ଭୁବନେଶ୍ୱର,୪ା୭(ବ୍ୟୁରୋ): ରାଷ୍ଟ୍ରପତି ନିର୍ବାଚନ ଆଉ କମ୍ ଦିନ ରହିଲା। ଏହାରି ଭିତରେ ଏନ୍ଡିଏ ସମର୍ଥିତ ରାଷ୍ଟ୍ରପତି ପ୍ରାର୍ଥୀ ଦ୍ରୌପଦୀ ମୁର୍ମୁ ଏବଂ ବିରୋଧୀ ମେଣ୍ଟର ପ୍ରାର୍ଥୀ ଯଶବନ୍ତ ସିହ୍ନା ସବୁ ରାଜ୍ୟ ଗସ୍ତରେ ଯାଇ ସମର୍ଥନ ଲୋଡିବା ଆରମ୍ଭ କରିସାରିଛନ୍ତି। ଏହି କ୍ରମରେ ଶାସକ ବିଜେଡି ସମର୍ଥନ ନେବାକୁ ସମସ୍ତେ ଉଦ୍ୟମ ଆରମ୍ଭ କରିଛନ୍ତି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦ୍ରୌପଦୀ ମୁର୍ମୁ ଓଡ଼ିଆ ଝିଅ ହୋଇଥିବାରୁ ତାଙ୍କୁ ସମର୍ଥନ ଦେବା ଲାଗି ଘୋଷଣା କରିସାରିଥିବା ବେଳେ ବିରୋଧୀଙ୍କୁ ମଧ୍ୟ ଏଥିପାଇଁ ବୁଝାଇବେ ବୋଲି କହିଥିଲେ। ଏହାସତ୍ତ୍ୱେ ଉଭୟ ପ୍ରାର୍ଥୀ ଓଡ଼ିଶା ଗସ୍ତରେ ଆସିବେ ବୋଲି ଜଣାପଡ଼ିଛି। ବିରୋଧୀ ମେଣ୍ଟରୁ ପ୍ରାର୍ଥୀ ହୋଇଥିବା ଯଶବନ୍ତ ସିହ୍ନା ଆସନ୍ତା ୬ ତାରିଖ ଦିନ ଓଡ଼ିଶା ଗସ୍ତରେ ଆସି ନିର୍ବାଚନ ପାଇଁ ସମସ୍ତଙ୍କ ସମର୍ଥନ ଲୋଡ଼ିବେ। ଏହି ଗସ୍ତ ଅବସରରେ କଂଗ୍ରେସ ଯଶବନ୍ତଙ୍କୁ ସ୍ବାଗତ କରିବାକୁ ରଣନୀତି ପ୍ରସ୍ତୁତ କରୁଥିବା ବେଳେ ସିହ୍ନା ବିଜେଡି ସଭାପତି ନବୀନ ପଟ୍ଟନାୟକଙ୍କୁ ଭେଟି ମଧ୍ୟ ତାଙ୍କ ସମର୍ଥନ ଲୋଡିବେ। ଏହାର ଦିନକ ପରେ ଅର୍ଥାତ୍ ଆସନ୍ତା ୮ ତାରିଖରେ ଦ୍ରୌପଦୀ ମୁର୍ମୁଙ୍କ ଓଡ଼ିଶା ଗସ୍ତ କାର୍ଯ୍ୟକ୍ରମ ସ୍ଥିର ହୋଇଛି। ମୁର୍ମୁଙ୍କ ସହ ଭାଜପା ବରିଷ୍ଠ ନେତା ବିନୋଦ ତାଉଡେ ଏବଂ କେନ୍ଦ୍ର ରାଷ୍ଟ୍ରମନ୍ତ୍ରୀ ଗଜେନ୍ଦ୍ର ସିଂ ଶେଖାଓ୍ବତ ମଧ୍ୟ ଓଡ଼ିଶା ଆସିବେ। ଏହି ଅବସରରେ ଓଡ଼ିଆ ଝିଅ ଭାବେ ମୁର୍ମୁ ଦଳମତ ନିର୍ବିଶେଷରେ କଂଗ୍ରେସ, ଭାଜପା ଓ ବିଜେଡି ସମସ୍ତଙ୍କ ସମର୍ଥନ ଲାଗି ନିବେଦନ କରିବେ। ଏହି ଅବସରରେ ତାଙ୍କର ମୁଖ୍ୟମନ୍ତ୍ରୀଙ୍କୁ ଭେଟିବା କାର୍ଯ୍ୟକ୍ରମ ମଧ୍ୟ ରହିଛି। ମୁର୍ମୁ ଏନ୍ଡିଏ ରାଷ୍ଟ୍ରପତି ଭାବେ ମନୋନୀତ ହେବାପରେ ନବୀନ ବିଦେଶ ଗସ୍ତରେ ଥିବାରୁ ଉଭୟଙ୍କ ମଧ୍ୟରେ ଭେଟଘାଟ ହୋଇପାରି ନାହିଁ। ହେଲେ ବିଦେଶରେ ଥିବା ସମୟରେ ହିଁ ନବୀନ ମୁର୍ମୁଙ୍କ ସମର୍ଥନ ଘୋଷଣା କରିବା ସହ ତାଙ୍କ ନାମାଙ୍କନ ସମୟରେ ଓଡ଼ିଶାର ଦୁଇ କ୍ୟାବିନେଟ୍ ମନ୍ତ୍ରୀ ଟୁକୁନି ସାହୁ ଏବଂ ଜଗନ୍ନାଥ ସାରକାଙ୍କୁ ମଧ୍ୟ ପ୍ରସ୍ତାବକ ରହିବାକୁ ପଠାଇଥିଲେ।