ନୂଆଦିଲ୍ଲୀ/ଓ୍ବାଶିଂଟନ,୧୬।୧୦ : ଅର୍ଥମନ୍ତ୍ରୀ ର୍ନିମଳା ସୀତାରମଣ ଇଡିର ରାଜନୈତିକ ବ୍ୟବହାର ଉପରେ ଜବାବ ଦେଇ କହିଛନ୍ତି ଯେ ଇଡି ଏକ ସ୍ବତନ୍ତ୍ର ଅନୁଷ୍ଠାନ ଏବଂ ଏହା ନିଜେ ନିଷ୍ପତ୍ତି ନିଏ। ଆମେରିକାରେ ଏକ ଗଣମାଧ୍ୟମ ସମ୍ମିଳନୀରେ ସେ ଏହା କହିଛନ୍ତି। ସେ ଇଡିର କାର୍ଯ୍ୟକୁ ସୁରକ୍ଷା କରିଥିଲେ ଏବଂ ଅନୁସନ୍ଧାନକାରୀ ସଂସ୍ଥାଗୁଡ଼ିକୁ ରାଜନୈତିକ ସ୍ତରରେ ବ୍ୟବହାର କରାଯାଉଥିବା କଥାକୁ ଅସ୍ବୀକାର କରିଛନ୍ତି।
ଏନଫୋର୍ସମେଣ୍ଟ ଡାଇରେକ୍ଟୋରେଟ ଏବଂ ଆୟକର ବିଭାଗ ଉପରେ ପଚରାଯାଇଥିବା ପ୍ରଶ୍ନର ଉତ୍ତରରେ ନିର୍ମଳା ସୀତାରମଣ କହିଛନ୍ତି ଯେ ଇଡି ଯେଉଁ ସବୁ ମାମଲା ହାତକୁ ନେଇଛି ସେସବୁ ଉପରେ ପୂର୍ବରୁ ଅନ୍ୟ ଏଜେନ୍ସି ମଧ୍ୟ କାମ କରିଛନ୍ତି। ଇଡି ସର୍ବଦା ଟାର୍ଗେଟରେ ଆସିଥାଏ। ଇଡି ପ୍ରଥମେ କ୍ରାଇମ ସିନକୁ ଯାଏ ନାହିଁ। ଆପଣ ଏହିପରି ଅନେକ ଉଦାହରଣ ଦେଖିପାରିବେ। ଯେଉଁଠିକୁ ଇଡି ଯାଏ, ଜବତ ଟଙ୍କା, ଅଳଙ୍କାର ଏବଂ ସୁନା ମିଡିଆ କଭରେଜରେ ଆସିଥାଏ ।
ଏହା ବ୍ୟତୀତ ଅର୍ଥମନ୍ତ୍ରୀ ଜି -୨୦ ର ଆହ୍ବାନ ବିଷୟରେ ମଧ୍ୟ କହିଥିଲେ। ସେ କହିଛନ୍ତି ଯେ ଆମେ ଅନେକ ଜି-୨୦ ନେତାଙ୍କ ସହ କଥା ହୋଇଛୁ। ଏହି ଆଲୋଚନା ସମୟରେ, ଆମେ ବର୍ଷସାରା ସମ୍ମୁଖୀନ ହେଉଥିବା ଆହ୍ବାନ ଏବଂ ଚିନ୍ତାଧାରା ଉପରେ ଧ୍ୟାନ ଦେଇଛୁ । ଇଣ୍ଡୋନେସିଆ ବହୁତ କଠିନ ସମୟ ଦେଇ ଗତି କରିଛି । ସେ କହିଛନ୍ତି ଯେ ଯେତେବେଳେ ଚ୍ୟାଲେଞ୍ଜଗୁଡ଼ିକ ଅନେକ, ସେତେବେଳେ ଆମ ସମସ୍ତଙ୍କୁ ଏକାଠି କାମ କରିବାକୁ ପଡିବ ।
ଏହା ସହିତ ଅର୍ଥମନ୍ତ୍ରୀ ବିଶ୍ୱ ବ୍ୟାଙ୍କ ଅଧ୍ୟକ୍ଷ ଡେଭିଡ ମାଲପାସଙ୍କୁ ଭେଟିଛନ୍ତି। ଏହି ବୈଠକ ବିଷୟରେ ସେ କହିଛନ୍ତି ଯେ ମୁଁ ବିଶ୍ୱ ବ୍ୟାଙ୍କର ଅଧ୍ୟକ୍ଷଙ୍କୁ ଭେଟିଛି। ଏହା ସହିତ ଭାରତରେ ଡିଜିଟାଇଜେଶନ ବିଷୟରେ ମଧ୍ୟ ଆଲୋଚନା ହୋଇଛି। କିଭଳି ସାଧାରଣ ଲୋକମାନେ ମଧ୍ୟ ଡିଜିଟାଲ ଆପ ବ୍ୟବହାର କରୁଛନ୍ତି ସେ ନେଇ ଚର୍ଚ୍ଚା ହୋଇଥିବା ଅର୍ଥମନ୍ତ୍ରୀ ସୂଚନା ପ୍ରଦାନ କରିଛନ୍ତି।
