ନୂଆଦିଲ୍ଲୀ,୨ା୧୧(ଆଇଏଏନ୍ଏସ୍): ଉତ୍ତରପ୍ରଦେଶର ଗ୍ୟାଙ୍ଗ୍ଷ୍ଟର ବିକାଶ ଦୁବେଙ୍କ ୧୦ କୋଟି ଟଙ୍କା ମୂଲ୍ୟର ବେନାମୀ ସମ୍ପତ୍ତିକୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ମଙ୍ଗଳବାର ଜବତ କରିଛି। ପୋଲିସ ଏନ୍କାଉଣ୍ଟରରେ ନିହତ ହୋଇଥିବା ଗ୍ୟାଙ୍ଗଷ୍ଟର ତାଙ୍କ ସମ୍ପର୍କୀୟ ଓ ସହଯୋଗୀଙ୍କ ନାମରେ ଏହି ସମ୍ପତ୍ତି କିଣିଥିଲେ। ଦୁବେଙ୍କ ଘନିଷ୍ଠ ଜୟକାନ୍ତଙ୍କ ନାମରେ କାନପୁର ଓ ଏହାର ଆଖପାଖ ଅଞ୍ଚଳରେ ଏହି ସମ୍ପତ୍ତି ରହିଥିଲା। ଇଡି ଚଢ଼ାଉ ବେଳେ ଦୁବେଙ୍କ ନାମରେ ୨୮ରୁ ଊର୍ଦ୍ଧ୍ୱ ବେଆଇନ ସମ୍ପତ୍ତି ଥିବା ଜଣାପଡ଼ିଥିଲା। ସୂଚନାଯୋଗ୍ୟ, ୨୦୨୦ ଜୁଲାଇ ୩ରେ ଗ୍ୟାଙ୍ଗଷ୍ଟର ଦୁବେଙ୍କ କାନ୍ପୁରସ୍ଥିତ ଘର ଉପରେ ଚଢ଼ାଉ କରିବା ଲାଗି ପୋଲିସ ଟିମ୍ ଯାଇଥିବାବେଳେ ସେ ଓ ତାଙ୍କ ସହଯୋଗୀମାନଙ୍କ ଗୁଳିରେ ୮ ଜଣ ପୋଲିସ ପ୍ରାଣ ହରାଇଥିଲେ। ଏହାର ସପ୍ତାହେ ମଧ୍ୟରେ ପୋଲିସ ଏନ୍କାଉଣ୍ଟରରେ ଦୁବେ ଓ ତାଙ୍କ ଗ୍ୟାଙ୍ଗ୍ର ୫ ସଦସ୍ୟ ନିହତ ହୋଇଥିଲେ।
