ବଇଣ୍ଡା,୧୫ା୮(ପରିକ୍ଷିତ ସାହୁ):ମହାତ୍ମାଙ୍କ ଆଗମନର ସ୍ମୃତିକୁ ଉଜ୍ଜୀବିତ ରଖିବା ପାଇଁ ଅନୁଗୋଳ ଜିଲା କିଶୋରନଗର ବ୍ଲକ ବାମୁରଠାରେ ହୋଇଛି ଅନେକ ବ୍ୟବସ୍ଥା। ଗାନ୍ଧୀ ସ୍ମୃତିଭବନ, ଡାକବଙ୍ଗଳା ନିର୍ମାଣ ସହ ବାପୁଙ୍କ ବ୍ରୋଞ୍ଚ ପ୍ରତିମର୍ତ୍ତି ସ୍ଥାପନ କରାଯାଇଛି। କିନ୍ତୁ ଗାନ୍ଧୀଙ୍କ ଅନେକ ବାର୍ତ୍ତା ବହନ କରୁଥିବା ଏହି ସ୍ଥାନର ଉନ୍ନତୀକରଣ, ଶୋଭାବଦ୍ଧର୍ର୍ନ ଓ ବ୍ୟାପକ ପ୍ରଚାର ପ୍ରସାର ଦିଗରେ ପ୍ରଶାସନ ସେପରି ପଦକ୍ଷେପ ଗ୍ରହଣ କରୁନାହିଁ। ଫଳରେ ଦୀର୍ଘ ୩୨ ବର୍ଷ ତଳେ ନିର୍ମିତ ସ୍ମୃତି ଭବନ ଜରାଜୀର୍ଣ୍ଣ ହୋଇପଡ଼ିଛି। ଖୋଲା ଆକାଶ ତଳେ ଥିବା ବ୍ରୋଞ୍ଚ ପ୍ରତିମୂର୍ତ୍ତି ଉପରେ ଛାତଟିଏ କରାଯାଉ ନାହିଁ। ଆଲୋକୀକରଣ ସହ ପାର୍କ ସ୍ଥାପନ ଦାବିକୁ ମଧ୍ୟ ଗ୍ରହଣ କରାଯାଉ ନାହିଁ। ପ୍ରଶାସନର ଏପରି ଅବହେଳାକୁ ନେଇ ବାମୁରବାସୀ କ୍ଷୋଭ ପ୍ରକାଶ କରିବା ସହ ଗାନ୍ଧୀ ସ୍ମୃତିଭବନ କେବଳ ସ୍ମୃତିରେ ଅଟକି ନ ଯାଉ ବୋଲି ପ୍ରକାଶ କରିଛନ୍ତି।
ବାମୁରବାସୀଙ୍କ କହିବା ଅନୁଯାୟୀ, ୧୯୩୪ରେ ମହାତ୍ମା ଗାନ୍ଧୀ ଝାରସୁଗୁଡାରୁ ପୁରୀ ଅଭିମୁଖେ ଯାଉଥିବାବେଳେ ସା ହୋଇଯିବାରୁ ବାମୁରଠାରେ ଥିବା ବଙ୍ଗଳାର ମାଟି ଘରେ ରା଼ତ୍ରି ଯାପନ କରିଥିଲେ। ସେଠାରେ ଗ୍ରାମବାସୀଙ୍କୁ ସମାଜରେ ପ୍ରଚଳିତ କୁସଂସ୍କାର, ଅନ୍ଧ ବିଶ୍ୱାସ ଓ ଅସ୍ପୃଶ୍ୟତାର ଦୂରୀକରଣ ସହ ନିଶା ନିବାରଣ ସମ୍ପର୍କରେ ନାନା ପରାମର୍ଶ ଦେଇଥିଲେ। ତାଙ୍କ ସହ ରାଜ୍କ୍ରିଷ୍ଣ ବୋଷ, ଘନଶ୍ୟାମ ଦାସ ବିରଳା ଓ ମୀରା ଦେଈଙ୍କ ପରି କେତେଜଣ ସଂଗ୍ରାମୀ, ଗାନ୍ଧୀବାଦୀ ସାମିଲ ହୋଇଥିଲେ। ମହାତ୍ମାଙ୍କ ବାମୁର ରହଣିକୁ ସ୍ମରଣୀୟ କରିବାକୁ ୧୯୮୯ରେ ତତ୍କାଳୀନ ମୁଖ୍ୟ ଶାସନ ସଚିବ ରମାକାନ୍ତ ମିଶ୍ରଙ୍କ ନିର୍ଦ୍ଦେଶ କ୍ରମେ ଏକ ଟ୍ରଷ୍ଟ ଗଠନ ସହ ଗାନ୍ଧୀ ସ୍ମୃତି ଭବନ ନିର୍ମାଣ କରାଯାଇଥିଲା। ୧୯୯୦ ଜାନୁୟାରୀ ୩୦ରେ ତତ୍କାଳୀନ ଢେଙ୍କାନାଳ ଜିଲାପାଳ ଡ. କେ.ଏସ୍. ଗଣେଶନ ଏହାର ଉଦ୍ଘାଟନ କରିଥିଲେ। ଏଥିସହ ବାମୁର ଡାକ ବଙ୍ଗଳା ଠାରେ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତି ସ୍ଥାପନ କରାଯାଇଥିଲା। ସେହିବର୍ଷଠାରୁ ଗାନ୍ଧିଜୀଙ୍କ ଜୟନ୍ତୀ, ମହାପ୍ରୟାଣ ଦିବସ, ରହଣି ସ୍ମୃତି ସଭା, ସାଧାରଣତନ୍ତ୍ର ଦିବସ, ସ୍ବାଧୀନତା ଦିବସରେ ବିଭିନ୍ନ କାର୍ଯ୍ୟକ୍ରମ ପ୍ରତିମୂର୍ତ୍ତି ନିକଟରେ ପାଳନ କରାଯାଉଛି। ତେବେ ୫୫ ନମ୍ବର ଜାତୀୟ ରାଜପଥ ସମ୍ପ୍ରସାରଣ ପାଇଁ ପୁରୁଣା ପ୍ରତିମୂର୍ତ୍ତିକୁ ଉକ୍ତ ସ୍ଥାନରୁ ହଟାଯାଇ ୨୦୨୦-୨୦୨୧ରେ ସାମାନ୍ୟ ଦୂରରେ ଆକର୍ଷଣୀୟ ମଣ୍ଡପ ସହିତ ବ୍ରୋଞ୍ଜ ପ୍ରତିମୂର୍ତ୍ତି ସ୍ଥାପନ କରାଯାଇଛି। ହେଲେ ଛାତ ନିର୍ମାଣ କରାଯାଇ ନ ଥିବାରୁ ପ୍ରତିମୂର୍ତ୍ତି ଖୋଲା ଆକାଶ ତଳେ ରହିଛି। ସେହିପରି ପୂର୍ତ୍ତ ବିଭାଗ ପକ୍ଷରୁ ନୂତନ ଡାକ ବଙ୍ଗଳା ନିର୍ମାଣ ହୋଇଥିଲେ ମଧ୍ୟ ତାହା ଉଦ୍ଘାଟନ କରାଯାଉ ନାହିଁ। ସ୍ମୃତିଭବନର ରକ୍ଷଣାବେକ୍ଷଣ କରାଯାଉ ନ ଥିବାରୁ ତାହା ଜରାଜୀର୍ଣ୍ଣ ଅବସ୍ଥାରେ ଥିଲେ ମଧ୍ୟ ଏଥିପ୍ରତି ଆବଶ୍ୟକ ଦୃଷ୍ଟି ଦିଆଯାଉ ନାହିଁ। ପ୍ରତିମୂର୍ତ୍ତି ନିକଟରେ ଥିବା ସରକାରୀ ଜମିରେ ପାର୍କ ନିର୍ମାଣ, ସୌନ୍ଦର୍ଯ୍ୟ ଓ ଆଲୋକୀକରଣ ପାଇଁ ହେଉଥିବା ଦାବିପ୍ରତି କର୍ଣ୍ଣପାତ କରାଯାଉ ନାହିଁ। ତୁରନ୍ତ ଏ ନେଇ ପଦକ୍ଷେପ ନିଆଯିବାକୁ ଦାବି ହେଉଛି।
