ଜଗତ୍ସିଂହପୁର, ୨୩ା୪ (ପ୍ରମୋଦ କୁମାର ନାୟକ):ପ୍ରବଳ ଗ୍ରୀଷ୍ମପ୍ରବାହ ଯୋଗୁ ଜଗତ୍ସିଂହପୁର ସହରରେ ଜଳସଙ୍କଟ ସୃଷ୍ଟି ହୋଇଛି। ଗଡିଆ, ପୋଖରୀଗୁଡିକ ଶୁଖିଯିବା ସହ ଭୂତଳ ଜଳସ୍ତର ହ୍ରାସ ପାଇବାରେ ଲାଗିଛି। ଏଭଳି ଗ୍ରୀଷ୍ମପ୍ରବାହ ଜାରି ରହିଲେ ଆଗକୁ ପରିସ୍ଥିତି ଜଟିଳ ରୂପ ନେବା ସମ୍ଭାବନା ରହିଛି। ମଙ୍ଗଳବାର ଜଗତ୍ସିଂହପୁରର ତାପମାତ୍ରା ୪୧ ଡିଗ୍ରୀ ସେଲ୍ସିୟସ୍ ଉପରେ ଥିବା ଜଣାଯାଇଛି। ପ୍ରତିବର୍ଷ ତାପମାତ୍ରା ନିୟନ୍ତ୍ରଣ ପାଇଁ ବ୍ୟାପକ ଚାରାରୋପଣ, ଜଳାଶୟ ପୁନରୁଦ୍ଧାର ଆଦି କରାଯାଉ ବୋଲି ଦାବି ହୋଇ ଆସୁଛି। କିନ୍ତୁ ସରକାରୀସ୍ତରରେ ସେଭଳି କିଛି କରାଯାଉନାହିଁ। ବନ ବିଭାଗ, ଶିଳ୍ପସଂସ୍ଥା ଆଦି ଚାରାରୋପଣ ଆଳରେ କାଗଜକଲମରେ ଲକ୍ଷାଧିକ ଟଙ୍କା ଖର୍ଚ୍ଚ ଦର୍ଶାଉଥିଲେ ମଧ୍ୟ ବାସ୍ତବ କ୍ଷେତ୍ରରେ ଉଦ୍ଦେଶ୍ୟ ପୂରଣ ହୋଇପାରୁନାହିଁ। ବିଶେଷକରି ଜଳାଶୟଗୁଡିକର ପୁନରୁଦ୍ଧାର ଅପରିହାର୍ଯ୍ୟ ଥିଲେ ସୁଦ୍ଧା ତାହା କରାଯାଉନାହିଁ। ଜଗତ୍ସିଂହପୁର ସହରରେ ଏଥିମଧ୍ୟରେ ଏକାଧିକ ଜଳାଶୟ ପୋତି ହୋଇଯାଇଥିବା ବେଳେ ଆଉ କେତୋଟିରୁ କିଛି ଦିନ ଭିତରେ ପାଣି ଶୁଖିଯିବ। ତା’ପରେ ଗାଈ, ବଳଦ, ମଇଁଷି ଆଦି ପ୍ରାଣୀଙ୍କ ପାଇଁ ସମସ୍ୟା ବଢ଼ିଯିବ। ଏ ପରିସ୍ଥିତିରେ ଜିଲା ପ୍ରଶାସନ ତରଫରୁ ବିସ୍ତୃତ ସମୀକ୍ଷା କରାଯିବା ସହ ଆବଶ୍ୟକ ପଦକ୍ଷେପ ଗ୍ରହଣ କରାଯିବାକୁ ସାଧାରଣରେ ଦାବି ହେଉଛି।
ଜଗତ୍ସିଂହପୁର ସହର ୱାର୍ଡ ନଂ. ୫ ଅନ୍ତର୍ଗତ ମାଧପୁର ଲାଲାସାହିସ୍ଥିତ ରାଧାମାଧବଜୀଉ ଏବଂ ଓହଳ ନୂଆବାଗ ଭୋଇସାହି ପାର୍ଶ୍ୱରେ ଥିବା ରାଧାମାଧବଜୀଉ ଜଳାଶୟର ପୁନରୁଦ୍ଧାର ଆବଶ୍ୟକ ଅଛି। ସେହିପରି ଦେଉଳୀ ଗ୍ରାମେଶ୍ୱର ରାଢ଼ିଆଣୀ ମନ୍ଦିର ନିକଟ ଜଳାଶୟ (ଘୋଷ ପୋଖରୀ) ପୁନରୁଦ୍ଧାର ଅଭାବରୁ ପୋତି ହୋଇଚାଲିଛି। ଦେଉଳୀ ଗ୍ରାମେଶ୍ୱର ବାରିକ ସାହି ଜଳାଶୟଟି ପୋତି ହୋଇଯିବା ସହ ପରିତ୍ୟକ୍ତ ଅବସ୍ଥାରେ ଅଛି। ୱାର୍ଡ ନଂ. ୩ ଅନ୍ତର୍ଗତ ଗୋପାଳସାଗର ଗାଁ ଭିତରେ ଥିବା ଜଳାଶୟ ପୁନରୁଦ୍ଧାର ଆବଶ୍ୟକ ରହିଛି। ୱାର୍ଡ ନଂ.