ଦାରିଙ୍ଗବାଡ଼ି,୨ା୨(ଡି.ଏନ୍.ଏ.): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ସିମନବାଡ଼ି ପଞ୍ଚାୟତ ଅଞ୍ଚଳ ଡକରବାଡ଼ି ଏବଂ ଗବାଟବାଡ଼ି ଗ୍ରାମରେ ପିଇବା ପାଣି ସମସ୍ୟା ଉତ୍କଟରୂପ ଧାରଣ କରିଛି। ଖରାଦିନ ପୂର୍ବରୁ ପାନୀୟଜଳ ଅଭାବ ଦେଖିବାକୁ ମିଳିଛି। ଫଳରେ ଗ୍ରାମବାସୀ ନିକଟ ଚୁଆ, ନାଳରୁ ପାଣି ସଂଗ୍ରହ କରି ପିଉଛନ୍ତି। ଏହାକୁ ନେଇ ଉଭୟ ଗ୍ରାମବାସୀ ବାରମ୍ବାର ସ୍ଥାନୀୟ ଜଳଯୋଗାଣ ଦାୟିତ୍ୱରେ ଥିବା ଅସ୍ଥାୟୀ କର୍ମଚାରୀଙ୍କୁ ଜଣାଇଲେ ସୁଦ୍ଧା ପାଇପ ଯୋଗେ ଜଳଯୋଗାଣ ବନ୍ଦ ରହିଛି। ସେହିପରି ଡକରବାଡ଼ି ଗ୍ରାମର ଅନେକ ସ୍ଥାନରେ ପାଇପ ଫାଟି ରହିଥିଲେ ସୁଦ୍ଧା ତାକୁ ମରାମତି କରାଯାଉନାହିଁ। ସରକାରଙ୍କ ବହୁବିଧ ଯୋଜନାରେ ପାଇପ ଯୋଗେ ଘରକୁ ପାଇପ ଯୋଗାଇ ଦିଆଯାଇଥିଲେ ସୁଦ୍ଧା ପାଣିର ଅଭାବ ଦେଖାଯିବା ସହ ଘରେ ଘରେ ସଠିକ୍ ଭାବେ ଜଳ ପହଞ୍ଚିପାରୁନି। ଉଭୟ ଗ୍ରାମ ପାଖାପାଖି ରହିଥିବାରୁ ଗୋଟିଏ ପାଣିଟାଙ୍କିରୁ ଜଳ ଯୋଗାଣ କରାଯାଉଛି। ତେବେ ଏବେ ଜଳ ଯୋଗାଣ ବନ୍ଦ ଯୋଗୁ ଦୁଇଟିଯାକ ଗ୍ରାମ ପ୍ରଭାବିତ ହେଉଛି। ଜଳାଭାବ ଯୋଗୁ ଗ୍ରାମବାସୀ ବହୁ ହଇରାଣ ଭୋଗୁଥିବା ଗ୍ରାମର ନୀଳମଣି ସାହୁ, ରାମଦେଉ ପ୍ରଧାନ, ମେସୁରା ପ୍ରଧାନ ପ୍ରମୁଖ କହିଛନ୍ତି। ତୁରନ୍ତ ଜଳଯୋଗାଣର ବ୍ୟବସ୍ଥା କରାଯିବା ପାଇଁ ଉଭୟ ଗ୍ରାମବାସୀ ଦାବି କରିଛନ୍ତି।
