ନୂଆଦିଲ୍ଲୀ,୬।୧୦ : ଦେଶର ବାୟୁ ମାର୍ଗ ସୀମା ଉପରେ ନଜର ରଖିବା ପାଇଁ ମାନବ ବିହୀନ ଡ୍ରୋନ ନିୟୋଜିତ କରାଯାଇଛି। ସେହିପରି ସାମୁଦ୍ରିକ ସୀମା ଉପରେ ତୀକ୍ଷ୍ଣ ନଜର ରଖିବା ପାଇଁ ଏକ ମାନବ ବିହୀନ ବୋଟ ବିକଶିତ କରିବାକୁ ପ୍ରସ୍ତୁତି ଚାଲିଛି। ପ୍ରତିରକ୍ଷା ଅନୁସନ୍ଧାନ ଏବଂ ବିକାଶ ସଂଗଠନ (ଡିଆରଡିଓ) ଏହି ପ୍ରୟାସରେ ନିୟୋଜିତ ଅଛି। ବୁଧବାର ଏହିପରି ତିନୋଟି ବୋଟ ସଫଳତାର ସହ ପରୀକ୍ଷା କରାଯାଇଛି।
ଡିଆରଡିଓର ଯୁଗ୍ମ ନିର୍ଦ୍ଦେଶକ ପିଏମ ନାଇକଙ୍କ ଅନୁଯାୟୀ ଏହି ବୋଟକୁ କୌଣସି ମଣିଷ ବିନା ନିୟନ୍ତ୍ରଣ କରାଯାଇପାରିବ। ଏହି ବୋଟକୁ ଭିଡିଓ ଫିଡ ମାଧ୍ୟମରେ ନିୟନ୍ତ୍ରିତ ହେବ। ଏହା ଜଳ ସୀମାରେ ଶତ୍ରୁର ଗତିବିଧି ଚିହ୍ନଟ କରିବାରେ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହେବ।
ପାଟ୍ରୋଲିଂ ପାଇଁ ଏହି ବୋଟ ଉପଯୋଗୀ ସାବ୍ୟସ୍ତ ହେବ। ଏହା ଆଧୁନିକ ଅସ୍ତ୍ରଶସ୍ତ୍ରରେ ସଜ୍ଜିତ। ନାଇକ କହିଛନ୍ତି ଯେ ଭମା ଆସରଖେଡ଼ ଡ୍ୟାମ ନିକଟରେ ଆମେ ଏହାର ପ୍ରାରମ୍ଭିକ ପରୀକ୍ଷା କରୁଛୁ। ଏହାର ଏପର୍ଯ୍ୟନ୍ତ କୌଣସି ନାମକରଣ ହୋଇ ନାହିଁ। ଏହାକୁ ଦୂରରୁ ନିୟନ୍ତ୍ରଣ କରାଯାଇପାରିବ। ଏହାକୁ ଭାରତୀୟ ନୌସେନା କିମ୍ବା ତଟରକ୍ଷୀ ବାହିନୀକୁ କେବେ ହସ୍ତାନ୍ତର କରାଯିବ ତାହା ଏପର୍ଯ୍ୟନ୍ତ ସ୍ଥିର ହୋଇନାହିଁ।
ଇଲେକ୍ଟ୍ରିକ ଏବଂ ମୋଟର ଇଞ୍ଜିନ ମାଧ୍ୟମରେ ଏହରର ଗତିବିଧି ନିୟନ୍ତ୍ରଣ କରାଯାଇଥାଏ। ଏହା ଏକ କାଳୀନ ୨୪ ଘଣ୍ଟା ନିରନ୍ତର ପାଣିରେ ରହି ପାଟ୍ରୋଲିଂ କରିପାରିବ। ଶତ୍ରୁମାନଙ୍କ କବଳରୁ ରକ୍ଷା କରିବା ପାଇଁ ଏଥିରେ ସ୍ବତନ୍ତ୍ର ଟେକ୍ନୋଲୋଜି ବ୍ୟବହୃତ ହୋଇଛି। ଯଦି ଡଙ୍ଗାଟି ଶତ୍ରୁ ଦ୍ୱାରା କାବୁ ହୁଏ, ତେବେ ଡଙ୍ଗା ଭିତରେ ଥିବା କଣ୍ଟ୍ରୋଲ ବୋର୍ଡ ଆପେଆପେ ନଷ୍ଟ ହୋଇଯିବ। ଫଳରେ କୌଣସି ଗୁପ୍ତ ତଥ୍ୟ ଅବା ବିଶେଷ ସୂଚନା ଶତ୍ରୁମାନଙ୍କ ନିକଟରେ ପହଞ୍ଚି ପାରିବ ନାହିଁ ।
ଏଥିରେ ସ୍ଥାପିତ ଥିବା ସେନସର ସିଷ୍ଟମ ସୋନାର ଏବଂ ରାଡାର ସାହାଯ୍ୟରେ ଏହା ମାଇନ୍ସ ଖୋଜିବାରେ ଉପଯୋଗୀ ହେବ। ସାଗର ଡିଫେନ୍ସ ଇଞ୍ଜିନିୟରିଂ ନାମକ ଏକ କମ୍ପାନୀ ସହିତ ମିଳିତ ଭାବେ ଏହାକୁ ଡିଆରଡିଓ ପକ୍ଷରୁ ବିକଶିତ କରାଯାଇଛି।
