ବଇଣ୍ଡା,୩୦।୯(ଡି.ଏନ.ଏ.): ଅନୁଗୋଳ ଜିଲା କିଶୋରନଗର ବ୍ଲକ ବଇଣ୍ଡା ରେଳ ଷ୍ଟେଶନରେ ତତ୍କାଳ ଟିକେଟରେ ଅବ୍ୟବସ୍ଥା ପରିଲକ୍ଷିତ ହେଉଛି। ଏପରି କି ଟିକେଟ୍ ପିଛା ୩ଶହ ଟଙ୍କା ଅଧିକ ନିଆଯାଉଥିବା ବଇଣ୍ଡା ଗ୍ରାମବାସୀ ଗୁରୁବାର ସମ୍ବଲପୁର ରେଳ ବିଭାଗ ଡିଆର୍ଏମ୍ଙ୍କଠାରେ ଅଭିଯୋଗ କରିଛନ୍ତି। ଏହାର ଏକ ନକଲ ଅନୁଗୋଳ ଜିଲାପାଳଙ୍କୁ ପ୍ରଦାନ କରିଛନ୍ତି।
ଅଭିଯୋଗରେ ଗ୍ରାମବାସୀ ଦର୍ଶାଇଛନ୍ତି, ବଇଣ୍ଡା ଷ୍ଟେଶନରେ ତତ୍କାଳ ଟିକେଟ କଟାଯିବା ବେଳେ ଶ୍ରମିକମାନଙ୍କଠାରୁ ୩୦୦ ଟଙ୍କା ଅଧିକ ନିଆଯାଉଛି। ଯେଉଁମାନେ ଅଧିକ ଅର୍ଥ ଦେଉନାହାନ୍ତି ସେମାନଙ୍କୁ ଟିକେଟ ଦେବାରେ ଅବହେଳା କରାଯାଉଛି। ଷ୍ଟେଶନର ଜଣେ ଅଧିକାରୀଙ୍କ ଏଥିରେ ସମ୍ପୃକ୍ତି ରହିଛି। ପୂର୍ବରୁ କିଶୋରନଗର ଅଞ୍ଚଳର ୨ ଜଣ ଶ୍ରମିକ ଏପରି ଅଧିକ ଟଙ୍କା ଦେଇଥିବା ନୁନୁକାପଶି ପଞ୍ଚାୟତ କାର୍ଯ୍ୟାଳୟଠାରେ ଅଭିଯୋଗ କରିଥିଲେ। ଏହି ଷ୍ଟେଶନରେ ତତ୍କାଳ ଟିକେଟ ପ୍ରଦାନ ବେଳେ ବାରମ୍ବାର ଯାତ୍ରୀଙ୍କୁ ହଇରାଣ କରାଯାଉଥିବା ଗ୍ରାମବାସୀ ଅଭିଯୋଗ କରିଛନ୍ତି। ତୁରନ୍ତ ଏଥିପ୍ରତି ରେଳ ବିଭାଗ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେଇ ପଦକ୍ଷେପ ନେବାକୁ ସାଧାରଣରେ ଦାବି ହୋଇଛି। ତେବେ ବଇଣ୍ଡା ରେଳ ଷ୍ଟେଶନ ମାଷ୍ଟର ଉମେଶ ଚନ୍ଦ୍ର ମଲ୍ଲିକ ଅଭିଯୋଗକୁ ଅସ୍ବିକାର କରିଛନ୍ତି। ଷ୍ଟେଶନରେ ତତ୍କାଳ ଟିକେଟ୍ ବିକ୍ରି ବେଳେ କାହାଠାରୁ ଅଧିକ ଅର୍ଥ ନିଆଯାଉ ନ ଥିବା ସେ ପ୍ରକାଶ କରିଛନ୍ତି।
