କୋଲକାତା,୧୬।୧ : ରବିବାର ରାତିରେ ଗଙ୍ଗାସାଗରରୁ ତୀର୍ଥଯାତ୍ରୀଙ୍କୁ ନେଇ ଯାଉଥିବା ଦୁଇଟି ଡଙ୍ଗା ମଝି ସମୁଦ୍ରରେ ଫସି ରହିଥିଲା। ସୂଚନା ଅନୁଯାୟୀ, ଏଥିରେ ୫୦୦ରୁ ୬୦୦ ତୀର୍ଥଯାତ୍ରୀ ଥିଲେ। ଅଟକି ରହିଥିବା ଯାତ୍ରୀଙ୍କ ବିଷୟରେ ସୂଚନା ପାଇବା ପରେ ରାଜ୍ୟ ପ୍ରଶାସନ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରିଥିଲା।
ଗଙ୍ଗାସାଗରରେ ଫସି ରହିଥିବା ତୀର୍ଥଯାତ୍ରୀଙ୍କୁ ଉଦ୍ଧାର କରିବା ପାଇଁ ଇଣ୍ଡିଆନ କୋଷ୍ଟଗାର୍ଡ ହୋଭରକ୍ରାଫ୍ଟ ନିୟୋଜିତ କରାଯାଇ ସେମାନଙ୍କୁ ସେଠାରୁ ସ୍ଥାନାନ୍ତର କରାଯାଇଛି। ଘନ କୁହୁଡ଼ି ଯୋଗୁ ବାଟ ନ ପାଇ ତୀର୍ଥଯାତ୍ରୀଙ୍କୁ ନେଇ ଯାଉଥିବା ଦୁଇ ଡଙ୍ଗା ମଝି ସମୁଦ୍ରରେ ଅଟକି ରହିଥିଲା।
ପ୍ରତିବର୍ଷ ଗଙ୍ଗାସାଗରରେ ’ମକର ସଂକ୍ରାନ୍ତି’ ଅବସରରେ ଏକ ମେଳା ଆୟୋଜିତ ହୋଇଥାଏ। ଦେଶର ବିଭିନ୍ନ ସ୍ଥାନରୁ ଲକ୍ଷ ଲକ୍ଷ ଶ୍ରଦ୍ଧାଳୁ ଏଠାକୁ ବୁଡ଼ ପକାଇବାକୁ ଆସିଥାନ୍ତି। ମେଳା ଦାୟିତ୍ୱରେ ଥିବା ପଶ୍ଚିମବଙ୍ଗର ଶକ୍ତି ଏବଂ କ୍ରୀଡା ମନ୍ତ୍ରୀ ଅରୁପ ବିଶ୍ୱାସ କହିଛନ୍ତି ଯେ ଜାନୁୟାରୀ ୧୪ ତାରିଖରୁ ପ୍ରାୟ ୪୦ ଲକ୍ଷ ଶ୍ରଦ୍ଧାଳୁ ଗଙ୍ଗାସାଗର ମେଲାକୁ ଆସିଛନ୍ତି, ସେମାନଙ୍କ ମଧ୍ୟରୁ ଅଧିକାଂଶ ନିଜ ଘରକୁ ଫେରିଛନ୍ତି।
ସେ କହିଛନ୍ତି ଯେ ଶନିବାର ସନ୍ଧ୍ୟା ୬ଟା ୫୩ରେ ମକର ସଂକ୍ରାନ୍ତି ସ୍ନାନ ଆରମ୍ଭ ହୋଇଥିଲା। ପ୍ରବଳ ଥଣ୍ଡା ସତ୍ତ୍ୱେ ଲକ୍ଷ ଲକ୍ଷ ଶ୍ରଦ୍ଧାଳୁ ବୁଡ଼ ପକାଇ କପିଲ ମୁନି ଆଶ୍ରମ ପରିଦର୍ଶନ କରିଥିଲେ।
ଏହି ମେଳାରେ ଶନିବାର ଦୁଇଜଣ ଶ୍ରଦ୍ଧାଳୁଙ୍କ ମୃତ୍ୟୁ ଘଟିଛି। ସେମାନେ ହେଉଛନ୍ତି ଓଡିଶାର ବାସିନ୍ଦା ୭୨ ବର୍ଷ ବୟସ୍କ ପ୍ରତାପ ଚନ୍ଦ୍ର ଗିରି ଏବଂ ବିହାରର ୭୩ ବର୍ଷ ବୟସ୍କା ବାୟୋଲା ଦେବୀ ବୋଲି ଜଣା ପଡିଛି।
ମନ୍ତ୍ରୀ ସୂଚନା ଦେଇଛନ୍ତି ଯେ ଏପର୍ଯ୍ୟନ୍ତ ୩୫୦୦ ଶ୍ରଦ୍ଧାଳୁ ‘ଇ-ସ୍ନାନ’ ସେବାର ଲାଭ ନେଇଛନ୍ତି, ଯେଉଁଥିରେ ଗଙ୍ଗାସାଗରରୁ ପବିତ୍ର ଜଳ ଅନଲାଇନରେ ଅର୍ଡର କରିବା ପରେ ତାହା ଲୋକ ଘରେ ପହଞ୍ଚିଥାଏ। ସେ କହିଛନ୍ତି ଯେ ବର୍ତ୍ତମାନ ପର୍ଯ୍ୟନ୍ତ ଗଙ୍ଗାସାଗର ମେଳା ସମୟରେ ଇ-ଦର୍ଶନ ମାଧ୍ୟମରେ ପ୍ରାୟ ୬୦ ଲକ୍ଷ ଶ୍ରଦ୍ଧାଳୁ କପିଲ ମୁନି ଆଶ୍ରମ ପରିଦର୍ଶନ କରିଛନ୍ତି।
