ୍ରଭାବ ଜଣାପଡ଼ିବ। ଉକ୍ତ ହାତୀ ଆକ୍ରମଣରେ ବିଶ୍ୱରଞ୍ଜନଙ୍କ ସମେତ ୩ଜଣଙ୍କ ମୃତ୍ୟୁ ଘଟିସାରିଲାଣି। ଏହାକୁ ଅନ୍ୟତ୍ର ଘଉଡ଼ାଇବାକୁ ଅଞ୍ଚଳବାସୀ ଦାବି କରିଛନ୍ତି। ଢେଙ୍କାନାଳ ଜିଲାର ବିଭିନ୍ନ ସ୍ଥାନରେ ଗୋଠଛଡ଼ା ଦନ୍ତାହାତୀ ଉପଦ୍ରବ ଚଳାଇଛନ୍ତି। ଶୁକ୍ରବାର ଦିନକରେ ହାତୀ-ମଣିଷ ସଂଘର୍ଷରେ ୩ ଜୀବନ ଯାଇଛି। ଜଙ୍ଗଲକୁ ଜାଳେଣି ସଂଗ୍ରହ କରିବାକୁ ଯାଇଥିବାବେଳେ ହାତୀ ହାବୁଡ଼ରେ ପଡ଼ି ହିନ୍ଦୋଳ ରେଞ୍ଜ୍ ତର୍କାବେଡା ଗ୍ରାମର ଚକ୍ରଧର ବେହେରା (୬୩)ଙ୍କ ମୃତ୍ୟୁ ଘଟିଥିଲା। ସେହିପରି ନିମିଧା ଗ୍ରାମର ସତ୍ୟବାନ ବେହେରା (୩୬)ଙ୍କୁ ମଧ୍ୟ ହାତୀ କଚାଡ଼ି ମାରିଦେଇଥିଲା। କ୍ଷତାକ୍ତ ଦନ୍ତା ଆକ୍ରମଣରେ ହାତୀ ସ୍କ୍ବାଡ୍ କର୍ମଚାରୀ ବିଶ୍ୱରଞ୍ଜନଙ୍କ ମୃତ୍ୟୁ ଘଟିଥିଲା। ଆତଙ୍କ ସୃଷ୍ଟି କରିଥିବା ଗୋଟିକିଆ ହାତୀକୁ ଅନ୍ୟତ୍ର ଘଉଡ଼ାଇବାକୁ ଅଞ୍ଚଳବାସୀ ଦାବି କରିଛନ୍ତି।