୨ ଅନ୍ତର୍ଗତ ବଡ଼ବାଗ ସର୍ବାଙ୍ଗସୁନ୍ଦରୀଙ୍କ ମନ୍ଦିର ଏବଂ ମୁଚୁକୁନ୍ଦ ସୋମନାଥ ମନ୍ଦିର ନିକଟରେ ଥିବା ପୋଖରୀ ମଧ୍ୟ ପୋତି ହୋଇଗଲାଣି। କେବଳ ମାଛଗାଁ-କନ୍ଦରପୁର ରାସ୍ତାର ଗୋପାଳସାଗର ରାସ୍ତା ପାର୍ଶ୍ୱ ପାଖାପାଖି ୪୦ ଡେସିମିଲ ଜମିରେ ଥିବା ବଡ ଜଳାଶୟଟି ଭଲ ସ୍ଥିତିରେ ଥିଲେ ମଧ୍ୟ ଏହାର ପୁନରୁଦ୍ଧାର ଆରମ୍ଭ ହୋଇଛି। ଏହି ଜଳାଶୟଟି ଗୋପାଳଜୀଉଙ୍କ ନାମରେ ଥିଲେ ସୁଦ୍ଧା ଜଗତ୍ସିଂହପୁର ପୌର ପରିଷଦ ପକ୍ଷରୁ ପୂର୍ବରୁ ଉନ୍ନତୀକରଣ ପାଇଁ ୧୩ ଲକ୍ଷ ଟଙ୍କା ଟଙ୍କା ଖର୍ଚ୍ଚ କରାଯାଇଥିବା ବେଳେ ଏବେ ପାଖାପାଖି ୩୦ ଲକ୍ଷ ଟଙ୍କା ବ୍ୟୟ ବରାଦ କରାଯାଇଛି। ଏବେ ପୋଖରୀ ଶୁଖାଯାଇ ପଙ୍କ ଉଦ୍ଧାର କାମ ଆରମ୍ଭ ହୋଇଛି। ସିପି ମକୁନ୍ଦପୁରସ୍ଥିତ ବିଧେଇପୋଖରୀ ଜବରଦଖଲ ହୋଇଥିବା ବେଳେ କେତେକାଂଶ ଉଦ୍ଧାର କରାଯାଇଛି। ଖେରସସ୍ଥିତ କନିୟର ପୋଖରୀ ଶୁଖିଯାଇଛି। ତେବେ ଏହି ପୋଖରିର ପୁନରୁଦ୍ଧାର ଏବଂ ସୌନ୍ଦର୍ଯ୍ୟକରଣ ପାଇଁ ସରକାରଙ୍କ ନିକଟକୁ ୨ କୋଟି ଟଙ୍କାର ପ୍ରସ୍ତାବ ଯାଇଥିବା କୁହାଯାଇଥିଲେ ସୁଦ୍ଧା ଅନୁମୋଦନ ହୋଇନାହିଁ। ଏହା ଅନୁମୋଦନ ହେଲେ ମାଟି ଖୋଳାଯିବା ସହ ବୋଟିଂ କମ୍ପ୍ଲେକ୍ସ ଓ ପାର୍ଶ୍ୱରେ ପାର୍କ କରାଯିବ ବୋଲି ଚିନ୍ତା କରାଯାଇଛି। ୧୮ ନଂ. ୱାର୍ଡ ବେହେରା ସାହି ପାଖ ପୋଖରୀ ଜନସାଧାରଣଙ୍କ ବହୁ କାମରେ ଲାଗେ। ଏହାର ଚାରିପଟେ ମଶାଣି ଅଛି। କୌଣସି ଲୋକଙ୍କ ମୃତ୍ୟୁ ହୋଇଗଲେ ଶୁଦ୍ଧିକ୍ରିୟା ଆଦି ସେଠାରେ ହୁଏ। ଏଥିରୁ ପାଣି ଶୁଖିଯିବା ଦ୍ୱାରା ଲୋକେ, ଗୃହପାଳିତ ପ୍ରାଣୀ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତି। ପଞ୍ଚାୟତଗୁଡ଼ିକୁ ମୋ ପୋଖରୀ ଯୋଜନାରେ ଟଙ୍କା ଆସୁଛି। କିନ୍ତୁ ସହରରେ ଜଳଶୟର ପୁନରୁଦ୍ଧାର ପାଇଁ ସରକାର ନୀରବ ରହିବା ଅସନ୍ତୋଷର କାରଣ ପାଲଟିଛି। ଏହାବାଦ୍ କେତୋଟି ବେସରକାରୀ ଜଳାଶୟରେ ଅଟ୍ଟାଳିକା ତିଆରି ହୋଇଗଲାଣି। ସହରାଞ୍ଚଳ ଛାପରେ ଜଳାଶୟଗୁଡିକର ସ୍ଥିତି ହଜିଯାଉଛି। କିନ୍ତୁ ଏବେ ଯେତୋଟି ଅଛି ତାର ପୁନରୁଦ୍ଧାର ନ ହେଲେ ଆଗକୁ ସହରରେ ଜଳ ସଙ୍କଟ ସମସ୍ୟା ଜଟିଳ ହେବା ସମ୍ଭାବନା ରହିଛି। ଏ ସମ୍ପର୍କରେ ଜଗତ୍ସିଂହପୁର ପୌରାଧ୍ୟକ୍ଷା ଅର୍ଚ୍ଚନା ସିଂହଙ୍କୁ ପଚାରିବାରୁ ସରକାର ପର୍ଯ୍ୟାୟକ୍ରମେ ପ୍ରକଳ୍ପଗୁଡିକ ହାତକୁ ନେଉଥିବାରୁ ଜଳାଶୟଗୁଡିକର ଶତପ୍ରତିଶତ ପୁନରୁଦ୍ଧାରରେ ବିଳମ୍ବ ହେଉଥିବା କହିଛନ୍ତି।
