ଥୁଆମୂଳ ରାମପୁର,୩।୬(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ଥାନା ଅନ୍ତର୍ଗତ ବିରିକୋଟ ଗ୍ରାମରେ ଏକ ଅଭାବନୀୟ ଘଟଣା ଘଟିଛି । ମାତ୍ର ୫୦୦ ଟଙ୍କାର କରଜ ସହ ଜମିବାଡ଼ିକୁ କେନ୍ଦ୍ର କରି ଜଣେ ୭୬ ବର୍ଷୀୟ ଆଦିବାସୀ ବୃଦ୍ଧଙ୍କୁ ଜାତିଗତ ଆକ୍ଷେପ ସହ ନିର୍ମମ ଭାବେ ମରଣାନ୍ତକ ଆକ୍ରମଣ କରାଯାଇଥିବା ଅଭିଯୋଗ ହୋଇଛି । ବୁର୍ଲା ବଡ଼ ମେଡିକାଲରେ ଚିକିତ୍ସାଧୀନ ଅବସ୍ଥାରେ ବୃଦ୍ଧଙ୍କ ମୃତ୍ୟୁ ପରେ, ଆଜି ଉତ୍ତ୍ୟକ୍ତ ଗ୍ରାମବାସୀ ଓ ପରିବାର ଲୋକେ ଅଭିଯୁକ୍ତମାନଙ୍କ ଗିରଫ ଦାବିରେ ଥାନା ସମ୍ମୁଖରେ ଶବ ରଖି ପ୍ରତିବାଦ କରିଛନ୍ତି।
ସୂଚନା ଅନୁଯାୟୀ, ଗତ ମେ ୨୫ ତାରିଖ ଦିନ ବିରିକୋଟ ଗ୍ରାମର ନକୁଳ ନାଏକ (୭୬) କେନ୍ଦୁପଡ଼ା ଗ୍ରାମକୁ ବୋହଲେନ୍ ଯାତ୍ରା ଦେଖିବାକୁ ଯାଇଥିଲେ। ସେଠାରେ ପୂର୍ବରୁ ଧାର ନେଇଥିବା ୫୦୦ ଟଙ୍କା ମାଗିବାରୁ ଗ୍ରାମର ସବାନାଥ ନାଏକ, ତାଙ୍କ ପତ୍ନୀ ମୁକ୍ତା ନାଏକ ଏବଂ ଝିଅ ତରୁଣୀ ନାଏକ ମିଶି ଗୋଷ୍ଠୀବଦ୍ଧ ଭାବେ ନକୁଳଙ୍କୁ ଅତର୍କିତ ଆକ୍ରମଣ କରିଥିଲେ । ଅଭିଯୋଗ ମୁତାବକ, ଅଭିଯୁକ୍ତମାନେ ବୃଦ୍ଧଙ୍କୁ ଜାତିଆଣ ଆକ୍ଷେପ କରିବା ସହ ତଳେ ପକାଇ ତାଙ୍କ ମର୍ମସ୍ଥଳୀକୁ ନିର୍ମମ ଭାବେ ଚିପି ଦେଇଥିଲେ ଏବଂ ଗୋଇଠା, ବିଧା ମାରି ଗୁରୁତର ଆହତ କରିଥିଲେ। ସ୍ଥାନୀୟ ଲୋକେ ଓ ମୃତକଙ୍କ ଝିଅ ବାସନ୍ତୀ ଘଟଣାସ୍ଥଳରୁ ତାଙ୍କ ଉଦ୍ଧାର କରିଥିଲେ। ଗୁରୁତର ବୃଦ୍ଧଙ୍କୁ ଗତ ମେ’ ୨୮ ତାରିଖ ଦିନ ପ୍ରଥମେ ଥୁଆମୂଳ ରାମପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା।
ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ଭବାନୀପାଟଣା ଜିଲା ମୁଖ୍ୟ ଚିକିତ୍ସାଳୟ ଏବଂ ପରେ ବୁର୍ଲା ମେଡିକାଲକୁ ସ୍ଥାନାନ୍ତର କରାଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ଗତ ମଙ୍ଗଳବାର ସକାଳେ ନକୁଳଙ୍କ ମୃତ୍ୟୁ ଘଟିଥିଲା। ଆଜି ବୁଧବାର ବୁର୍ଲାରେ ଶବ ବ୍ୟବଚ୍ଛେଦ ପରେ ପରିବାର ଲୋକେ ମୃତଦେହ ଧରି ଗାଁକୁ ଫେରୁଥିଲେ। ଅଭିଯୁକ୍ତମାନେ ଗିରଫ ହୋଇନଥିବାରୁ ମୃତଦେହ ଧରି ଫେରିବା ସମୟରେ ପରିବାର ଓ ଶତାଧିକ ଗ୍ରାମବାସୀ ଥୁଆମୂଳ ରାମପୁର ଥାନା ସମ୍ମୁଖରେ ଶବ ରଖି କିଛି ସମୟ ବିକ୍ଷୋଭ ପ୍ରଦର୍ଶନ କରିଥିଲେ, ପୋଲିସ ତୁରନ୍ତ ଦୋଷୀମାନଙ୍କୁ କାବୁ କରି ଦୃଢ଼ ଆଇନଗତ କାର୍ଯ୍ୟନୁଷ୍ଠାନ ଗ୍ରହଣ କରୁ ବୋଲି ସେମାନେ ଗଣମାଧ୍ୟମ ଆଗରେ ଦାବି କରିଛନ୍ତି । ଏ ସମ୍ପର୍କରେ ଥାନା ଅଧିକାରୀ କୈବଲ୍ୟ ସେଠ୍ଙ୍କୁ ପଚାରିବାରୁ ସେ କହିଛନ୍ତି ଯେ, ଅଭିଯୁକ୍ତମାନେ ପୋଲିସ ନଜରରେ ଅଛନ୍ତି । ଖୁବ୍ ଶୀଘ୍ର ସେମାନଙ୍କୁ ଗିରଫ କରାଯିବା ସହ ଦୃଢ଼ ଆଇନଗତ କାର୍ଯ୍ୟନୁଷ୍ଠାନ ଗ୍ରହଣ କରାଯିବ। ପୋଲିସର ଏହି ପ୍ରତିଶ୍ରୁତି ପରେ ଥାନା ସମ୍ମୁଖରୁ ବିକ୍ଷୋଭ ହଟିଥିବା ବେଳେ ସ୍ଥାନୀୟ ଅଞ୍ଚଳରେ ଚାପା ଉତ୍ତେଜନା ପ୍ରକାଶ ପାଇଛି । ସୂଚନାଯୋଗ୍ୟ, ଏହି ଘଟଣାରେ ମୃତକଙ୍କ ପତ୍ନୀ ଦ୍ରୌପଦୀ ନାଏକ (୭୦) ଗତ ମେ’ ୨୯ ରିଖରେ ଲିଖିତ ଏତଲା ଦେଇଥିଲେ। ପୋଲିସ ବିଏନ୍ଏସର ବିଭିନ୍ନ ଧାରାରେ କେସ୍ ନମ୍ବର ୮୭/୨୬ ରେ ମାମଲା ରୁଜୁ କରି ସବ୍-ଇନ୍ସପେକ୍ଟର ସୁଶାନ୍ତ ପଣ୍ଡାଙ୍କୁ ତଦନ୍ତ ଦାୟିତ୍ୱ ଦିଆଯାଇଥିବା ଜଣାପଡ଼ିଛି ।