ଭଞ୍ଜନଗର,୧୧।୮(ବାବୁଲା ପ୍ରଧାନ): ଜଙ୍ଗଲରେ ବନ୍ୟପ୍ରାଣୀଙ୍କ ପାଇଁ ପର୍ଯ୍ୟାପ୍ତ ଖାଦ୍ୟ ଉପଲବ୍ଧ ନହେବାରୁ ହାତୀପଲ ସମେତ ବିଭିନ୍ନ ବନ୍ୟପ୍ରାଣୀ ଜଙ୍ଗଲ ଛାଡ଼ି ଜନବସତି ମୁହାଁ ହେଉଛନ୍ତି। ଫଳରେ ଜଙ୍ଗଲ ନିକଟବର୍ତ୍ତୀ ଗ୍ରାମଗୁଡ଼ିକରେ ଫସଲ ନଷ୍ଟ ସହ ଘରଦ୍ୱାର ଭାଙ୍ଗିବା ଭଳି ଅଘଟଣ ଘଟୁଛି। ଏହି ସମସ୍ୟାର ସ୍ଥାୟୀ ସମାଧାନ ପାଇଁ ବନ ବିଭାଗ ପକ୍ଷରୁ ବନ୍ୟପ୍ରାଣୀଙ୍କୁ ଜଙ୍ଗଲ ମଧ୍ୟରେ ଆବଶ୍ୟକ ଖାଦ୍ୟ ଯୋଗାଇବା ଲକ୍ଷ୍ୟରେ ବିଭିନ୍ନ ପ୍ରକାର ଖାଦ୍ୟୋପଯୋଗୀ ଗଛ ଓ ଫସଲ ଲଗାଯାଉଛି।
ଗତ ଦୁଇ ବର୍ଷ ପୂର୍ବେ ଜଙ୍ଗଲରେ ବନ୍ୟପ୍ରାଣୀଙ୍କ ଉପଯୋଗୀ ଫସଲ ଓ ଗଛ ଲଗାଇବା ଉପରେ ଗୁରୁତ୍ୱ ଦିଆଯାଇଥିବା ବେଳେ ଏହାର ଅଂଶସ୍ୱରୂପ ବିଭିନ୍ନ ଜଙ୍ଗଲରେ ତାଳ ଗଛ ଏବଂ ଭଞ୍ଜନଗର ଘୁମୁସର ଉତ୍ତର ଓ ଦକ୍ଷିଣ ବନଖଣ୍ଡରେ ଧାନ ଓ ମୁଗ ଭଳି ଫସଲ ମଧ୍ୟ ବୁଣାଯାଇଥିଲା। ଚଳିତ ବର୍ଷ ବନ୍ୟପ୍ରାଣୀଙ୍କ ଖାଦ୍ୟ ଆବଶ୍ୟକତାକୁ ଆହୁରି ସୁଦୃଢ଼ କରିବା ପାଇଁ ଆଞ୍ଚଳିକ ମୁଖ୍ୟ ବନ ସଂରକ୍ଷକ ନୀଳାମ୍ବର ବିଶ୍ୱନାଥ ୭ଟି ବନଖଣ୍ଡରେ କଦଳୀ ଚାରା ରୋପଣ କରିବାକୁ ପରାମର୍ଶ ଦେଇଛନ୍ତି। ଏହା ପରେ ଭଞ୍ଜନଗରସ୍ଥିତ ଘୁମୁସର ଉତ୍ତର ବନଖଣ୍ଡର ବିଭିନ୍ନ ଅଞ୍ଚଳରେ ସ୍ଥାନୀୟ ଲୋକଙ୍କ ବଗିଚାରୁ ମାଗଣାରେ ସଂଗୃହୀତ ହୋଇଥିବା କଦଳୀ ଚାରା ରୋପଣ କାର୍ଯ୍ୟ ଆରମ୍ଭ ହୋଇଯାଇଛି।
ଜଙ୍ଗଲରେ ବନ୍ୟପ୍ରାଣୀଙ୍କ ପାଇଁ ପର୍ଯ୍ୟାପ୍ତ ଖାଦ୍ୟ ବ୍ୟବସ୍ଥା ହେଲେ ମଣିଷ ଓ ବନ୍ୟପ୍ରାଣୀଙ୍କ ମଧ୍ୟରେ ଲଢେଇ ହ୍ରାସ ପାଇବ ବୋଲି ଆଶା କରାଯାଉଛି। ଡିଏଫ୍ଓ ହିମାଂଶୁ ଶେଖର ମହାନ୍ତିଙ୍କ ନେତୃତ୍ୱରେ ଏସିଏଫ୍ ବିମଳ ପ୍ରଧାନ, ମୁଜାଗଡ଼ ରେଞ୍ଜର ବିମ୍ବାଧର ସାହୁ, କେନ୍ଦ୍ରୀୟ ବନାଞ୍ଚଳ ଅଧିକାରୀ ପୃଥିବୀରାଜ ପ୍ରଧାନ, ତାରସିଂ ରେଞ୍ଜର ପ୍ରଶାନ୍ତ କୁମାର ବେହେରା ଓ ଜଗନ୍ନାଥପ୍ରସାଦ ରେଞ୍ଜର ସୁଜାତା ରାଣୀ ପଣ୍ଡା ପ୍ରମୁଖ ଏହି କଦଳୀ ଚାରା ରୋପଣ କାର୍ଯ୍ୟର ସଫଳ ତଦାରଖ କରୁଛନ୍ତି।
ଅନ୍ୟପକ୍ଷରେ ଘୁମୁସର ଉତ୍ତର ଓ ଦକ୍ଷିଣ ବନଖଣ୍ଡରେ ହାତୀ, କଲରାପତରିଆ ବାଘ, ହରିଣ, ଗୟଳ ଓ ବାରହା ଭଳି ବନ୍ୟପ୍ରାଣୀଙ୍କ ସଂଖ୍ୟା କ୍ରମଶଃ ବୃଦ୍ଧି ପାଉଥିବାରୁ ସେମାନଙ୍କ ଖାଦ୍ୟ ଓ ସୁରକ୍ଷା ନେଇ ବନ ବିଭାଗର ଚିନ୍ତା ବଢ଼ିଛି। ବିଶେଷକରି ତୃଣଭୋଜୀ ପ୍ରାଣୀଙ୍କ ପାଇଁ ଜଙ୍ଗଲ ଭିତରେ ଅଧିକ ଖାଦ୍ୟ ବ୍ୟବସ୍ଥା କରାଯାଉଥିବାରୁ, ଏହା ଦ୍ୱାରା ବନ୍ୟପ୍ରାଣୀମାନେ ଖାଦ୍ୟ ଅନ୍ୱେଷଣରେ ଜନବସତି ଓ ଚାଷଜମିକୁ ଆସିବା ବହୁ ପରିମାଣରେ କମିଯିବ ବୋଲି ବନ ବିଭାଗ ପକ୍ଷରୁ ଦୃଢ଼ ଆଶା ପୋଷାକରାଯାଇଛି।