ବାରଙ୍ଗ, ୯।୧୦(ଡି.ଏନ୍.ଏ.): ନନ୍ଦନକାନନକୁ ଶୁକ୍ରବାର ରାତିରେ ପଶୁପକ୍ଷୀ ଅଦଳବଦଳ ପ୍ରକିୟାରେ ଜୟପୁର ନହରଗଡ଼ ଜୈବ ଉଦ୍ୟାନରୁ ୪ପ୍ରଜାତିର ୮ଟି ନୂଆ ଅତିଥି ଆସିଛନ୍ତି। ନୂଆ ଅତିଥି ହେଲେ ହଳେ କଲରାପତରିଆ ବାଘ, ହଳେ ଧୂସର ଗଧିଆ, ୨ଟି ଅଣ୍ଡିରା ଘଡ଼ିଆଳ କୁମ୍ଭୀର, ୨ଟି ଅଣ୍ଡିରା ଚିଙ୍କାରା ହରିଣ। ଏମାନଙ୍କୁ ବିଭିନ୍ନ ଏନକ୍ଲୋଜରର ଫିଡିଂଚାମ୍ବରରେ ରଖାଯାଇ ସେମାନଙ୍କ ସ୍ବାସ୍ଥ୍ୟ ପରୀକ୍ଷା କରାଯିବ। ଏହି ଅଦଳବଦଳ ପ୍ରକିୟାର ଶୁଭାରମ୍ଭ ଜୟପୁର ନହରଗଡ ଜୈବ ଉଦ୍ୟାନ କର୍ତ୍ତୃପକ୍ଷ ପ୍ରଥମେ ଆରମ୍ଭ କରିବା ସହ ସେମାନେ ନନ୍ଦନକାନନରୁ ମାର୍ଚ୍ଚ ୧୭ରେ ଗୋଟିଏ ଅଣ୍ଡିରା ଧଳାବାଘ ଚିନୁ, ଗୋଟିଏ ମାଈ ସାଧାରଣ ବାଘୁଣୀ ରାଣୀ, ଗୋଟିଏ ଅଣ୍ଡିରା ବାରହା, ୧୫ହଳ ଜେବ୍ରା ଫିଞ୍ଚ ଚଢେଇ,୧୫ହଳ ଜାଭା ସ୍ପାରୋ ଚଢେଇଙ୍କୁ ନେଇଥିଲେ। ପର୍ଯ୍ୟଟକଙ୍କୁ ଆକର୍ଷିତ କରିବା ପାଇଁ ନନ୍ଦନକାନନ କର୍ତ୍ତୃପକ୍ଷ ପଶୁପକ୍ଷୀ ଅଦଳବଦଳ ପ୍ରକିୟାର ଉଦ୍ୟମକୁ ଆରମ୍ଭ କରିଛନ୍ତି। ସିକ୍ୟୁରିଟି ରେଞ୍ଜର ବିନ୍ଦୁପ୍ରସାଦ ପ୍ରଧାନଙ୍କ ନେତୃତ୍ୱରେ ୭ଜଣିଆ ଦଳ ଗତ ମାସ ୨୯ତାରିଖ ସକାଳେ ଜୟପୁର ଗସ୍ତ କରିଥିଲେ। ତେବେ ହରିଣ ପ୍ରଜାତିର ଚିଙ୍କାରା ହେଉଛି ନନ୍ଦନକାନନ ପାଇଁ ନୂଆ ହୋଇଥିବା ସୂଚନା ମିଳିିଛି।
