ନୂଆଦିଲ୍ଲୀ,୧ା୮: ଫୁଟବଲ କିମ୍ବଦନ୍ତୀ ସୁନୀଲ ଛେତ୍ରୀ ଭାରତୀୟ କ୍ରୀଡ଼ା କ୍ଷେତ୍ରକୁ ଆଗକୁ ନେବା ଦିଗରେ ସର୍ବଦା ତାଙ୍କର ସକାରାତ୍ମକ ପ୍ରତିକ୍ରିୟା ଦେଇଥାନ୍ତି। ସମ୍ପ୍ରତି ପ୍ୟାରିସ ଅଲମ୍ପିକ୍ସ ଚାଲିଥିବା ବେଳେ ଅଲମ୍ପିକ୍ସରେ ଭାରତର ଦୁର୍ବଳ ପ୍ରଦର୍ଶନ ଉପରେ ନିଜର ମତ ପ୍ରକାଶ କରିଛନ୍ତି। ଗତ ଅଲମ୍ପିକ୍ସ ସଂସ୍କରଣ ଟୋକିଓରେ ଭାରତ ୭ ଟି ପଦକ ଜିତିଥିଲା, ଯାହା ସର୍ବଶ୍ରେଷ୍ଠ ପ୍ରଦର୍ଶନ ଅଟେ। ତେବେ ୧.୫ ବିଲିଅନ୍ ଜନସଂଖ୍ୟା ସତ୍ତ୍ୱେ ଭାରତ ପଦକ ଅଭାବର କାରଣ ବର୍ଣ୍ଣନା କରିଛନ୍ତି ଛେତ୍ରୀ।
ଏକ ସାକ୍ଷାତକାରରେ ଛେତ୍ରୀ କହିଛନ୍ତି ଯେ ତୃଣମୂଳ ସ୍ତରରେ ପ୍ରତିଭା ଚିହ୍ନଟ ତଥା ସେମାନଙ୍କୁ ପ୍ରଶିକ୍ଷିତ କରିବାରେ ସଫଳତାର ଅଭାବ ହେତୁ ଭାରତ ବିଶ୍ୱ ସ୍ତରରେ ପଦକ ପାଇବାରେ ବିଫଳ ହୋଇଛି।
“୧.୫ ବିଲିୟନ ଜନସଂଖ୍ୟା ସତ୍ୱେ ଆମେ ଅଲିମ୍ପିକ୍ସରେ ପଦକ ଜିତି ନାହୁଁ, ଏହା ପ୍ରକୃତରେ ସତ୍ୟ ନୁହେଁ କାରଣ ଆମେ ୧.୫ ବିଲିୟନ ଲୋକଙ୍କ ପ୍ରତିଭା ଚିହ୍ନଟ କରିପାରୁ ନାହୁଁ। ଚୀନ୍, ଆମେରିକା, ଜର୍ମାନୀ, ଜାପାନ, ଅଷ୍ଟ୍ରେଲିଆ, କାନାଡା – – ଯେଉଁମାନେ ଅଲିମ୍ପିକ୍ସରେ ଭଲ ପ୍ରଦର୍ଶନ କରୁଛନ୍ତି ସେମାନେ ଆମଠାରୁ ମାଇଲ୍ ଭଲ ବୋଲି ଛେତ୍ରୀ କହିଛନ୍ତି ଏବଂ ଏହି ଭିଡିଓ ଏବେ ଭାଇରାଲ ହେଉଛି।
Why India win less medals in Olympics: Sunil Chhetri pic.twitter.com/WF9PrmUFIs
— Gems of Shorts (@Warlock_Shabby) July 31, 2024
ଗୋଟିଏ ଦେଶ ଯେଉଁଠି ୧.୫ ବିଲିୟନ ଜନସଂଖ୍ୟା ଅଛନ୍ତି ସେଠାରେ ଅଧିକ ପ୍ରତିଭା ବାହାର କରିବାରେ ସକ୍ଷମ ହେବା ଉଚିତ ଏବଂ ଛେତ୍ରୀ ଅନୁଭବ କରୁଛନ୍ତି ଯଦିଓ ଭାରତରେ ପ୍ରତିଭା ଅଛି, ସେମାନଙ୍କୁ ପରବର୍ତ୍ତୀ ସ୍ତରକୁ ନେବା ଉପରେ ଅଧିକ ଧ୍ୟାନ ଦିଆଯାଉ ନାହିଁ।
“ଯେତେବେଳେ ଲୋକମାନେ କହନ୍ତି, ‘ପ୍ରତିଭାର କୌଣସି ଅଭାବ ନାହିଁ, ଆମ ଦେଶରେ’, ଏହା ଶତପ୍ରତିଶତ ଠିକ୍ ଅଟେ। ଆଣ୍ଡାମାନର ଜଣେ ପାଞ୍ଚ ବର୍ଷର ପିଲା, ଯିଏ ଫୁଟବଲ୍ କିମ୍ବା ଜାଭେଲିନରେ ଭଲ ଥିଲେ, ତାଙ୍କ କେହି ଜାଣି ନ ଥିଲେ ଏବଂ କିଛି ଦିନ ପରେ ସେ ଉଭାନ ହୋଇଯାଇଥିଲେ, ଆଉ ଏବେ ସେ କଲ୍ ସେଣ୍ଟରେ କାମ କରୁଛନ୍ତି।
“ପ୍ରତିଭାକୁ ଚିହ୍ନିବା ଏବଂ ପ୍ରତିଭାକୁ ସଠିକ୍ ସମୟରେ ଏବଂ ସଠିକ୍ ପ୍ରଣାଳୀରେ ପ୍ରଶିକ୍ଷଣ କରିବାରେ ଆମେ ପଛରେ ଅଛୁ। ”ଏଥିପାଇଁ ଲୋକମାନେ ମୋତେ ମାରିଦେଲେ ମଧ୍ୟ ମୋର ଚିନ୍ତା ନାହିଁ” ଏହା ହେଉଛି ବାସ୍ତବତା।”
