ଦିଗପହଣ୍ଡି,୨୧।୪(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ସହର ସମେତ ଆଖପାଖ ଅଞ୍ଚଳରେ ପ୍ରଚଣ୍ଡ ଗ୍ରୀଷ୍ମ ପ୍ରବାହ ଯୋଗୁ ଜନଜୀବନ ଅସ୍ତବ୍ୟସ୍ତ ହୋଇପଡୁଛି। ଏଭଳି ସମୟରେ ଦିଗପହଣ୍ଡି ସହରରେ ମିଳୁନି ପିଇବା ପାଣି। ସ୍ଥାନୀୟ ଜନସ୍ବାସ୍ଥ୍ୟ ବିଭାଗ ପାଇପ ଯୋଗେ ପାନୀୟଜଳ ଯୋଗାଣ ସମୟ ନିର୍ଘଣ୍ଟ ସ୍ଥିର ନକରି ନିଜ ଇଚ୍ଛାରେ ଖୁବ କମ ସମୟ ପାଇଁ ପାନୀୟଜଳ ଯୋଗାଣ କରୁଥିବାରୁ ଜନ ଅସନ୍ତୋଷ ତେଜିବାରେ ଲାଗିଛି । ପ୍ରତିବାଦରେ ଦିଗପହଣ୍ଡି ସହରର ବହୁ ସଂଖ୍ୟକ ବାସିନ୍ଦା ସୋମବାର ସ୍ଥାନୀୟ ଏନଏସି କାର୍ଯ୍ୟାଳୟରେ ପହଞ୍ଚି କାର୍ଯ୍ୟନିର୍ବାହୀ ଅଧିକାରୀ ଡ. ଅଶୋକ କୁମାର କର୍ଣ୍ଣଙ୍କୁ ଦସ୍ତଖତ ସମ୍ବଳିତ ସ୍ମାରକପତ୍ର ପ୍ରଦାନ କରିଛନ୍ତି । ପୂର୍ବରୁ ମୌଳାଭଞ୍ଜା ଗ୍ରାମ ନିକଟ ଘୋଡାହାଡ ନଦୀରୁ ଦିଗପହଣ୍ଡି ସହରକୁ ପାଇପ ଯୋଗେ ପାନୀୟ ଜଳ ଆସୁଥିଲା । ବର୍ତ୍ତମାନ ନଦୀ ଶୁଖିଲା ପଡିବା ହେତୁ ଆବଶ୍ୟକ ପାନୀୟଜଳ ଆସୁନାହିଁ। ଏଭଳି ସ୍ଥିତିରେ ଦିଗପହଣ୍ଡି ମେଦିରୀ ସାହି ସମ୍ମୁଖରେ ଜନସ୍ବାସ୍ଥ୍ୟ ବିଭାଗ ପକ୍ଷରୁ ଖୋଳା ଯାଇଥବା ବୋର୍ଓ୍ବେଲରୁ ସହରର ଅର୍ଦ୍ଧାଧିକ ଅଞ୍ଚଳକୁ ସ୍ବଳ୍ପ ପରିଣାମର ପାନୀୟ ଜଳ ଯୋଗାଣ କରାଯାଉଛି। ଜଳଯୋଗାଣ ବ୍ୟବସ୍ଥାରେ ସୁଧାର ଆଣିବା ବଦଳରେ ଜନସ୍ବାସ୍ଥ୍ୟ ବିଭାଗ ପକ୍ଷରୁ ପାଣି ଛଡାଯିବା ସମୟ ମନଇଛା ଧାର୍ଯ୍ୟ କରୁଛନ୍ତି। ସକାଳୁ ପ୍ରକଳ୍ପରୁ ପାଣି ଛାଡିବା ପରିବର୍ତ୍ତେ ରାତି ଅଧରେ ପାଣି ଛାଡୁଛନ୍ତି । ଲୋକେ ରାତି ଅନିଦ୍ରା ହୋଇ ପାଣି ସଂଗ୍ରହ କରୁଛନ୍ତି। ତେଣୁ ବିଭାଗ ପକ୍ଷର ପୂର୍ବଭଳି ସକାଳ ଓ ସନ୍ଧ୍ୟାରେ ସହରକୁ ପାଣି ଛାଡିବାକୁ ସହରବାସୀ ଦାବି କରିଛନ୍ତି । ଏଥିସହ ଟାଟା ବିଦ୍ୟୁତ୍ ବିତରଣ କମ୍ପାନୀ ପକ୍ଷରୁ ଦିଗପହଣ୍ଡିରେ ବିଦ୍ୟୁତ କାଟର କୈାଣସି ସମୟ ନାହିଁ । ଯେତେବେଳେ ଚାହିଁବେ ବିଦ୍ୟୁତ ସରବରାହ ବନ୍ଦ ରଖୁଛନ୍ତି। ବିଦ୍ୟୁତ କାଟ ପୁର୍ବରୁ ଉପଭୋକ୍ତା ମାନଙ୍କୁ ଅବଗତ କରାଯିବାକୁ ଦାବିପତ୍ରରେ ଉଲ୍ଲେଖ ରହିଛି । ଆଗାମୀ ଦିନରେ ବିପର୍ଯ୍ୟସ୍ତ ପାନୀୟ ଜଳଯୋଗାଣ ବ୍ୟବସ୍ଥା ଏବଂ ଅଘୋଷିତ ବି୍ଦ୍ୟୁତ୍ତ କାଟର ସୁଧାର ନହେଲେ ଜନ ଆନ୍ଦୋଳନ କରାଯିବ ବୋଲି ସ୍ମାରକପତ୍ର ପ୍ରଦାନ ସମୟରେ ଉପସ୍ଥିତ କୈଳାସ ଚନ୍ଦ୍ର ଷଡ଼ଙ୍ଗୀ , ଭି .ସୁଦର୍ଶନ ରାଜୁ , ପି . ଶିବଶଙ୍କର , ଇ. କୈଳାଶ , ଏ. କୁରେଶୁ , ଅଶୋକ ପାଢ଼ୀ , ବଂଶୀଧର ମହାରଣା , ଏ . ଗଣେଶ , ନାଗେଶର ରାଓ ସମେତ ବହୁ ସଂଖ୍ୟକ ସହରବାସୀ ଚେତାବନୀ ଦେଇଛନ୍ତି।
