ଭୁବନେଶ୍ୱର,୨୨।୫: ରାଜ୍ୟର ପ୍ରମୁଖ ଘରୋଇ ଚିକିତ୍ସାଳୟ ଏଲ୍ ଭି ପ୍ରସାଦ ଆଇ ଇନ୍ଷ୍ଟିଚ୍ୟୁଟ (ଏଲ୍ଭିପିଇଆଇ) ଭୁବନେଶ୍ୱରର ମିଥୁ ତୁଳସୀ ଚନରାଇ କ୍ୟାମ୍ପସ୍ ପକ୍ଷରୁ ରବିବାର ରେଟିନୋବ୍ଲାଷ୍ଟୋମା (ଚକ୍ଷୁ କର୍କଟ ରୋଗ)ର ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି ପରିପ୍ରେକ୍ଷୀରେ ଓଲିଉଡ ଅଭିନେତା ସବ୍ୟସାଚୀ ମିଶ୍ର ସମ୍ମାନିତ ଅତିଥି ଭାବେ ଯୋଗ ଦେଇ ଉଭୟ ରୋଗୀ ଓ ସଚେତନତା ପଦଯାତ୍ରାର ଯାତ୍ରୀମାନଙ୍କୁ ଉତ୍ସାହିତ କରିଥିଲେ। ଏପରିକି ସେ ରେଟିନୋବ୍ଲାଷ୍ଟୋମାରୁ ମୁକ୍ତି ପାଇଥିବା ରୋଗୀଙ୍କ ସହ ଏଲଭିପିଇଆଇ ଭୁବନେଶ୍ୱର କ୍ୟାମ୍ପସରେ ବିସ୍ତୃତ ଭାବ ବିନିମୟ କରିଛନ୍ତି।
ଏ ସମ୍ପର୍କରେ ଏଲଭିପିଇଆଇ ଭୁବନେଶ୍ୱରର ଚକ୍ଷୁ କର୍କଟ ରୋଗ ବିଶେଷଜ୍ଞ ଡା. ଦେବଜ୍ୟୋତି ତ୍ରିପାଠୀ କହିଛନ୍ତି, ଶିଶୁମାନଙ୍କଠାରେ ରେଟିନୋବ୍ଲାଷ୍ଟୋମା (ଚକ୍ଷୁ କର୍କଟ) ରୋଗର ପ୍ରାରମ୍ଭିକ ଚିହ୍ନଟ ଓ ଚିକିତ୍ସା ସମ୍ପର୍କରେ ସଚେତନତା ସୃଷ୍ଟି କରାଇବା ଆମର ମୂଳ ଲକ୍ଷ୍ୟ। ଏପରିକି ବ୍ୟାପକ ସଚେତନତାର ଅଭାବ ଏବଂ ବିଳମ୍ବରେ ରୋଗ ନିର୍ଣ୍ଣୟ ଓ ଚିକିତ୍ସା କାରଣରୁ କୌଣସି ଶିଶୁ ଚକ୍ଷୁ କର୍କଟ ରୋଗରେ ମୃତ୍ୟୁ ବରଣ ନ କରନ୍ତୁ ସେଥିପାଇଁ ଏଭଳି ଏକ ପଦଯାତ୍ରାର ଆୟୋଜନ କରାଯାଇଛି। ସେହିଭଳି ରେଟିନୋବ୍ଲାଷ୍ଟୋମା ସଚେତନତା ପଦଯାତ୍ରାରେ ଯୋଗ ଦେଇ ବ୍ୟାପକ ସଚେତନତାର ପ୍ରସାରରେ ସହଯୋଗ କରିଥିବାରୁ ସବ୍ୟସାଚୀ ମିଶ୍ରଙ୍କୁ ଆମେ ଧନ୍ୟବାଦ ଜଣାଉଛୁ। ଏପରିକି ରେଟିନୋବ୍ଲାଷ୍ଟୋମା ରୋଗୀଙ୍କ ପାଇଁ ଅନ୍ୟାନ୍ୟ ସାମାଜିକ ସେବା ଅନୁଷ୍ଠାନ ଏବଂ ବଦାନ୍ୟ ବ୍ୟକ୍ତିବିଶେଷ ତଥା ସରକାରୀ ସଂସ୍ଥାମାନଙ୍କଠାରୁ ମିଳିଥିବା ସହଯୋଗକୁ ମଧ୍ୟ ଆମେ ସ୍ବୀକାର କରୁଛୁ।
ସୂଚନାଯୋଗ୍ୟ ଏଲ୍. ଭି. ପ୍ରସାଦ ଆଇ ଇନଷ୍ଟିଚ୍ୟୁଟ୍ର ଭୁବନେଶ୍ୱର, ହାଇଦ୍ରାବାଦ, ବିଶାଖାପାଟଣା ଓ ବିଜୟୱାଡ଼ା କ୍ୟାମ୍ପସରେ ଆୟୋଜିତ ’ହ୍ବିଟାଥନ୍’ କାର୍ଯ୍ୟକ୍ରମର ଏକ ଅଂଶ ଭାବେ ଉକ୍ତ ପଦଯାତ୍ରାର ଆୟୋଜନ କରାଯାଉଛି।
