ବ୍ରହ୍ମପୁର ଅଫିସ୍,୮।୫: ବ୍ରହ୍ମପୁର ସହରରେ ଦିନକୁ ଦିନ ଉଠା ଦୋକାନୀଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ସହରର ମୁଖ୍ୟ ଛକଠାରୁ ଆରମ୍ଭ କରି ଡାକ୍ତରଖାନା ଭଳି ସମ୍ବେଦନଶୀଳ ଅଞ୍ଚଳ ଗୁଡିକରେ ଉଠା ଦୋକାନୀମାନେ ମନମୁଖୀ ଭାବେ ବ୍ୟବସାୟ କରୁଛନ୍ତି। ଫଳରେ ରାସ୍ତାରେ ଯାତାୟାତରେ ସମସ୍ୟା ସାଙ୍ଗକୁ ଟ୍ରାଫିକ ଜାମ୍ ହେଉଛି। ଏହାକୁ ଏଡାଇବା ପାଇଁ ଗତ କିଛି ଦିନ ତଳେ ବ୍ରହ୍ମପୁର ମହାନଗର ନିଗମ (ବିଏମ୍ସି) ପକ୍ଷରୁ ମର୍ଦ୍ଦରାଜ ଭେଣ୍ଡିଂ ଜୋନ୍ ସମେତ ବଡ ବଜାର, ଗିରି ମାର୍କେଟ, ଗେଟ୍ ବଜାର ଭଳି ମୁଖ୍ୟ ଛକରେ ବସି ରହିଥିବା ବହୁ ବ୍ୟବସାୟୀଙ୍କୁ ଉଚ୍ଛେଦ କରିଥିଲା। ତେବେ ବିଏମ୍ସି ପକ୍ଷରୁ ଉଚ୍ଛେଦ ପରେ ମଧ୍ୟ ବ୍ୟବସାୟୀମାନେ ପୁଣି ଥରେ ରାସ୍ତା ଉପରେ ବ୍ୟବସାୟ କରୁଥିବା ଦେଖିବାକୁ ମିଳିଥିଲା। ଫଳରେ ଶନିବାର ବ୍ରହ୍ମପୁର ବଡ ଡାକ୍ତରଖାନା ପରିସର ବାହାରେ ଉଠା ଦୋକାନୀମାନେ ରାସ୍ତା କବଜା କରୁଥିବା ନେଇ ବାରମ୍ବାର ଅଭିଯୋଗ ପରେ ବିଏମ୍ସି ଏନ୍ଫୋର୍ସମେଣ୍ଟ୍ ଟିମ୍ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଛି। କିନ୍ତୁ ଉଚ୍ଛେଦ ସମୟରେ ଏନ୍ଫୋର୍ସମେଣ୍ଟ୍ ଟିମ୍ ଓ ବ୍ୟବସାୟୀଙ୍କ ମଧ୍ୟରେ ହାତାହାତି ପରିସ୍ଥିତି ସୃଷ୍ଟି ହୋଇଛି। ଏନ୍ଫୋର୍ସମେଣ୍ଟ ଅଧିକାରୀଙ୍କ ସୂତ୍ରରୁ ମିଳିଥିବା ତଥ୍ୟ ମୁତାବକ, ପୂର୍ବରୁ ବଡ ଡାକ୍ତରଖାନା ପରିସର ବାହାରେ ବସୁଥିବା ଉଠା ଦୋକାନୀଙ୍କୁ ଉଚ୍ଛେଦ କରାଯିବା ସହ ବ୍ୟବସାୟ ନ କରିବା ପାଇଁ ତାଗିଦ କରାଯାଇଥିଲା। କିନ୍ତୁ ଉଠା ଦୋକାନୀମାନେ ପୁଣି ବ୍ୟବସାୟ ଆରମ୍ଭ କରିଥିଲେ। ଫଳରେ ଏନ୍ଫୋର୍ସମେଣ୍ଟ୍ ଟିମ୍ ପକ୍ଷରୁ ସେଠାରେ ବସିଥିବା ଦୋକାନୀଙ୍କୁ ଉଚ୍ଛେଦ କରାଯାଇଥିଲା। ଉଚ୍ଛେଦ ସମୟରେ ଜଣେ ମହିଳା ବ୍ୟବସାୟୀ ଓ ଏନ୍ଫୋର୍ସମେଣ୍ଟ୍ ଟିମ୍ ସହ ହାତାହାତି ପରିସ୍ଥିତି ଦେଖିବାକୁ ମିଳିଥିଲା। ପରେ ପୋଲିସ ପ୍ରଶାସନ ଓ ଟିମ୍ ସହାୟତାରେ ଉଚ୍ଛେଦ କାର୍ଯ୍ୟ ଜାରି ରହିଥିଲା। ଉଚ୍ଛେଦ ସମୟରେ ବିଏମ୍ସି ଏନ୍ଫୋର୍ସମେଣ୍ଟ୍ ଅଧିକାରୀ ତରୁଣକାନ୍ତଙ୍କ ସମେତ ବହୁ ସଦସ୍ୟ ଉପସ୍ଥିତ ଥିଲେ।
