ନୂଆଦିଲ୍ଲୀ,୨୫।୧୨(ପି.ଟି.): ୨୦୧୫ରେ ପ୍ରଥମ ଭାରତୀୟ ବାସ୍କେଟବଲ୍ ଖେଳାଳି ଭାବେ ଏନ୍ବିଏ ଟିମ୍ରେ ସାମିଲ ହୋଇଥିବା ସତ୍ନାମ ସିଂ ଭମରା ଖେଳରୁ ୨ ବର୍ଷ ବାସନ୍ଦ ହୋଇଛନ୍ତି। ଗତବର୍ଷ ଏକ ଡୋପ୍ ଟେଷ୍ଟରେ ବିଫଳ ହେବା କାରଣରୁ ତାଙ୍କୁ ଜାତୀୟ ନିଶା ନିବାରଣ ସଂସ୍ଥା (ନାଡା) ବାସନ୍ଦ କରିଛି। ୨୫ ବର୍ଷୀୟ ସତ୍ନାମଙ୍କୁ ଗତବର୍ଷ ନଭେମ୍ବରରେ ସାମୟିକ ଭାବେ ବାସନ୍ଦ କରାଯାଇଥିଲା। ସାଉଥ୍ ଏସିଆନ ଗେମ୍ସ ପ୍ରସ୍ତୁତି ଶିବିରରେ ନାଡା ଦ୍ୱାରା ଆୟୋଜିତ ଏକ ଆଉଟ୍ ଅଫ୍ କମ୍ପିଟିଶନ ଟେଷ୍ଟରେ ସେ ଫେଲ୍ ମାରିଥିଲେ। ତେବେ ସେ ଏହାକୁ ଦ୍ୱନ୍ଦ୍ୱକୁ ଟାଣି ନେଇଛନ୍ତି। ସେ ଏ ନେଇ ନିଶା ନିବାରଣର ଶୃଙ୍ଖଳାଗତ କମିଟି ଦ୍ୱାରା ଏକ ଶୁଣାଣି କରିବାକୁ ନାଡାକୁ ଅନୁରୋଧ କରିଛନ୍ତି।
ଏବେ ସତ୍ନାମଙ୍କ ବାସନ୍ଦ ଅବଧି ଆସନ୍ତାବର୍ଷ ନଭେମ୍ବର ୧୯ ତାରିଖରେ ଶେଷ ହେବ। ତାଙ୍କ ବାସନ୍ଦ ଅବଧି ୨୦୧୯ରେ ସମାନ ଦିବସରେ ଆରମ୍ଭ ହୋଇଛି। ହାଇଜେନାମିନ୍ ପାଇଁ ସେ ଟେଷ୍ଟରେ ବିଫଳ ହୋଇଛନ୍ତି ବୋଲି ନାଡା ତରଫରୁ କୁହାଯାଇଛି। ୨୦୧୭ରେ ଏହି ପଦାର୍ଥକୁ ନିଷିଦ୍ଧ ତାଲିକାରେ ସାମିଲ କରାଯାଇଥିଲା। ଉଲ୍ଲେଖଥାଉ କି, ୫ ବର୍ଷ ତଳେ ସତ୍ନାମଙ୍କୁ ଏନ୍ବିଏ ଡ୍ରାଫ୍ଟରେ ଡଲାସ୍ ମାଭେରିକ୍ସ ସାମିଲ କରିଥିଲା ଓ ଏଥି ସହିତ ସେ ଇତିହାସ ସୃଷ୍ଟି କରିଥିଲେ। ଗୋଟିଏ ବର୍ଷ ପରେ ସେ ଭାରତକୁ ଫେରିଥିଲେ। କାନାଡ଼ାର ନ୍ୟାଶନାଲ ବାସ୍କେଟବଲ ଲିଗ୍ରେ ଖେଳିବାକୁ ସେଣ୍ଟ ଜନ୍ସ ଏଜ୍ ସହିତ ଚୁକ୍ତି କରି ପୁଣି ଥରେ ଇତିହାସ ସୃଷ୍ଟି କରିଥିଲେ। ସେ ମଧ୍ୟ ଭାରତ ପାଇଁ ଏସିଆନ୍ ଚାମ୍ପିୟନଶିପ୍ , ୨୦୧୮ ରାଜ୍ୟଗୋଷ୍ଠୀ କ୍ରୀଡ଼ା ଓ ୨୦୧୯ ବିଶ୍ୱକପ୍ କ୍ୱାଲିଫାୟର୍ସ ଭଳି ମେଜର ଟୁର୍ନାମେଣ୍ଟରେ ଅଂଶଗ୍ରହଣ କରିଛନ୍ତି।
