ଛତ୍ରପୁର,୩୦।୭(ଡି.ଏନ୍.ଏ.): ଗଞ୍ଜାମ ଜିଲା ଚମାଖଣ୍ଡି ଥାନା ଅଧୀନ ରଘୁନାଥପୁର ନିକଟସ୍ଥ ଜାତୀୟ ରାଜପଥରେ ଶନିବାର ସକାଳେ ଏକ ଦୁର୍ଘଟଣା ଘଟିଛି। ବ୍ରହ୍ମପୁରରୁ ଛତ୍ରପୁର ଯାଉଥିବା ଏକ ପିକ୍ଅପ୍ ଭ୍ୟାନ (ଓଡି ୦୭ ଏଏଚ୍ ୬୨୨୨) ଭାରସାମ୍ୟ ହରାଇ ଓଲଟି ପଡିଛି। ଫଳରେ ପିକ୍ଅପ୍ ଭ୍ୟାନ ଚାଳକ ବ୍ରହ୍ମପୁର ସହର ପାଣିଗ୍ରାହୀ ପେଣ୍ଠ ସାହିର ଗୋବିନ୍ଦ ଚନ୍ଦ୍ର ମହାନ୍ତି (୪୮)ଙ୍କ ଘଟଣାସ୍ଥଳରେ ମୃତ୍ୟୁ ଘଟିଛି। ଖବର ପାଇ ଏସ୍ପିଓ ସନ୍ତୋଷ କୁମାର ପାଢ଼ୀ ଏବଂ ରାହୁଲ ସେଠୀ ପହଞ୍ଚିବା ପରେ ଦମକଳ ବାହିନୀ ଓ ଚମାଖଣ୍ଡି ଥାନା ପୋଲିସକୁ ଖବର ଦେଇଥିଲେ । ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଛତ୍ରପୁର ହସ୍ପିଟାଲକୁ ପଠାଇଛି। ଏନେଇ ପୋଲିସ ଏକ ଦୁର୍ଘଟଣା ମାମଲା ରୁଜୁ କରି ଅଧିକ ତଦନ୍ତ ଚଳାଇଛି।
