ମୁମ୍ବାଇ,୬।୨: ସାମାନ୍ୟ ଅଣ୍ଡା ପାଇଁ ସ୍ତ୍ରୀ-ସ୍ବାମୀଙ୍କ କଳି ଯାଇ ଥାନାରେ ପହଞ୍ଚିବା ଯେତିକି ହାସ୍ୟାସ୍ପଦ ସେତିକି ଚର୍ଚ୍ଚାର ବିଷୟ ମଧ୍ୟ। ମହାରାଷ୍ଟ୍ରରେ ଏମିତି ଏକ ଘଟଣା ସାମ୍ନାକୁ ଆସିଛି। ଯେଉଁଠି ସ୍ତ୍ରୀ ସ୍ବାମୀଙ୍କ ଝଗଡ଼ାର ମୂଳ କାରଣ ଅଣ୍ଡା।
ମହାରାଷ୍ଟ୍ରର ବୁଲଢାଣା ଜିଲା ସାଖରଖେରଡ଼ା ଗାଁରେ କୁକୁଡ଼ା ଅଣ୍ଡାକୁ ନେଇ ସ୍ତ୍ରୀ-ସ୍ବାମୀଙ୍କ ଝଗଡ଼ା ଥାନା ପର୍ଯ୍ୟନ୍ତ ଯାଇଛି। ପୋଲିସ ଘଟଣାର ତଦନ୍ତ କରି ଜାଣିବାକୁ ପାଇଛି କଥାରେ କିଛି ନାହିଁ, ସାଧାରଣ ମାମଲା। ଜଣେ ପୋଲିସ ଅଧିକାରୀ କହିଛନ୍ତି, ବଜାରରୁ ୩ଟି ଅଣ୍ଡା ଆଣିଥିଲେ ସ୍ବାମୀ। ସ୍ତ୍ରୀଙ୍କୁ ଭୁଜିଆ କରିବା ପାଇଁ କହିଥିଲେ। ସ୍ତ୍ରୀ ଭୁଜିଆ ନ କରି ତରକାରୀ କରି ଝିଅକୁ ଖାଇବାକୁ ଦେଇଥିଲେ। ଯେତେବେଳେ ସ୍ବାମୀ ଘରକୁ ଫେରିଲେ ସ୍ତ୍ରୀଙ୍କୁ ଅଣ୍ଡା ଖାଇବାକୁ ମାଗିଲେ। ସ୍ତ୍ରୀ କହିଲେ ଝିଅ ଖାଇ ଦେଇଛି। ଏଥିରୁ ଆରମ୍ଭ ହୋଇଥିଲା ତୁମ୍ବିତୋଫାନ।
ଦୁଇଜଣଙ୍କ ବିବାଦ ଏତେ ବଢ଼ିଗଲା ଯେ, ମାମଲା ଥାନାରେ ପହଞ୍ଚିଥିଲା। ପୋଲିସ ଏପରି ଝଗଡ଼ା ଶୁଣି ହସିବା ସହ ଆଶ୍ଚର୍ଯ୍ୟ ମଧ୍ୟ ହୋଇଥିଲା। ସାଖରଖେରଡ଼ା ପୋଲିସ ଅଧିକାରୀ କହିଛନ୍ତି, ସେ ଆଗରୁ ଅନେକ ମାମଲାର ସମାଧାନ କରିଛନ୍ତି ମାତ୍ର ଏହି ମାମଲା ତାଙ୍କ ପାଇଁ ନୂଆ ଏବଂ ହାସ୍ୟାସ୍ପଦ ବି।
ପୋଲିସ ଅଧିକାରୀ ଜିତେନ୍ଦ୍ର ଅଡୋଲେ ନିଜ ଷ୍ଟାଫଙ୍କ ମଧ୍ୟରୁ ଜଣଙ୍କୁ ବଜାର ପଠାଇ ୩ଟି ଅଣ୍ଡା ମଗାଇଲେ। ସ୍ବାମୀ ସ୍ତ୍ରୀଙ୍କୁ ଦେଇ ଘରକୁ ପଠାଇଛନ୍ତି। ଉଭୟ ଖୁସି ମନରେ ଘରକୁ ଫେରି ଯାଇଥିବା ସେ କହିଛନ୍ତି।
