ଭୁବନେଶ୍ୱର,୨୬।୭(ବ୍ୟୁରୋ): କରୋନା ମହାମାରୀ ଅସ୍ତବ୍ୟସ୍ତ କରୁଥିବା ବେଳେ ରାଜ୍ୟରେ ଅନାବୃଷ୍ଟି ଚାଷ ପାଇଁ ଘାତକ ହେଲାଣି। ଜୁଲାଇ ଶେଷ ହେବାକୁ ବସିଥିବା ବେଳେ ରାଜ୍ୟର ଅଧା ଜିଲାରେ ଏବେ ମରୁଡ଼ି ପରିସ୍ଥିତି ମୁଣ୍ଡ ଟେକିଲାଣି। ଧାନତଳି ରୁଆ ହୋଇପାରୁ ନାହିଁ। ଚାଷୀ ମୁଣ୍ଡରେ ହାତଦେଇ ବସିଲେଣି। ୧୨ ଜିଲାରେ ପରିସ୍ଥିତି ସଙ୍ଗିନ ହେଲାଣି। ସେଥି ମଧ୍ୟରେ ପୁରୀ ଜିଲାରେ ସ୍ବାଭାବିକଠାରୁ ୪୭% କମ୍ ବର୍ଷା ହୋଇଥିବା ବେଳେ ବାଲେଶ୍ୱରରେ ୩୨%, ଭଦ୍ରକରେ ୨୩%, କଟକରେ ୩୬%, ଜଗତ୍ସିଂହପୁର ୨୩%, ଯାଜପୁରରେ ୩୯%, କେନ୍ଦ୍ରାପଡ଼ାରେ ୪୦%, ଖୋର୍ଦ୍ଧାରେ ୪୦%, କେନ୍ଦୁଝରରେ ୧୯%, ସୁବର୍ଣ୍ଣପୁରରେ ୨୫%, ମୟୂରଭଞ୍ଜରେ ୧୮% ଏବଂ ନୟାଗଡ଼ ଜିଲାରେ ୧୯ ପ୍ରତିଶତ କମ୍ ବର୍ଷା ହୋଇଥିବା ଭାରତୀୟ ପାଣିପାଗ ବିଭାଗରୁ ସୂଚନା ମିଳିଛି। ଆସନ୍ତା ସପ୍ତାହକ ମଧ୍ୟରେ ବର୍ଷା ନ ହେଲେ ଅଧିକାଂଶ ଜିଲାରେ ଧାନ ଚାଷ ଉଜୁଡିଯିବ।
ଦକ୍ଷିଣ-ପଶ୍ଚିମ ମୌସୁମୀ ଧୋକା ଦେଇଛି। ଯେତିକି ବର୍ଷା ହେବା କଥା ତାହା ହେଉ ନାହିଁ। ରୁଆ ବେଉଷଣ କରି ନ ପାରି ଚାଷୀ ଆକାଶକୁ ଚାହିଁ ରହିଛନ୍ତି। ଚଳିତ ବର୍ଷ ସ୍ବାଭାବିକ ବର୍ଷା ହେବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଥିଲା। କିନ୍ତୁ ଜୁଲାଇ ଶେଷ ହେବାକୁ ବସିଲାଣି ରାଜ୍ୟରେ ସ୍ବାଭାବିକ ବର୍ଷା ନାହିଁ। ଜୁନ୍ ପହିଲାରୁ ଜୁଲାଇ ୨୫ ପର୍ଯ୍ୟନ୍ତ ରାଜ୍ୟରେ ସ୍ବାଭାବିକଠାରୁ ୬ ପ୍ରତିଶତ କମ୍ ବର୍ଷା ହୋଇଛି। ଏହି ସମୟ ମଧ୍ୟରେ ରାଜ୍ୟରେ ୪୮୬.୭ ମିଲିମିଟର ବର୍ଷା ହେବା କଥା। କିନ୍ତୁ ୪୫୫.୫ ମିଲିମିଟର ବର୍ଷା ହୋଇଥିବା ଭାରତୀୟ ପାଣିପାଗ ବିଭାଗ ସୂଚନାରୁ ଜଣାପଡ଼ିଛି।
