ଦାରିଙ୍ଗବାଡି,୧୫।୦୩(ଡି.ଏନ.ଏ): ସାରା ରାଜ୍ୟରେ ଡ୍ରାଇଭର ମହାସଂଘ ପକ୍ଷରୁ ୧୦ ଦଫା ଦାବିରେ ଷ୍ଟିୟରିଂ ଛାଡ ଆନ୍ଦୋଳନ କରାଯାଇଛି। ଏଥିରେ କନ୍ଧମାଳ ଜିଲା ଦାରିଙ୍ଗବାଡି ଡ୍ରାଇଭର ମହାସଙ୍ଘ ସଙ୍ଘ ମଧ୍ୟ ସାମିଲ ହେବା ସହ ବ୍ଲକର ୨୫ ପଞ୍ଚାୟତର ପ୍ରାୟ ୪ ଶହ ଡ୍ରାଇଭର ଏହି ଆନ୍ଦୋଳନରେ ସାମିଲ ହୋଇଛନ୍ତି। ଦାରିଙ୍ଗବାଡି ଡ୍ରାଇଭର ମହାସଙ୍ଘର ସଭାପତି ପ୍ରଭଞ୍ଜନ ନାୟକଙ୍କ ନେତୃତ୍ୱରେ ଉପସଭାପତି ସନ୍ତୋଷ ଦିଗାଲ, ସଞ୍ଜୟ ମାଳାବିଶୋଇଙ୍କ ସମେତ ବହୁ କର୍ମକର୍ତ୍ତା ବିକ୍ଷୋଭ କରିଛନ୍ତି। ଉକ୍ତ ବ୍ଲକର ବୁଡଗୁଡା ପଞ୍ଚାୟତ ସମେତ ସିମନବାଡି, ବ୍ରାମୁଣିଗାଁ, କାଟିଙ୍ଗିଆ, ଝିଞ୍ଜିରୀଗୁଡା, ଗଦାପୁର, ସିକରମାହା, ଦାରିଙ୍ଗବାଡିର ଚାରିଛକ, ତିନିଛକ ଏବଂ ଗଞ୍ଜାମ କନ୍ଧମାଳ ସୀମା ବାଇମାଲା ନିକଟରେ ମହାସଙ୍ଘର ସଦସ୍ୟ, କର୍ମକର୍ତ୍ତାମାନେ ଏକାଠି ହୋଇ ବିକ୍ଷୋଭ କରିବା ସହ ପିକେଟିଂ କରୁଛନ୍ତି। ବିଭିନ୍ନ ସ୍ଥାନରୁ ଯେଉଁ ହଳଦିଆ ନମ୍ବର ପ୍ଲେଟ ରହିଥିବା ଗାଡିଗୁଡିକୁ ଅଟକାଇବାରୁ ଚାପା ଉତ୍ତେଜନା ଦେଖାଯାଇଛି। ଡ୍ରାଇଭର ମହାସଙ୍ଘ ପକ୍ଷରୁ ସମସ୍ତ ଯାତାୟତ କରୁଥିବା ଗାଡି ଗୁଡିକୁ ଅଟକାଇ ତାଙ୍କୁ ସମର୍ଥନ କରିବାକୁ ନିବେଦନ କରାଯାଉଥିବା ମହାସଙ୍ଘ ପକ୍ଷରୁ କୁହାଯାଇଛି। ସେମାନଙ୍କ ପ୍ରମୁଖ ଦାବି ଗୁଡିକ ମଧ୍ୟରେ ଡ୍ରାଇଭରଙ୍କୁ କରୋନା ଯୋଦ୍ଧା ଘୋଷଣା, ୫ ଲକ୍ଷ ଟଙ୍କା ବିନିମୟରେ ଆବାସ ଯୋଜନାରେ ଗୃହ ଯୋଗାଇବା, ୫୫ ବୟସ ପରେ ମାସକୁ ୫ ହଜାର ଟଙ୍କା ପେନସନ, ଗାଡି ପାର୍କିଂ ସୁବିଧା, ଡ୍ରାଇଭରଙ୍କ ବିଶ୍ରାମଗାର, ଡ୍ରାଇଭରଙ୍କୁ ଦିତୀୟ ସୈନିକର ମାନ୍ୟତା, ସେମାନଙ୍କ ପିଲାଙ୍କୁ ଉଚ୍ଚ ଶିକ୍ଷାର ବ୍ୟବସ୍ଥା ଆଦି ଦାବିଗୁଡିକ ରହିଛି। ଏହି ସବୁ ଦାବି ପୁରଣ କରା ନ ଗଲେ ଡ୍ରାଇଭର ସଙ୍ଘ ତାଙ୍କ ପରିବାର, ପିଲାଛୁଆଙ୍କୁ ନେଇ ରାଜରାସ୍ତାରେ ଆନ୍ଦୋଳନ କରିବାକୁ ଦାରିଙ୍ଗବାଡି ଡ୍ରାଇଭର ମହାସଙ୍ଘ ଚେତାବନୀ ଦେଇଛି।
