ଜୀବନରେ ଶିକ୍ଷାର ଭୂମିକାକୁ କିଭଳି ଦେଖୁଛନ୍ତି?
ଶିକ୍ଷା ସମସ୍ତଙ୍କ ପାଇଁ ସବୁକିଛି କହିଲେ ଅତ୍ୟୁକ୍ତି ହେବନି। ବ୍ୟକ୍ତି ପାଇଁ ଶିକ୍ଷାର ଭୂମିକା ଏତେ ଗୁରୁତ୍ୱପୂର୍ଣ୍ଣ ଯେ ତାକୁ କଥାରେ ବର୍ଣ୍ଣନା କରାଯାଇ ନ ପାରେ। ଜଣେ ଶିଶୁ ଲାଗି ଶିକ୍ଷା ତୃତୀୟ ନୟନ। ଜଣେ ଶିକ୍ଷିତ ହେଲେ ହିଁ ସାରା ବିଶ୍ୱକୁ ଠିକ୍ ଭାବେ ଦେଖିପାରିବ। ଆଖି ଥିଲେ ମଧ୍ୟ ଶିକ୍ଷିତ ହୋଇ ନ ପାରିଲେ ଜୀବନ ଅନ୍ଧକାର ହୋଇଥାଏ। ମୁଁ ଗରିବ ପରିବାରରୁ ଆସି ମଧ୍ୟ ଶିକ୍ଷା ଯୋଗୁ ସମାଜକୁ କିଛି ଭଲ ଅବଦାନ ଦେଇପାରିଛି।
ବର୍ତ୍ତମାନର ଶିକ୍ଷା ବ୍ୟବସ୍ଥା ନେଇ ଆପଣଙ୍କ ମତ?
ଶିକ୍ଷା ସମାଜର ମେରୁଦଣ୍ଡ। ଯେଉଁ ଜାତି ଯେତେ ଉନ୍ନତି କରିଛି ସେ ଦେଶର ଶିକ୍ଷା ସେତେ ଉନ୍ନତ। ଆମେରିକା ଏବଂ ୟୁରୋପକୁ ଅନେକେ ଉଦାହରଣ ଭାବେ ନେଇଥାନ୍ତି। ସେଠାକାର ବିଶ୍ୱବିଦ୍ୟାଳୟଗୁଡ଼ିକ ଶହ ଶହ ବର୍ଷ ପୁରୁଣା। ଭାରତୀୟ ବିଶ୍ୱବିଦ୍ୟାଳୟଗଡ଼ିକ ପ୍ରାୟ ୧୫୦ ବର୍ଷ ତଳେ ପ୍ରତିଷ୍ଠା ହୋଇଛି। ପାଶ୍ଚାତ୍ୟ ଦେଶଗୁଡ଼ିକରେ ଶିକ୍ଷା ବ୍ୟବସ୍ଥା ପୁରୁଣା ଓ ଉନ୍ନତ ହୋଇଥିବାରୁ ଗବେଷଣା ଏବଂ ଉଦ୍ଭାବନକୁ ସେମାନେ ପ୍ରାଥମିକତା ଦେଉଛନ୍ତି। ବର୍ତ୍ତମାନ ସରକାର ଏ ଦିଗଗୁଡ଼ିକୁ ଧ୍ୟାନ ଦେଉଥିବାରୁ ଭାରତର କିଛି ବିଶ୍ୱବିଦ୍ୟାଳୟ ଟପ୍ ୨୫୦ ବା ଟପ୍ ୫୦୦ ପ୍ରତିଷ୍ଠାନ ମଧ୍ୟରେ ଆସିପାରୁଛନ୍ତି। କିଟ୍ ଏବଂ କିସ୍ର ଗୌରବମୟ ଯାତ୍ରାକୁ କେମିତି ଦେଖନ୍ତି?
ଆଜି କିଟ୍, କିସ୍ ଯାହାବି ହୋଇଛି, କେବଳ ଭଗବାନଙ୍କ ଆଶୀର୍ବାଦ ଯୋଗୁ ସମ୍ଭବ ହୋଇପାରିଛି। ସମସ୍ତଙ୍କ ଶୁଭେଚ୍ଛା, କର୍ମଚାରୀଙ୍କ ନିଷ୍ଠାପର ଉଦ୍ୟମ, ମୋ ପରିଶ୍ରମ, ସମର୍ପିତ ଜୀବନ ସବୁକିଛି ମିଶିବା ପରେ ଅନୁଷ୍ଠାନ ଏତେ ବଡ଼ ହୋଇପାରିଲା। କିଟ୍-କିସ୍ ଏତେ ବଡ଼ ବିଶ୍ୱସ୍ତରୀୟ ଅନୁଷ୍ଠାନ ହୋଇପାରିବା ମୋ ପରିକଳ୍ପନା ବାହାରେ ଥିଲା। କିଟ୍, କିସ୍ ଆରମ୍ଭ ୫ ହଜାର ଟଙ୍କା ଭଡ଼ାଘରେ ହୋଇଥିଲା। ସେ ସମୟରେ ଅଧ୍ୟାପନାରେ ଥିଲି। ମୋ ଆର୍ଥତ୍କ ସ୍ଥିତି ଭଲ ନ ଥିଲା।
କିସ୍ରେ ୩୫ ହଜାର ଆଦିବାସୀ ଶିଶୁଙ୍କ ଭବିଷ୍ୟତ ଗଢ଼ୁଛନ୍ତି। ଆପଣ କେତେ ଖୁସି?