ଅନିୟମିତ ବୃଷ୍ଟିପାତ ରାଜ୍ୟର ଚାଷ କାର୍ଯ୍ୟକୁ ଗଭୀର ଭାବେ ପ୍ରଭାବିତ କରୁଛି। ୧୯୯୨ରେ ରାଜ୍ୟରେ ସ୍ବାଭାବିକ ବର୍ଷା ୮୫.୪ ପ୍ରତିଶତ ହୋଇଥିବା ବେଳେ ୨୦୧୬ରେ ଏହା ୮୧.୩ ପ୍ରତିଶତକୁ ଖସିଆସିଛି। ୧୯୯୨ ଜୁନ୍ରେ ରାଜ୍ୟରେ ୧୮୫.୮ ମିଲିମିଟର ବର୍ଷା ହୋଇଥିବା ବେଳେ ଜୁଲାଇରେ ୩୯୯.୨ ମିଲିମିଟର ବର୍ଷା ହୋଇଥିଲା। ତେବେ ୨୦୧୬ ଜୁନ୍ରେ ବର୍ଷା ୧୫୯.୫ ମିଲିମିଟର ଏବଂ ଜୁଲାଇରେ ୨୭୭.୮ ମିଲିମିଟରକୁ ଖସିଆସିଛି। ୨୦୧୯ରେ ଜୁନ୍ ଓ ଜୁଲାଇରେ ରାଜ୍ୟରେ ୧୭.୭ ପ୍ରତିଶତ କମ୍ ବର୍ଷା ହୋଇଥିବା ରେକର୍ଡ କରାଯାଇଛି। ଚଳିତ ବର୍ଷ ମୌସୁମୀ ଜୁନ୍ ୧୧ରେ ରାଜ୍ୟକୁ ପ୍ରବେଶ କରିଥିଲା। ଜୁନରେ ୨୭ ପ୍ରତିଶତ ଅଧିକ ବର୍ଷା ହୋଇଥିବାବେଳେ ଜୁଲାଇ ୨୫ ସୁଦ୍ଧା ୬% କମ୍ ବର୍ଷା ହୋଇଛି। ଜୁନ୍ରେ ୨ଟି ଲଘୁଚାପ ହୋଇଥିବା ବେଳେ ଜୁଲାଇରେ ଆଦୌ ହୋଇନାହିଁ। ଏପରିକି ମୌସୁମୀ ମଧ୍ୟ ଦୁର୍ବଳ ରହିଛି। ଆସନ୍ତା ୩୦ ତାରିଖ ଯାଏ ରାଜ୍ୟରେ ବର୍ଷା ହେବାର କୌଣସି ସୂଚନା ଦେଖାଯାଉ ନ ଥିବାରୁ ପରିସ୍ଥିତି ଆହୁରି ବିଗିଡ଼ିବା ନେଇ ଅନୁମାନ କରାଯାଇଛି। ତେବେ ଆସନ୍ତା ୩ ତାରିଖରେ ଉତ୍ତର ପଶ୍ଚିମ ବଙ୍ଗୋପ ସାଗରରେ ଏକ ଲଘୁଚାପ ସୃଷ୍ଟି ହେବା ସମ୍ଭାବନା ରହିଛି। ଏହା ଚାଷୀଙ୍କ ପାଇଁ ଆଶ୍ୱସ୍ତି ଆଣିବ। ଲଘୁଚାପ ପ୍ରଭାବରେ ଜୁଲାଇ ୩୦ ରାତିରୁ ଦକ୍ଷିଣ ଓଡ଼ିଶାରେ ବର୍ଷା ହେବାର ସମ୍ଭାବନା ରହିଛି। ଅଗଷ୍ଟ ୨ରୁ ଉତ୍ତର ଏବଂ ଉପକୂଳ ଓଡ଼ିଶାର ବିଭିନ୍ନ ଜିଲାରେ ପ୍ରବଳ ବର୍ଷା ହେବ ବୋଲି ଅନୁମାନ କରାଯାଇଛି। ବିଶେଷକରି କେନ୍ଦ୍ରାପଡ଼ା, ଜଗତ୍ସିଂହପୁର, କଟକ, ଖୋର୍ଦ୍ଧା, ପୁରୀ, ବାଲେଶ୍ୱର, ଭଦ୍ରକ, ମୟୂଭରଞ୍ଜ ଜିଲାର ଅଧିକାଂଶ ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ହେବ ବୋଲି ପୂର୍ବାନୁମାନ କରାଯାଇଛି।
