ନୂଆଦିଲ୍ଲୀ,୧୭ା୪: ନିର୍ବାଚନ ବେଳେ ଇଲେକ୍ଟ୍ରୋନିକ୍ ଭୋଟିଂ ମେଶିନ୍ (ଇଭିଏମ୍) ଜାଲିଆତି ନେଇ ଅଭିଯୋଗ ବଢ଼ିବାରେ ଲାଗିଛି। ଇଭିଏମ୍ ସହ ଭୋଟର ଭେରିଫିଏବଲ୍ ପେପର ଅଡିଟ୍ ଟ୍ରାଏଲ୍ (ଭିଭିପିଏଟି)ର ୧୦୦ ପ୍ରତିଶତ ପେପର୍ ସ୍ଲିପ୍କୁ ମେଳ କଲେ ଗୁପ୍ତ ମତଦାନ ବ୍ୟବସ୍ଥାରେ ରହିଥିବା ତ୍ରୁଟିକୁ ସୁଧାରିହେବ ବୋଲି ସୁପ୍ରିମକୋର୍ଟରେ ଏକାଧିକ ପିଟିଶନ ଦାଖଲ ହୋଇଛି। ସର୍ବୋଚ୍ଚ ଅଦାଲତ ମଙ୍ଗଳବାର ଏହାର ଶୁଣାଣି କରି ଇଭିଏମ୍ ସମାଲୋଚକଙ୍କୁ କହିଛନ୍ତି, ବ୍ୟବସ୍ଥା ବିଗାଡ଼ିବାକୁ ଉଦ୍ୟମ କରନ୍ତୁ ନାହିଁ। ପୂର୍ବରୁ ବାଲଟ୍ ପେପର ଜରିଆରେ ମତଦାନ କରାଯାଉଥିବାବେଳେ କିପରି ବହୁଳ ଭାବେ ବୁଥ୍ କ୍ୟାପ୍ଚରିଂ ହେଉଥିଲା ତାକୁ ସ୍ମରଣ କରିବାକୁ ଅଦାଲତ କହିଛନ୍ତି।
ସଞ୍ଜୀବ ଖାନ୍ନା ଏବଂ ଦୀପଙ୍କର ଦତ୍ତାଙ୍କୁ ନେଇ ଗଠିତ ଖଣ୍ଡପୀଠରେ ଶୁଣାଣି ବେଳେ ଜଣେ ଆବେଦନକାରୀଙ୍କ ପକ୍ଷରୁ ବରିଷ୍ଠ ଆଇନଜୀବୀ ଗୋପାଳ ଶଙ୍କରନାରାୟଣନ୍ ଯୁକ୍ତି ବାଢ଼ିଥିଲେ, ଇଭିଏମ୍ ବ୍ୟବସ୍ଥା ଖରାପ ବୋଲି ଆମେ କହୁନାହୁଁ। ମୂଳ କଥା ହେଉଛି, ଭୋଟର ମତଦାନ କରିବା ପରେ ଯାହାଙ୍କୁ ଭୋଟ ଦେଇଛନ୍ତି, ସେହି ପ୍ରାର୍ଥୀଙ୍କ ସପକ୍ଷରେ ତାଙ୍କ ମତ ଯାଇଛି କି ନାହିଁ ତାହା ସନ୍ଦେହରେ ରହୁଛି। ସେହିପରି ଆସୋସିଏଶନ୍ ଫର୍ ଡେମୋକ୍ରାଟିକ୍ ରିଫମର୍ସ (ଏଡିଆର୍) ପକ୍ଷରୁ ଲଢ଼ୁଥିବା ବରିଷ୍ଠ ଓକିଲ ପ୍ରଶାନ୍ତ ଭୂଷଣ ଯୁକ୍ତି ବାଢ଼ିଥିଲେ, ପୂର୍ବରୁ ଇଭିଏମ୍ ଜରିଆରେ ଭୋଟିଂ କରାଉଥିବା ଅଧିକାଂଶ ୟୁରୋପୀୟ ରାଷ୍ଟ୍ର ପୁଣି ବାଲଟ୍ ପେପରକୁ ଫେରିଲେଣି। ଆମେ ମଧ୍ୟ ଦେଶରେ ପେପର ବାଲଟ୍ ବ୍ୟବସ୍ଥାକୁ ଫେରିପାରିବା। ଅନ୍ୟ ଏକ ବିକଳ୍ପ ହେଉଛି, ମତଦାତାଙ୍କୁ ସେମାନଙ୍କ ଭିଭିପିଏଟି ସ୍ଲିପ୍ ପ୍ରଦାନ କରିବା। ଏହି ବ୍ୟବସ୍ଥାରେ ସ୍ବଚ୍ଛତା ରହିବା ଜରୁରୀ ବୋଲି ସେ କହିଥିଲେ। ଏପରି କି ଜର୍ମାନୀରେ ଏଭଳି କରାଯାଉଥିବା ସେ ଉଦାହରଣ ଦେଇଥିଲେ। ଏହା ଶୁଣିବା ପରେ ଜଷ୍ଟିସ୍ ଖାନ୍ନା କହିଥିଲେ, ଆମକୁ ୬୦ ଉପର ହେଲାଣି। ବାଲଟ୍ ପେପରରେ ଭୋଟିଂ ବେଳେ କ’ଣ ସବୁ ହେଉଥିଲା ଆମେ ଜାଣିଛୁ। ତାକୁ ଭୁଲିନାହୁଁ। ଜର୍ମାନୀରେ ୬ କୋଟି ଭୋଟର ଥିବାବେଳେ ଭାରତରେ ମତଦାତାଙ୍କ ସଂଖ୍ୟା ୯୭ କୋଟି। ୬୦ କୋଟି ଭିଭିପିଏଟି ସ୍ଲିପ୍କୁ ଗଣତି କରାଯିବା ଉଚିତ କି ବୋଲି ଖଣ୍ଡପୀଠ ପ୍ରଶ୍ନ କରିଥିଲେ।