ବହୁତ ଖୁସି ଲାଗୁଛି। ଯେଉଁ ୪ ବର୍ଷର ପିଲା ମୁଣ୍ଡ ଉପରେ ଦିନେ ହାତ ରଖିବାକୁ କେହି ନ ଥିଲେ, ଆଦରରେ କଥା ପଦେ କହି ନ ଥିଲେ, ଦିଗ୍ଦର୍ଶନ ମଧ୍ୟ ଦେଇ ନ ଥିଲେ, ସେହି ପିଲା ବଡ଼ ହେବା ପରେ ହଜାର ହଜାର ଗରିବ ଆଦିବାସୀ ପିଲାଙ୍କ ଲାଗି କିଛି କରିବା ପାଇଁ ଆଗକୁ ଆସିଛି। କିସ୍ର ଉଦ୍ୟମ ଯୋଗୁ ଆଦିବାସୀ ଛାତ୍ରୀଛାତ୍ର ଭଲ ମଣିଷ ହୋଇ ବାହାରୁଛନ୍ତି। ଯେଉଁ ଜିନିଷ ମୁଁ ପିଲାବେଳେ ପାଇ ନ ଥିଲି ତାହା ଆଜି ଅନ୍ୟକୁ ବାଣ୍ଟିବାକୁ ସକ୍ଷମ ହୋଇଛି।
କିସ୍ର ଶାଖା ସମ୍ପ୍ରସାରଣ ନେଇ ଆଗାମୀ ଯୋଜନା କ’ଣ?
ଗରିବ ଆଦିବାସୀ ଛାତ୍ରୀଛାତ୍ରଙ୍କୁ ସମାଜର ମୁଖ୍ୟସ୍ରୋତକୁ ଆଣିବା ପାଇଁ ଶିକ୍ଷା ଏକ ମାଧ୍ୟମ। ୫ଟି ଜିଲାରେ କିସ୍ ଶାଖା ଖୋଲିଛି। ଚଳିତ ବର୍ଷ ପ୍ରାୟ ଆଉ ୭ ଜିଲାରେ କିସ୍ ଶାଖା ଖୋଲିବ। ୨୦ ଜିଲାରେ ଏହି ଶାଖା ଖୋଲିବା ନେଇ ଯୋଜନା ରଖାଯାଇଛି।
ଆପଣଙ୍କ ସଫଳତାର ମନ୍ତ୍ର କ’ଣ?
ନିଷ୍ଠା, ସାଧୁତା, ସମର୍ପିତ ଜୀବନଯାପନ କଲେ ଜଣେ ନିଶ୍ଚିତ ଭାବେ ସଫଳ ହୋଇପାରିବ। ଭଗବାନଙ୍କ ଆଶୀର୍ବାଦ ଦ୍ୱାରା ଆମ କାମ ବହୁ ପ୍ରସାରିତ ହୋଇପାରିଛି। ସବୁ ଜିନିଷକୁ ସୁନ୍ଦର ଭାବେ ଗଢ଼ିବା ପାଇଁ ପ୍ରୟାସ ଜାରି ରଖିଛୁ।
ନିଯୁକ୍ତି ସଙ୍କୁଚିତ ହେଉଥିବାବେଳେ ଯୁବବର୍ଗଙ୍କୁ କି ପରାମର୍ଶ ଦେବେ?
ଯୁବବର୍ଗ ବର୍ତ୍ତମାନ ନିଜେ କିଛି କରିବାକୁ ଚେଷ୍ଟା କରନ୍ତୁ। ନିଜେ ସ୍ବାବଲମ୍ବୀ ହେବା ସହ ଲୋକଙ୍କୁ ନିଯୁକ୍ତି ଦେବାକୁ ସକ୍ଷମ ହେବେ। ଯେକୌଣସି କାମ କରିବେ ପ୍ରଥମ ପାଞ୍ଚ ବର୍ଷ କଷ୍ଟ ହେବ। ଏହି ସମୟକୁ ଧୈର୍ଯ୍ୟର ସହ ସହିଗଲେ ନିଶ୍ଚିତ ସଫଳତା ଆଡ଼କୁ ଅଗ୍ରସର ହେବେ।
ଦାରିଦ୍ର୍ୟ ଦୂରୀକରଣ କ୍ଷେତ୍ରରେ ଶିକ୍ଷାର ଯୋଗଦାନକୁ କିଭଳି ବିଚାର କରୁଛନ୍ତି?
ଗୁଣାମତ୍କ ଶିକ୍ଷା ଦ୍ୱାରା ଛାତ୍ରୀଛାତ୍ର ନିଯୁକ୍ତି ପାଇବା ଦ୍ୱାରା ତାଙ୍କ ପରିବାର ସ୍ବଚ୍ଛଳ ହୋଇଥାଏ। ଲୋକଙ୍କର ରୋଜଗାର ବଢ଼ିଲେ କ୍ରୟଶକ୍ତି ବଢ଼ିବ। ଶିକ୍ଷାର ଉନ୍ନତି ହେଲେ ରାଜ୍ୟର ପ୍ରଗତି ହୋଇପାରିବ। ଦାରିଦ୍ର୍ୟ ଦୂରୀକରଣ କ୍ଷେତ୍ରରେ ଶିକ୍ଷାର ଅବଦାନ ଅନସ୍ବୀକାର୍ଯ୍ୟ।
