ଭିଲ୍ବାଡା, ୫।୭- ଜମି, ସମ୍ପତ୍ତିକୁ ନେଇ ଦୁଇ ପକ୍ଷ ଲୋକଙ୍କ ମଧ୍ୟରେ ବିବାଦ ହୋଇଥିବା ଏକ ସାଧାରଣ କଥା। ଏହାର ସମାଧାନ ପାଇଁ ଲୋକେ ଥାନା, କୋର୍ଟ, କଚେରୀକୁ ମଧ୍ୟ ଯାଇଥାନ୍ତି। କିନ୍ତୁ ରାଜସ୍ଥାନ ଭିଲ୍ବାଡା ଜିଲାର କୋଟ୍ଡି ଥାନା ଅଞ୍ଚଳରେ ଏକ ଅଜବ ଘଟଣା ଏବେ ସାମ୍ନାକୁ ଆସିଛି। ଯାହାକୁ ଶୁଣିଲେ ଆଶ୍ଚର୍ଯ୍ୟ ହେବେ। ୫ ବର୍ଷ ତଳେ ଚୋରି ହୋଇଥିବା ଏକ ଗଧର ମାମଲା ଏବେ ସାମ୍ନାକୁ ଆସିଛି। ଏହି ଗଧକୁ ୨ ଜଣ ଲୋକ ନିଜର ବୋଲି ଦାବି କରି କୋଟଡି ଥାନାରେ ପହଞ୍ଚତ୍ଥିଲେ। ଥାନାରେ ମଧ୍ୟ ଗଧର ମାଲିକାନା ନେଇ ସମାଧାନ ସୂତ୍ର ବାହାରି ପାରି ନ ଥିଲା। ଶେଷରେ ଗ୍ରାମ ମନ୍ଦିରରେ ଗଧର ମାଲିକାନା ସ୍ଥିର କରାଯାଇଥିଲା।
ଜଣାପଡ଼ିଛି ଯେ, ୫ ବର୍ଷ ତଳେ ରାମଦେବ ବାଗାରିଆଙ୍କ ଏକ ଗଧ ଚୋରି ହୋଇଯାଇଥିଲା। ବହୁ ଖୋଜା ଖୋଜି ପରେ ମଧ୍ୟ ରାମଦେବ ଗଧର କୌଣସି ସନ୍ଧାନ ପାଇପାରି ନ ଥିଲେ। କିନ୍ତୁ ୩ ଦିନ ତଳେ ରାମଦେବ ଯେତେବେଳେ ସ୍ଥାନୀୟ ଝୋପଡ଼ା ଗ୍ରାମଦେଇ ଯାଉଥିଲେ ମାନ ସିଂ ନାମକ ଜଣେ ବ୍ୟକ୍ତି ମେଣ୍ଢା ଚଳାଉଥିଲେ। ମେଣ୍ଢାଙ୍କ ଗହଣରେ ଚରୁଥିବା ଏକ ଗଧକୁ ମଧ୍ୟ ସେ ଦେଖିଥିଲେ। ଏହି ଗଧକୁ ରାମଦେବ ତାଙ୍କର ବୋଲି ଜାଣିପାରିଥିଲେ। ଏହାପରେ ସେ ଥାନାରେ ମାନ ସିଂଙ୍କ ନାମରେ ଗଧ ଚୋରି କରିଥିବା ନେଇ ଅଭିଯୋଗ କରିଥିଲେ। ପୋଲିସ ନିକଟରେ ଉଭୟ ରାମଦେବ ଓ ମାନ ସିଂ ଗଧକୁ ନିଜର ବୋଲି ଦାବି କରିଥିଲେ। ପ୍ରମାଣ ସ୍ବରୂପ ମାନ ସିଂ ଗଧର ବୟସ ୭ ଓ ରାମଦେବ ୧୨ ବର୍ଷ ବୋଲି କହିଥିଲେ। ପରେ ଜଣେ ପଶୁ ଡାକ୍ତର ପରୀକ୍ଷା କରି ଗଧର ବୟସ ୧୦ ବର୍ଷରୁ ଊର୍ଦ୍ଧ୍ୱ ହେବ ବୋଲି କହିଥିଲେ। ଏହାପରେ ଥାନା ଅଧିକାରୀ ରାମଦେବଙ୍କୁ ଗଧର ପ୍ରକୃତ ମାଲିକ ବୋଲି କହିଥିଲେ। କିନ୍ତୁ ବର୍ତ୍ତମାନର ମାଲିକ ମାନ ସିଂ ଗଧ ଦେବାକୁ ନାରାଜ ଥିଲେ। ଶେଷରେ ଥାନା ଅଧିକାରୀ ଗଧକୁ ଅଞ୍ଚଳର ପ୍ରମୁଖ ମନ୍ଦିର ଚାରଭୁଜା ପରିସରରେ ବାନ୍ଧି ଦେଲେ। ଯିଏ ଏହାର ପ୍ରକୃତ ମାଲିକ ସେ ଗଧକୁ ଫିଟାଇ ନେଇପାରିବ ବୋଲି ସ୍ଥିର କରାଗଲା। ଶେଷରେ ରାମଦେବ ମନ୍ଦିର ମଧ୍ୟରୁ ଗଧକୁ ଫିଟାଇ ନେଇଯାଇଥିଲେ। କିନ୍ତୁ ଗଧର ବର୍ତ୍ତମାନ ମାଲିକ ମାନ ସିଂ ଏହାର କୌଣସି ବିରୋଧ କରି ନ ଥିଲେ। ଏହି ଘଟଣା ଏବେ ଚାରିଆଡ଼େ ଚର୍ଚ୍ଚାର ବିଷୟ ପାଲଟିଛି।
