ନୂଆଦିଲ୍ଲୀ,୮।୧ : ଭାରତର ମୁଖ୍ୟ ନିର୍ବାଚନ କମିଶନର ରାଜୀବ କୁମାରଙ୍କ ନେତୃତ୍ୱରେ ନିର୍ବାଚନ ଆୟୋଗଙ୍କର ଏକ ୧୬ ଜଣିଆ ଦଳ ଜାନୁଆରୀ ୧୧ରେ ତ୍ରିପୁରାରେ ପହଞ୍ଚି ବିଧାନସଭା ନିର୍ବାଚନର ପ୍ରସ୍ତୁତି ସମୀକ୍ଷା କରିବେ। ଏହି ଦଳ ନାଗାଲାଣ୍ଡ ଏବଂ ମେଘାଳୟ ମଧ୍ୟ ଗସ୍ତ କରିବେ। ଫେବୃଆରୀ ଦ୍ୱିତୀୟ ସପ୍ତାହ ପୂର୍ବରୁ ଆୟୋଗ ଏହି ରାଜ୍ୟଗୁଡିକରେ ନିର୍ବାଚନ କରିବାକୁ ଯୋଜନା କରୁଛନ୍ତି।
ତ୍ରିପୁରାର ମୁଖ୍ୟ ନିର୍ବାଚନ ଅଧିକାରୀ କିରଣ ଗିତ୍ତେ କହିଛନ୍ତି ଯେ ଆୟୋଗର ଟିମ ତିନି ଜଣ ନିର୍ବାଚନ କମିଶନର ଏବଂ ଅନ୍ୟ ୧୩ ଜଣ ଅଧିକାରୀଙ୍କୁ ନେଇ ଗଠିତ ହେବ। ଜାନୁଆରୀ ୧୧ରେ, ଆୟୋଗ ଦଳ ରାଜନୈତିକ ଦଳ, ନିର୍ବାଚନ ଅଧିକାରୀ ଏବଂ ଅନ୍ୟମାନଙ୍କ ସହ ଏକ ବୈଠକ କରିବେ। ଏହା ପରେ ଦଳ ଜାନୁଆରୀ ୧୨ ରେ ମେଘାଳୟ ଅଭିମୁଖେ ଯାତ୍ରା କରିବେ। ଜାନୁଆରୀ ୧୩ରେ ଶିଲଂରେ ରାଜନୈତିକ ଦଳ ଏବଂ ଅଧିକାରୀଙ୍କ ସହ ଏକ ବୈଠକ ହେବ। ଜାନୁଆରୀ ୧୪ ରେ, ଦଳ ନାଗାଲାଣ୍ଡ ଗସ୍ତ କରି ନିର୍ବାଚନ ପ୍ରସ୍ତୁତିର ସମୀକ୍ଷା କରିବେ।
ଦିଲ୍ଲୀ ଫେରିବା ପରେ ଆୟୋଗ ତ୍ରିପୁରା, ମେଘାଳୟ ଏବଂ ନାଗାଲାଣ୍ଡ ପାଇଁ ନିର୍ବାଚନ କାର୍ଯ୍ୟକ୍ରମ ଘୋଷଣା କରିପାରନ୍ତି। ଫେବୃଆରୀ ୧୫ରୁ ସିବିଏସଇ ବୋର୍ଡ ପରୀକ୍ଷା ଆରମ୍ଭ ହେବ। ତେଣୁ ଆୟୋଗ ଫେବୃଆରୀ ଦ୍ୱିତୀୟ ସପ୍ତାହ ପୂର୍ବରୁ ଏହି ରାଜ୍ୟଗୁଡିକରେ ନିର୍ବାଚନ କରିବାକୁ ଯୋଜନା କରୁଛନ୍ତି।
ତ୍ରିପୁରାରେ ହେବାକୁ ଥିବା ବିଧାନସଭା ର୍ନିବାଚନରେ ଭୋଟ ହାର ବୃଦ୍ଧି କରିବାକୁ ନିର୍ବାଚନ ଆୟୋଗ ପ୍ରସ୍ତୁତ ହେଉଛନ୍ତି। ଭୋଟରଙ୍କ ସଂଖ୍ୟା ୯୦ ପ୍ରତିଶତରୁ ଅଧିକ ବୃଦ୍ଧି କରିବାକୁ ଆୟୋଗ ମିଶନ-୯୨୯ ଉପରେ କାର୍ଯ୍ୟ କରିବାକୁ ଯାଉଛି। ଏଥିପାଇଁ ୯୨୯ ମତଦାନ କେନ୍ଦ୍ର ଉପରେ ଧ୍ୟାନ ଦିଆଯିବ। ନିର୍ବାଚନ ଆୟୋଗର ଜଣେ ଅଧିକାରୀ କହିଛନ୍ତି ଯେ ୨୦୧୮ ବିଧାନସଭା ନିର୍ବାଚନରେ ଏହି ବୁଥଗୁଡିକରେ ୮୯ ପ୍ରତିଶତରୁ କମ ମତଦାନ ରେକର୍ଡ କରାଯାଇଛି। ବର୍ତ୍ତମାନ ଭୋଟରଙ୍କ ସଂଖ୍ୟା ବୃଦ୍ଧି ପାଇଁ ସଚେତନତା ଅଭିଯାନ ସହିତ ନିର୍ବାଚନ ଅଧିକାରୀମାନେ ବରିଷ୍ଠ ନାଗରିକ ଏବଂ ଭିନ୍ନକ୍ଷମଙ୍କୁ ଭେଟି ଭୋଟ ଦେବାକୁ ନିବେଦନ କରିବେ।
ଏଥି ସହିତ ମେଘାଳୟର ରାଜ୍ୟ ନିର୍ବାଚନ କାର୍ଯ୍ୟାଳୟ ମଧ୍ୟ ଅଧିକରୁ ଅଧିକ ଯୋଗ୍ୟ ଭୋଟରଙ୍କୁ ଭୋଟର ତାଲିକାରେ ଯୋଡିବାରେ ନିୟୋଜିତ ଅଛନ୍ତି। ସିଇଓଙ୍କ କାର୍ଯ୍ୟାଳୟର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ବିଭିନ୍ନ ଜିଲାରେ ଭୋଟର ପଞ୍ଜିକରଣ ଡ୍ରାଇଭ ଆରମ୍ଭ କରାଯାଇଛି।
